Jọnụ 8 - Ika

Isi Nke Ẹsatọ Okpoho Hụn Zọ ụkụ ye ọfịa

¹ Jesu nkẹ nọ shi Ugu Olivu.

² Ụzụtụntụn, o kinhẹnzi Ụlọ-nsọ, ndị hụ ile nọ bịa d'e kunrun ẹ, ọ nọ nọdị alị, kuzimẹ wẹ.

³ Ya kẹ ndị-nkuzi Iwu lẹ ndị Itu-Farisi nọ duhẹ okpoho ohu wẹ nwụn ebe ọ rị a zọ ụkụ e ye ọfịa. E we w'ẹ tumẹ ihun ịhịan ile,

⁴ wẹ nọ sị Jizọsị, “Onyẹ-nkuzi, wẹ nwụn okpohoni ebe ọ rị a zọ ụkụ e ye ọfịa.

⁵ Imẹ Iwu, Mozizi sị ẹnyi gi ọmụma magbu okpoho mẹ ihiẹnni o mẹ. Kị yụ nwẹn ku?”

⁶ Kanị wẹ rịhụ a chọ ihiẹn rị a ọnụ nị wẹ hụn ihiẹn w'e gi ma a ikpe. Ya kẹ Jizọsị nọ tukun, gi mkpịnsịn-ẹka a demẹ ihiẹn alị.

⁷ A tọ wẹ a jụ a, ọ nọ lihi ọtọ, sị wẹ, “Onyẹ hụn mẹtulẹni njọ imẹ ụnụ ile ya bu ụzọ ma a ọmụma.”

⁸ Ya ọ nọzị tukun, demẹ ihiẹn alị.

⁹ A nụ wẹ ihiẹn ọ za, wẹ ile nọ pụma ohu-ohu — ndị kanị bu ụzọ pụma, d'e ru n'ọ họdụ Jizọsị sụọ; okpoho hụ turuhụkwọ ihun Jizọsị ebẹhụ.

¹⁰ Ya Jesu nọ lihi ọtọ, sị a, “Okpoho, elebe wẹ rị? Onwọnni onyẹ ma ị ikpe?”

¹¹ Ọ nọ sị, “Diọkpa, onwọnni!” Jizọsị nọ sị a, “Mmẹ nwẹn amakọ ị ikpe. E jẹn. Gha kikẹnni jẹnmẹ, emẹzilẹ njọ.”

Jizọsị Wụ Ukpẹ Ụwa

¹² Ya kẹ Jizọsị nọ sịzị ndị ahụn o te rị a kuzi, “Mmẹ wụ ukpẹ ụwa. Onyẹ rị e sọnni m aghakọ imẹ ishi, kama, o sikọ d'e nwọn ukpẹ ahụn e ye ndụn.”

¹³ Ndị Farisi nọ sị a, “Ị rị nwan a shịanị enwẹn i ẹri, ya wụ ẹlẹ hụn wẹ e gi dọn.”

¹⁴ Jesu nọ sị wẹ, “Ọsụọn'a nị m shịanị enwẹn m ẹri, ẹri m furu w'e gi dọn, makẹlẹ a marịnghọ m ebe m gha bịa lẹ ebe m shikọ. Kanị ụnụ amarịn ebe m gha bịa mọbụ ebe m shikọ.

¹⁵ Ụnụ a han eṅẹn kẹ ịhịan mmaka. Onwọnni onyẹ m'a hannị eṅẹn.

¹⁶ Ọ sụọdẹn'a nị m han eṅẹn, ezigbo eṅẹn rọ, makẹni ẹlẹ mmẹ sụọ han a, mmẹ lẹ Chuku-Nẹdi hụn zihẹni m han a.

¹⁷ E degụọdẹ w'a imẹ Iwu ụnụ nị ẹri mmadụ ẹbụọ shịa kẹ wẹ gi e dọn.

¹⁸ M rị a shịanị enwẹn m ẹri; Nẹdi m hụn zihẹni m rịzịkwọ a shịanị m ẹri.”

¹⁹ Ya wẹ nọ sị a, “Ebe nẹdi i ahụn rị?” Jesu nọ sị, “Ụnụ amarịn m, ụnụ amarịn Nẹdi m. Omẹni ụnụ te marịn m amarịn, nkẹ ụnụ a marịnzịkwọ Nẹdi m.”

²⁰ Ogẹn Jesu gi ku ihiẹnni, ọ rị ebe w'e buche oyiye imẹ ụlọ-nsọ a kuzi, bụ onwọnni onyẹ saẹka nwụnrụn a makẹni ogẹn ẹ e ke ru.

Ebe Jesu Gha Bịa Lẹ Ebe O Shikọ

²¹ Ya Jizọsị nọzị sị wẹ, “M pụkọ apụkọ; ụnụ jẹnkọ d'a chọ m, kanị ụnụ jẹnkọ d'a nwụntọ imẹ njọ ụnụ. Ụnụ asakọ ẹka bịa ebe m jẹnkọ.”

²² Ndị Ju hụ nọ sị, “Ọ chọdẹ nwan n'o gbu enwẹn ẹ ra? Hụnnị ọ rị a sị, ‘Ụnụ asakọ ẹka bịa ebe m jẹnkọ’?”

²³ Jizọsị nọ sị wẹ, “Ụnụ gha ibe alị bịa, kalẹ m gha elu bịa; ụnụ wụ nke ụwanị, kanị ẹlẹ m nke ụwanị.

²⁴ Ya haịn m gi gwa ụnụ nị ụnụ sikọ d'a nwụntọ imẹ njọ ụnụ. Ụnụ jẹnkọ d'a nwụntọ imẹ njọ ụnụ mmanị ụnụ kweri nị m wụ Onyẹ M Wụ.”

²⁵ Wẹ nọ sị a, “Onyẹ k'ị wụ?” Jesu nọ sị wẹ, “Onyẹ hụ m gwa ụnụ isi mbidọn.

²⁶ M nwọn ihiẹn bu ọda nkẹ m'e ku ma ụnụ ikpe; kanị, onyẹ zihẹni m furu wẹ gi e dọn ẹnya, m'a gwahụ ụwa ihiẹn m nụ ọnụ a.”

²⁷ Kanị aghọtanị wẹ nị Chuku-Nẹdi k'ọ rị e ku.

²⁸ Ya Jizọsị nọ sị, “Ogẹn ụnụ e gi weshi Nwa nke Ịhịan elu kẹ ụnụ k'a marịn nị m wụ Onyẹ M Wụ, nị m'ara gi uche m mẹ ihiẹn ọwụlẹ, kama, m rị a gwa ụnụ ihiẹn ndịnị kẹ Nẹdi m dọn kuzi m.

²⁹ Onyẹ hụ zihẹni m nọyeni m anọyeni; ọ latọnị m, makẹni ogẹn ile kẹ m gi e mẹ ihiẹn a sụọn'a.”

³⁰ Ogẹn o gi rị e ku ihiẹn ndịnị, ndị bu ọda nọ kwerin'ẹ.

Ezioku Jẹnkọ D'e Mẹ Ụnụ Weri Enwẹn Ụnụ

³¹ Ya kẹ Jizọsị nọ sị ndị Ju hụn kwerinin'ẹ, “Omẹni ụnụ e sọnsọnmẹ nkuzi m, ụnụ wụ ndị nsọnmazụụn m nke-esi;

³² ụnụ jẹnkọ d'a marịn ezioku, ezioku a tọpụ ụnụ ẹgbụn-igbọn.”

³³ Wẹ nọ sị a, “Ụmụ Ebraham kẹ ẹnyi wụ; ẹnyi awụtuni igbọn ịhịan. K'ị rị a sịnị, ‘Ụnụ jẹnkọ d'e weri enwẹn ụnụ’?!”

³⁴ Jesu nọ sị wẹ, “Ezioku kẹ m rị a gwa ụnụ, onyẹ hụn e mẹ njọ wụ igbọn njọ.

³⁵ Igbọn ara nwọnsọnmẹ ọnọdị imẹ ezi-lẹ-ụlọ, kanị, nwa e nwọnsọnmẹ ọnọdị imẹ ezi-lẹ-ụlọ.

³⁶ Ya wụ nị Nwa Osolobuẹ tọpụ ụnụ ẹgbụn-igbọn, ụnụ e weri enwẹn ụnụ nke-esi.

³⁷ A marịnghọ m nị ụnụ wụ ụmụ Ebraham, kanị ụnụ rị nwan a chọ nị ụnụ gbu m, makẹni oku m arị a ban ụnụ obi.

³⁸ M rị e ku ihiẹn m hụn ẹka Nẹdi m; kanị ụnụ nwẹn rị e mẹ ihiẹn ụnụ nụ ọnụ nẹdi ụnụ.”

³⁹ Wẹ nọ sị, “Ebraham wụ nẹdi ẹnyi.” Jesu nọ sị wẹ, “Omẹni ụmụ Ebraham kẹ ụnụ wụ, nkẹ ụnụ hụ e mẹ ihiẹn Ebraham mẹ.

⁴⁰ Kanị ụnụ rị nwan a chọ nị ụnụ gbu m, onyẹ hụn gwa ụnụ ezioku ọ nụ ọnụ Osolobuẹ. Ebraham emẹni ẹrịra!

⁴¹ Ihiẹn nẹdi ụnụ e mẹ kẹ ụnụ rịhụ e mẹ.” Ya wẹ nọ sị a, “Ẹnyi ẹlẹ ụmụ ọwụ, Osolobuẹ sụọ wụ Nẹdi ẹnyi.”

⁴² Jizọsị nọ sị wẹ, “Omẹni Osolobuẹ te wụ Nẹdi ụnụ, nkẹ ihiẹn m a sụọ ụnụ, makẹni m gha ẹka Osolobuẹ bịa; ịya mẹ m nwan rị ebeni. Ẹlẹ mmẹ gi ihiẹn ẹka m bịa, ịya zihẹ m.

⁴³ Kị haịn ụnụ gilẹni a ghọta ihiẹn m rị e ku? Ụnụ arị a ghọta makẹni ụnụ ara s'ẹka gọn ntịn oku m.

⁴⁴ “Ụnụ wụ nke Ekwensụ nẹdi ụnụ. Ihiẹn nẹdi ụnụ chọ kẹ ụnụ chọ nwan nị ụnụ mẹ. Izighẹ k'ọ wụ gha isi mbidọn lala; ọ kwadọntuni ezioku — makẹni ezioku arị imẹ ẹ. Ọ gha a tụ ntụ, onwọnni ihiẹn ọ kpọ a, makẹni onyẹ ntụ lẹ nẹdi ntụ k'ọ wụ.

⁴⁵ M rị e ku ezioku haịn ụnụ gilẹni nwan kweri ihiẹn m rị e ku.

⁴⁶ Imẹ ụnụ ile, onyẹ k'a saẹka ghọsị nị m mẹ njọ? Omẹni ezioku ke m rị a gwa ụnụ, kị haịn nwan ụnụ gilẹni kweri ihiẹn m rị e ku?

⁴⁷ Onyẹ wụ nke Osolobuẹ e gi oku Osolobuẹ e dọn. Ụnụ ẹlẹ nke Osolobuẹ haịn ụnụ gilẹni e gi oku Osolobuẹ e dọn.”

Jizọsị Lẹ Ebraham

⁴⁸ Ndị-ndu ndị Ju nọ sị a, “Ẹnyi e kun'ẹ tan n'ị wụ onyẹ Sameria, nị eje-mmọn rị imẹ i?”

⁴⁹ Jesu nọ sị, “Eje-mmọn arị imẹ m; m hụ e ye Nẹdi m ọghọ, ụnụ nwẹn hụ a kpari m.

⁵⁰ Kanị ẹlẹ m rị a chọ onyẹ e ye m ọghọ, makẹni hụn e ye m ọghọ hụ a; ịya k'a han eṅẹn.

⁵¹ Ezioku kẹ m rị a gwa ụnụ, onyẹ mẹ ihiẹn m ku ahụnkọ ọnwụn, kaka.”

⁵² Ya kẹ ndị Ju nọ sị a, “O wegụọ nwan ẹnyi ẹnya nị eje-mmọn rị imẹ i! Ebraham lẹ ndị-amụma a nwụnhụnghọ, kanị ị sị, ‘Onyẹ mẹ ihiẹn m ku ahụnkọ ọnwụn.’

⁵³ Ebraham nẹdi ẹnyi a nwụnhụnghọ, ndị-amụma a nwụnhụnzịghọ; ịyụ kazị wẹ? K'ị rịdẹ nwan a kpọ enwẹn i?”

⁵⁴ Jizọsị nọ sị, “M ye enwẹn m ọghọ, ọghọ hụ la iwi. Nẹdi m wụ hụn e ye m ọghọ, onyẹ nwẹn ụnụ sị ‘Ịya wụ Chuku ẹnyi’,

⁵⁵ bụ ụnụ amarịn a; kalẹ mmẹ nwẹn a marịnghọ a. M sị amarịn m'a, a wụrụ m onyẹ ntụ kẹ ụnụ; kanị a marịnghọ m'a, ihiẹn ọ sị m mẹ kẹ m'e mẹ.

⁵⁶ Ọ rịkẹnmẹkẹ nẹdi ụnụ kanị wụ Ebraham n'ọ hụn ogẹn m; ogẹn o gi hụn a, ẹfọ nọ sụọ a ụsụọ.”

⁵⁷ Ya ndị Ju hụ nọ sị a, “Y'a hụnọlẹ Ebraham bụ y'e ke ru ahụa iri-kwasị-ọgụnnaị?!”

⁵⁸ Jesu nọ sị wẹ, “Ezioku kẹ m rị a gwa ụnụ, m wụ Onyẹ M Wụ nị wẹ d'a mụ Ebraham.”

⁵⁹ Ya wẹ nọ tụtụrụ ọmụma nị wẹ magbu ẹ, kanị Jesu nọ gi nzuzue, gha imẹ Ụlọ-nsọ gepụ.