Jọnụ 6 - Ika

Isi Nke Isin Jesu E Ye Mmadụ Nnụ-uku Isẹn Ihiẹn-oriri

¹ Ọhụn e mẹgụ, Jizọsị nọ fetu Ohimin Galili hụn wụzị Ohimin Taịberiasị.

² Igunrun hi-ogbe hụ e sọn ẹ, makẹni wẹ hụn ọrụn-atụmẹnya ndị ọ rị a rụnnị ndị emu rị a kụ.

³ Jizọsị nọ shi elu ugu, ya lẹ ndị nsọnmazụụn a nọ nọdị alị ebẹhụ.

⁴ Ogẹnni, Mmẹmmẹ-nghafe ndị Ju e rumẹgụọ.

⁵ Jizọsị e weshi ẹnya elu, hụn igunrun ịhịan lala d'e kunrun ẹ. Ọ nọ sị Filipu, “Elebe kẹ ẹnyi a nọ ṅọn brẹdi kẹni ndịnị ri?”

⁶ O gi ẹ hụ lele Filipu, ya nwẹn a marịngụọlẹ ihiẹn o jẹnkọ d'e mẹ.

⁷ Filipu nọ za a, sị, “Egho ọrụn akpọhịn ọgụn iri ezukọdẹ ṅọn brẹdi k'e ru wẹ ile ẹka, ọsụọn'a nị wẹ ri ẹkẹrẹ-ẹkẹrẹ sụọ!”

⁸ Onyẹ ohu imẹ ndị nsọnmazụụn Jesu w'a kpọ Andrụ, nwẹnẹ Saịmọnụ Pita, nọ sị a,

⁹ “O nwọn nwata bu ogbe brẹdi isẹn wẹ gi ọka bali mẹmẹ lẹ azụn ẹbụọ ebeni; kalẹ, ebe ọhụn sikọ d'a pụ igunrunni?!”

¹⁰ Jizọsị nọ sị, “Gwa nị wẹ nọdị alị.” Irurue rị ebẹhụ ọda. Ya ndị hụ nọ nọdị alị. Ikẹnnyẹ rị imẹ wẹ wụ ihiẹn nọ kẹ nnụ-uku isẹn.

¹¹ Ya kẹ Jesu nọ weri brẹdi ndị hụ, ọ kpanmịngụ Osolobuẹ, ọ nọ keni ndị hụ nọdị alị ya; ọ nọ mẹzi azụn ndị ahụn ẹrịra, wẹ nọ ri kẹ wẹ chọ.

¹² E rijungụ wẹ ẹfọ, Jesu nọ sị ndị nsọnmazụụn a, “Kpọnkwama nị ifunfun ẹ, makẹ hụn ọwụlẹ gha a la iwi.”

¹³ Ya wẹ nọ kpọnkwama wẹ, ifunfun ẹ họdụ imẹ ogbe brẹdi bali isẹn hụ wẹ ri jun ụkpalị mmẹbụọ!

¹⁴ Ogẹn ndị ahụn gi hụn ọrụn-atụmẹnya Jizọsị rụn, wẹ nọ sị, “Ezioku-ezioku, ọnwan wụ onyẹ-amụma hụ Ẹkụkwọ-nsọ sị n'ọ lala imẹ ụwa!”

¹⁵ Jesu a hụn a nị w'e d'a bịa d'e gi ikẹn weri ẹ d'e kin eze, ọ nọ pụzị, ya sụọ nọ shi elu-ugu.

Jesu E Jẹn Ijẹn Elu Mirin

¹⁶ O ru ẹnyasị, ndị nsọnmazụụn Jesu nọ shi Ohimin Galili,

¹⁷ banye imẹ ụgbọ-mirin, buli, jẹnkọ Kapanọm. Ọhịhị a gbagụ, Jesu eke bịa d'e kunrun wẹ.

¹⁸ Ohimin hụ e mẹhunmẹ ọda-ọda yeni okẹn ufere rị a kpọnị.

¹⁹ A nyanpụ wẹ ihiẹn rịkẹ maịlị ẹtọ mọbụ ẹnọ, wẹ nọ hụn Jesu k'o jẹnla ijẹn elu mirin, a nọkunmẹ ụgbọ hụ. Egun nọ tụma wẹ.

²⁰ Kanị ọ nọ sị wẹ, “Mmẹ rọ! Atụlẹ ni egun!”

²¹ Wẹ te nọ chọ n'ọ banyeni wẹ imẹ ụgbọ; kanị ozigbo, ụgbọ hụ nọ ru mkpẹnrẹn mirin alị hụ wẹ jẹnkọ.

Igunrun Hụ Jizọsị Ye Ihiẹn-oriri A Chọmazị A

²² Eki e fọn, ọ nọ we igunrun hụ wẹ latọ nfetu ohimin ẹnya nị ụgbọ ohu sụọ te rị ebẹhụ bụ Jesu esọnni ndị nsọnmazụụn a banye ẹ, ndị nsọnmazụụn a sụọ wị pụ.

²³ Kanị ogẹnni, ụgbọ ndị ọzọ gha Taịberiasị bịa rị nwan ẹhụ ebahụn wẹ nọ ri brẹdi ogẹn Di-nwọnni-ẹnyi gi kpanmịngụ Osolobuẹ yeni brẹdi hụ.

²⁴ Ogẹn igunrun hụ gi nwan ghọta nị kẹ Jesu kẹ ndị nsọnmazụụn a arịzị ebahụn, wẹ lẹ enwẹn wẹ nọ banye ụgbọ ndị hụ gha Taịberiasị bịa chọshi Jesu Kapanọm.

Jesu Wụ Ihiẹn-oriri Ahụn E Ye Ndụn

²⁵ Ogẹn wẹ gi hụn Jesu nfetu “ohimin” hụ, wẹ nọ sị a, “Onyẹ-nkuzi, ele ogẹn k'i gizi ru ebeni?!”

²⁶ Jesu nọ sị wẹ, “Ezioku kẹ m rị a gwa ụnụ, brẹdi ụnụ ri rijun ẹfọ haịn ụnụ gi a chọ m, ẹlẹ ọrụn-atụmẹnya ndị ahụn ụnụ hụn.

²⁷ Egizilẹ ni ufiri ihiẹn-oriri e wiwini a rụngbu enwẹn ụnụ, kanị ihiẹn-oriri hụn sikọ d'a rị jẹnrin ejẹn, e ye ndụn itẹbitẹ, ihiẹn-oriri ahụn Nwa nke Ịhịan jẹnkọ d'e ye ụnụ, makẹni Nwa nke Ịhịan kẹ Chuku-Nẹdi tumẹ.”

²⁸ Wẹ nọ nwan sị a, “Kị ẹnyi jẹnkọ d'a rụn hụn wụ ọrụn Osolobuẹ?”

²⁹ Jesu nọ sị wẹ, “Ọnwan wụ ọrụn Osolobuẹ: ikwerini onyẹ hụn o zihẹ.”

³⁰ Wẹ nọ sị a, “Elee ọrụn-atụmẹnya k'i jẹnkọ nwan d'a rụnghọsị ẹnyi nị ẹnyi hụn a kweri ihiẹn i ku? K'ị jẹnkọ d'e mẹ?

³¹ Ndị nẹdi ẹnyi kanị ri mana imẹ atụ; ya kẹ wẹ de imẹ Ẹkụkwọ-nsọ, sị, ‘O ye wẹ brẹdi gha elu-igwee bịa ri.’ ”

³² Ya kẹ Jizọsị nọ sị wẹ, “Ezioku kẹ m rị a gwa ụnụ, ẹlẹ Mozizi ye ụnụ brẹdi gha elu-igwee bịa; Nẹdi m rị e ye ụnụ ezigbo brẹdi hụ gha elu-igwee bịa.

³³ Makẹni brẹdi Osolobuẹ wụ onyẹ hụ gha elu-igwee bịa, hụn rị e ye ụwa ndụn.”

³⁴ Wẹ nọ sị a, “Diọkpa, yemẹ nwan ẹnyi brẹdini ogẹn ile.”

³⁵ Jizọsị nọ sị wẹ, “Mmẹ wụ brẹdi hụn e ye ndụn. Onyẹ bịa d'e kunrunni m, ẹgụn agụnkọ a; onyẹ kwerinini m, ẹgụn mirin agụnkọ a.

³⁶ Kanị, a gwagụọ m ụnụ ya mbụ nị ụnụ a hụngụọ m, kanị ụnụ ekwerini.

Uche Osolobuẹ Kẹ Jesu Bịa D'e Mẹ

³⁷ “Ndị ile Nẹdi m ye m sikọ d'a bịa d'e kunrun m; achụpụkọ m onyẹ ọwụlẹ bịa d'e kunrunni m

³⁸ Makẹni, aghanị m elu-igwee bịa d'e mẹ uche m, kanị uche onyẹ hụn zihẹni m.

³⁹ Ọnwan wụ uche onyẹ zihẹni m: nị onwọnni akpụ onyẹ ohu o ye m jẹnkọ d'e hunahịnnị m, kama, nị m k'a gha ọnwụn weli wẹ Ụhụọhịn ikpanzụụn;

⁴⁰ uche Nẹdi m wụ nị onyẹ hụn Nwa, kwerin'ẹ, jẹnkọ d'e nwọn ndụn itẹbitẹ; m sikọ d'e weli ẹ Ụhụọhịn ikpanzụụn.”

⁴¹ Ya kẹ ndị Ju ahụn nọ dẹnnwịnnwịnman'a, makẹni ọ sị, “Mmẹ wụ brẹdi hụ gha elu-igwee bịa.”

⁴² Wẹ hụ a sị, “Ẹlẹ Jesu nwa Josẹfụ wụ ọnwan, hụn ẹnyi marịn ndị mụn'a? Nanị o dọn nwan a sị, ‘M gha elu-igwee bịa?’ ”

⁴³ Jizọsị nọ shịarị wẹ, sị, “Edẹnnwịnnwịnzịlẹ ni.

⁴⁴ Onwọnni onyẹ k'a s'ẹka bịa d'e kunrun m mmanị Chuku-Nẹdi zihẹni m dọha a; m k'e weli hụnyẹ Ụhụọhịn ikpanzụụn.

⁴⁵ Wẹ de ẹ imẹ Ẹkụkwọ ndị-amụma nị, ‘Osolobuẹ sikọ d'a kuzi wẹ ile.’ Onyẹ hụn e gọn Chuku-Nẹdi ntịn, a mụnarịn a, jẹnkọ d'a bịa d'e kunrun m.

⁴⁶ Ẹlẹ n'o nwọn onyẹ hụntu Chuku-Nẹdi wezụka onyẹ ahụn gha ebe ọ rị bịa; ịya sụọ hụntu Chuku-Nẹdi.

⁴⁷ Ezioku kẹ m rị a gwa ụnụ, onyẹ ọwụlẹ kwerini e nwọngụọ ndụn itẹbitẹ.

⁴⁸ “Mmẹ wụ brẹdi hụn e ye ndụn.

⁴⁹ Ndị nẹdi ụnụ kanị ri mana hụ wẹ ri imẹ atụ, kanị, a nwụnhụnghọ wẹ.

⁵⁰ Kanị hụnnị m rị e ku wụ brẹdi hụn gha elu-igwee bịa, hụn onyẹ rin'ẹ ghalẹni a nwụn.

⁵¹ Mmẹ wụ brẹdi hụ rị ndụn hụn gha elu-igwee bịa. Onyẹ hụn ri brẹdini jẹnkọ d'a rị ndụn jẹnrin ejẹn. Ẹhụ m wụ brẹdi hụ m jẹnkọ d'e ye kẹni ndị rị ụwa rị ndụn.”

⁵² Ya kẹ ndị Ju ahụn lẹ ibe wẹ nọ dọma, “Nanị okẹnnyẹni e dọn ye ẹnyi ẹhụ a ri?”

⁵³ Ya kẹ Jizọsị nọ sị wẹ, “Ezioku kẹ m rị a gwa ụnụ, mmanị ụnụ ri ẹhụ Nwa nke Ịhịan, ra ẹdeke ẹ, ụnụ enwọnkọ ndụn imẹ ụnụ.

⁵⁴ Onyẹ hụn ri ẹhụ m, ra ẹdeke m, e nwọngụọ ndụn itẹbitẹ; m sikọ d'e weli ẹ Ụhụọhịn ikpanzụụn.

⁵⁵ Makẹni, ẹhụ m wụ ihiẹn-oriri nke-esi, ẹdeke m wụ ihiẹn-ọrịra nke-esi.

⁵⁶ Onyẹ ri ẹhụ m, ra ẹdeke m, k'a rịsọnmẹ imẹ m, mmẹ lẹ enwẹn m a rịsọnmẹ imẹ ẹ.

⁵⁷ “Kẹ m dọn rị ndụn makẹni Chuku-Nẹdi zihẹni m rị ndụn, ẹrịra kẹ onyẹ hụn rini m k'a dọn rị ndụn makẹni m rị ndụn.

⁵⁸ Ọnwan wụ brẹdi gha elu-igwee bịa; ọ nọnị kẹ hụn ndị nẹdi ụnụ kanị ri, kanị a nwụnhụnkwọ wẹ. Onyẹ ri brẹdini, o jẹnkọ d'a rị ndụn jẹnrin ejẹn.”

⁵⁹ Ebe Jesu rị a kuzi imẹ ụlọ-ofufe ndị Ju rị Kapanọm k'ọ nọ ku ihiẹn ndịnị.

Oku Hụn E Ye Ndụn Itẹbitẹ

⁶⁰ Ndị nsọnmazụụn a bu ọda a nụ ihiẹnni, wẹ nọ sị, “Okuni e zekẹkwọ-o! Onyẹ sikọ d'a saẹka mẹ ẹ?!”

⁶¹ Jizọsị a marịngụọ nị ndị nsọnmazụụn a rị e dẹnnwịnnwịn makẹni o ku ihiẹnni. Ọ nọ sị wẹ, “Ọnwan k'e mẹdẹ nwan ụnụ kweribehi ra?

⁶² Kị ụnụ k'e mẹzi nwan ụnụ hụn Nwa nke Ịhịan k'ọ lakọ elu-igwee ọ rị mbụ?

⁶³ Mmọn-nsọ sụọ e ye ndụn, ịhịan mmaka asaẹka mẹ ihiẹn-anaị: oku ndịnị m rị a gwa ụnụ wụ oku imẹ-mmọn lẹ oku e ye ndụn.

⁶⁴ Kanị ẹlẹ ụnụ ile kweri.” Gha mbidọn lala, Jesu a marịngụọ ndị kwerilẹni lẹ onyẹ hụn jẹnkọ d'e ren'ẹ.

⁶⁵ Ọ nọ sịzị, “Ọnwan haịn m gi sị ụnụ n'o nwọnni onyẹ jẹnkọ d'a saẹka bịa d'e kunrun m mmanị Chuku-Nẹdi mẹ ẹ bịa.”

⁶⁶ Gha ogẹnni jẹnmẹ, ndị bu ọda imẹ ndị e sọnn'ẹ nọ kin azụụn, esọnzini w'ẹ ghahunmẹ.

⁶⁷ Ya Jizọsị nọ sị ndị nsọnmazụụn a mmẹbụọ hụ, “Ụnụ nwẹn sikọ d'a pụzị?”

⁶⁸ Saịmọnụ wụ Pita nọ za a, sị, “Di-nwọnni-ẹnyi, onyẹ kẹ ẹnyi burukọ? Ịyụ e ku oku ndị e ye ndụn itẹbitẹ.

⁶⁹ Ẹnyi e kwerighọ, marịnzịkwọ, nị ịyụ wụ Onyẹ-nsọ Osolobuẹ.”

⁷⁰ Jizọsị nọ sị wẹ, “Ẹlẹ mmẹ họrị ụnụ mmẹbụọ? Kanị onyẹ ohu imẹ ụnụ wụ Ekwensụ!”

⁷¹ Judasị nwa Saịmọnụ Iskarọtụ k'ọ rị e ku, makẹni ịya jẹnkọ d'e re ẹ, ọsụọn'a n'ọ wụ onyẹ ohu imẹ ndị nsọnmazụụn a mmẹbụọ.