Jọnụ 7 - Ika

Isi Nke Ẹsa Kẹ Umunẹ Jesu Kelẹni Kwerin'ẹ

¹ Omẹgụ, Jesu nọ jẹnhunmẹmẹ imẹ Galili. Ọ chọnị n'o jẹn Judia, makẹni ndị-ndu ndị Ju rị a chọ nị wẹ gbu ẹ.

² Ogẹn hụ, mmẹmmẹ ndị Ju gi a nọdịsọnmẹ imẹ Ọdụ w'a kpụkpọrị e rugụọ.

³ Ya umunẹ Jesu ikẹnnyẹ nọ sị a, “Y'e shikọ Judia kẹni ndị nsọnmazụụn ị hụn ọrụn-atụmẹnya ndị ị rị a rụn?!

⁴ Onwọnkwọnị onyẹ e zueri a rụn ọrụn omẹni ọ chọ nị wẹ marịn a. Ebe ị rị a rụn ihiẹn ndịnị ile, we nwan enwẹn i ghọsị ụwa.”

⁵ Umunẹ ẹ ku ihiẹnni makẹni wẹ nwẹn ekweridẹnin'ẹ.

⁶ Ya Jizọsị nọ sị wẹ, “Ogẹn m eke ru, kanị ogẹn ile hụ ụnụ mma.

⁷ Ize ụnụ ezekọ ụwa, kanị ize m rị e ze wẹ, makẹlẹ m rị e ku ẹ nị wẹ rị e mẹ eje-ihiẹn.

⁸ Jẹnmẹ ni nwan mmẹmmẹ, mmẹ nwẹn ejẹnkọ hụnnị, nị ogẹn m eke ru.”

⁹ O kugụ ihiẹnni, ọ nọ nọdị imẹ Galili.

Ihiẹn Jesu Mẹ Ogẹn Mmẹmmẹ-ọdụ

¹⁰ Kanị ogẹn umunẹ Jesu gi jẹnmẹgụ mmẹmmẹ hụ, ya nwẹn nọ nwan jẹnmẹ, kanị o zue nzuzue jẹn.

¹¹ Ndị-ndu ndị Ju hụ a chọ a imẹ mmẹmmẹ hụ, a jụ, “Elebe kẹ okẹnnyẹ hụ rị?”

¹² Ndị bịa mmẹmmẹ hụ a ka murinmurin ọda-ọda banyen'ẹ: ụfọdụ sị, “Ezigbo ịhịan rọ,” ụfọdụ sị, “Mba, ọ rịhụ e dufie ndị alị.”

¹³ Kanị onwọnni onyẹ egun ndị-ndu ndị Ju nị kushi ẹ elu.

¹⁴ Mmẹmmẹ hụ e ru nwan ahanmahan, Jizọsị nọ shi Ụlọ-nsọ d'a kuzimẹ.

¹⁵ Nkuzi ẹ hụ a tụ ndị-ndu ndị Ju ẹnya, wẹ hụ a sị, “Nanị okẹnnyẹni dọn marịn ihiẹn ẹnịna, bụ o jẹntuni ọzụnzụn?”

¹⁶ Jesu nọ sị wẹ, “Nkuzi m ẹlẹ nke m, nke onyẹ zini m rọ.

¹⁷ Onyẹ kwademẹ obi ẹ n'o k'e mẹ uche Osolobuẹ ọ marịn kẹ nkuzi m gha ẹka Osolobuẹ bịa ra uche m kẹ m rị e ku.

¹⁸ Onyẹ gi ikẹn ẹ e ku rị a chọ nị wẹ ja a mma; kanị onyẹ rị e mẹ nị wẹ ye onyẹ zin'ẹ ọghọ wụ onyẹ ezioku, ntụ arị imẹ ẹ.

¹⁹ “Mozizi e yegụọnị ụnụ Iwu? Kanị onwọnni akpụ onyẹ ohu e dọnmẹ Iwu hụ imẹ ụnụ. Kị ụnụ rị a chọnị nị ụnụ gbu m?”

²⁰ Igunrun hụ nọ shịarị a, “Eje-mmọn rị imẹ i! Onyẹ rị a chọ n'o gbu i?”

²¹ Jesu nọ sị wẹ, “Akpụ ihiẹn ohu m rụn kẹ ụnụ ile rị e mẹni ẹnịna nọkẹ sị ahụnlele rọ.

²² Ụnụ nwẹn a kwadẹ okẹnnyẹ ugun Ụhụọhịn Ezumikẹn kẹni ụnụ dọnmẹ iwu ịkwa-ugun hụn Mozizi ye ụnụ. (Mozizi ye ụnụ ya, kanị ẹlẹ ni ịya bidọn ịkwa-ugun, ndị nẹdi ụnụ ibuzọ bidọn ẹ.)

²³ Omẹni wẹ hụ a kwa okẹnnyẹ ugun mmaka Ụhụọhịn Ezumikẹn amamgbe w'a dan Iwu Mozizi, kị haịn ụnụ gi e weni m iwe nị m zụọchanrịn ẹhụ okẹnnyẹni Ụhụọhịn Ezumikẹn?

²⁴ Ahanzilẹni eṅẹn elu-elu, ka han nị eṅẹn ọhụnma.”

Onyẹ Kẹ Jesu Wụ?

²⁵ Ya kẹ ụfọdụ ndị Jerusalẹm nọ sị, “Ẹlẹ ọnwan wụ okẹnnyẹ hụ wẹ rị a chọ nị wẹ gbu?

²⁶ Lee ẹ nwan k'ọ rị e ku oku idẹnya ịhịan ile, a gba w'a nkịtịn! Ra ndị-isi a marịngụọdẹ nị ya wụ Kraịstị?

²⁷ Bụ ẹnyi a marịnghọ ebe okẹnnyẹni gha bịa, kanị Kraịstị bịa, onwọnni onyẹ jẹnkọ d'a marịn ebe ọ gha bịa.”

²⁸ Ogẹn Jesu gi rị a kuzi imẹ Ụlọ-nsọ, ọ nọ weshi olu elu, sị, “Eziẹ, ụnụ a marịngụọ kẹ mmẹ kẹ ebe m gha bịa, ẹlẹ ya?! Kanị ẹlẹ mmẹ zihẹ enwẹn m; onyẹ hụn zihẹni m furu w'e gi dọn ẹnya — ịya kẹ ụnụ marịnlẹni!

²⁹ Mmẹ nwẹn a marịnghọ a makẹni ebe ọ rị kẹ m gha bịa; ịya zihẹ m.”

³⁰ Ya kẹ wẹ nọ mẹmẹ nị wẹ nwụnrụn a, kanị onwọnni onyẹ saẹka mẹtụ a ẹka makẹni ogẹn ẹ eke ru.

³¹ K'osilẹrị, ndị bu ọda rị ebẹhụ kwerinin'ẹ — wẹ sị, “Elee ọrụn-atụmẹnya nkẹ Kraịstị a rụn ọ bịa hụn ka hụn okẹnnyẹni rị a rụn?”

E Zi Wẹ Ndị-ụlakpa Ụlọ-nsọ D'a Nwụnhan Jesu

³² Ndị itu-Farisi a nụ kẹ igunrun hụ rị e ku ihiẹn ndịnị banyeni Jizọsị, ya ndị-isi nchụn-ẹjan lẹ ndị Itu-Farisi nọ zi ndị ụlakpa Ụlọ-nsọ d'a nwụnhan a.

³³ Jizọsị nọ sị ndị ọ rị a gwa oku, “Mmẹ lẹ ụnụ nọdịzịhụ ẹkẹrẹ, a laburu m onyẹ zihẹni m;

³⁴ ụnụ jẹnkọ d'a chọ m, kanị, ụnụ ahụnkọ m; ebe m rị, ụnụ as'ẹka bịa.”

³⁵ Ya ndị Ju nọ sị ibe wẹ, “Elebe kẹ okẹnnyẹni chọ n'o jẹn, hụn ẹnyi jẹnkọlẹni d'a hụn a? Onyẹ ma k'o jẹnkọ ebe ndị nke ẹnyi bi alị ndị ọzọ rị kẹni o d'a kuzi ndị alị ọzọ?

³⁶ K'ọ rị a sịnị, ‘Ụnụ sikọ d'a chọ m, ụnụ ahụnkọ m; ebe m rị, ụnụ asakọ ẹka bịa’?”

Mirin Hụn E Ye Ndụn

³⁷ Ụhụọhịn ikpanzụụn mmẹmmẹ hụ, hụn wụ ụhụọhịn kachanrịn mkpa, Jesu nọ wuzo ọtọ, yi, “Onyẹ ẹgụn mirin rị a gụn, ya bịa d'e kunrun m n'ọ ra!

³⁸ Onyẹ kwerini m, ọ rịn'a kẹ Ẹkụkwọ-nsọ dọn ku: ‘Mirin hụn e ye ndụn k'a gha imẹ ẹ e hupụha kẹ iyi.’ ”

³⁹ Jizọsị gi ẹ e ku oku Mmọn-nsọ hụn ndị kwerinin'ẹ jẹnkọ d'e nwọnhẹn. Wẹ eke ye wẹ Mmọn-nsọ ogẹn hụ makẹni Jesu eke nwụnhụn lihi nwọnrin ọghọ a.

Kẹ Igunrun Rị E Gọn Jesu Ntịn Dọn Kebe

⁴⁰ Ogẹn wẹ gi nụ oku ndịnị, ụfọdụ imẹ igunrun hụ nọ sị, “Ezioku, ọnwan wụ Onyẹ-amụma ahụn pụ-ichẹn.”

⁴¹ Ndị ọzọ sị, “Ọnwan wụ Kraịstị, Onyẹ Nzụọpụha ahụn Osolobuẹ tumẹ!” Kanị o nwọnzighọ ndị sị, “Kraịstị k'a wụdẹ nwan onyẹ Galili ra?!

⁴² Ẹkụkwọ-nsọ e kugụọn'a nị Kraịstị k'a wụ onyẹ ebọn Defidi, n'o sikọ d'a wụ onyẹ Bẹtilẹhẹm, obodo Defidi?”

⁴³ Oku onyẹ Jizọsị wụ nọ kebe igunrun ahụn.

⁴⁴ Ụfọdụ te chọ nị wẹ nwụnrụn a, kanị onwọnni onyẹ saẹka mẹtụ a ẹka.

Ndị-isi A Jụ N'e Kwerikọnị Wẹ Jesu

⁴⁵ Ogẹn ndị-ụlakpa Ụlọ-nsọ ahụn ndị-isi nchụn-ẹjan lẹ ndị Itu-Farisi zi d'a nwụnhan Jizọsị gi nwan kinhẹn, wẹ nọ jụma wẹ, “Kị haịn ụnụ gilẹni wẹhẹ okẹnnyẹ hụ?”

⁴⁶ Ndị ụlakpa Ụlọ-nsọ hụ nọ sị, “Onwọnni onyẹ kutu oku kẹ okẹnnyẹ hụ!”

⁴⁷ Ndị Itu-Farisi nọ sị, “E dufiegụọzịdẹ wẹ ụnụ nwẹn ra?

⁴⁸ Elee onyẹ-ndu mọbụ onyẹ Itu-Farisi kẹ ụnụ hụn kwerinin'ẹ?

⁴⁹ O mẹ nke igunrunni, amarịn wẹ Iwu Mozizi, ndị wẹ bụ ọnụ kẹ wẹ wụ.”

⁵⁰ Ya kẹ Nikodimọsụ hụn jẹn d'a hụn Jesu mbụ, hụn wụ onyẹ ohu imẹ wẹ, nọ sị wẹ,

⁵¹ “Iwu ẹnyi a madẹ nwan ịhịan ikpe ebe wẹ kelẹni nụ ọnụ a marịn ihiẹn o mẹ ra?”

⁵² Wẹ nọ shịarị a, sị, “Yụ nwẹn wụdẹ nwan onyẹ Galili ra? D'a mụ Ẹkụkwọ-nsọ n'ị marịn nị onwọnni onyẹ-amụma wụ onyẹ Galili.”

⁵³ Ya kẹ onyẹ ọwụlẹ nọ la iwe ẹ.