Jọnụ 5 - Ika

Isi Nke Isẹn Jesu A Zụọ Onyẹ Nwọnlẹni Onyẹ E Yen'ẹ Ẹka

¹ Omẹgụ, Jesu nọ shizi Jerusalẹm makẹni o nwọn mmẹmmẹ ndị Ju rịnị.

² Imẹ Jerusalẹm, ọ nwọn ọgọdọ wẹ rụnye ẹhụ Ọnụ-mgbọn Atụnrụn. W'a kpọ ọgọdọ hụ Bẹtẹsida ọnụ Hibru. O nwọn ẹworo isẹn wẹ kpu elu wẹ.

³ Ndị bu ọda emu rị a kụ e dinẹsọnmẹ ẹworo ndị hụ: kẹ ndị ẹnya-ishi kẹ ndị ngụrọ kẹ ndị ọrọ kinmin, e che ni wẹ mẹhunmẹ mirin ọgọdọ hụ.

⁴ Makẹni, mmọn-ozi Di-nwọnni-ẹnyi a bịa mbụ-lẹ-ẹbụọ d'e mẹhunmẹ mirin hụ. O mẹhunmẹgụ a, onyẹ bu ụzọ banye a dịnhịn emu ọwụlẹ rị a kụn'a.

⁵ O nwọn onyẹ ohu dinẹ ebẹhụ emu rị a kụ kete ahụa ẹbụọ-arịa-ọgụnnaị.

⁶ Ogẹn Jizọsị gi hụn a, marịn n'o tegụọ emu hụ kụma a, ọ nọ sị a, “Y'a chọghọ n'ị dịnhịn?”

⁷ Okẹnnyẹ hụ emu rị a kụ nọ sị, “Diọkpa, enwọn m onyẹ e bu m e che imẹ mirinni wẹ mẹhunmẹ ẹ; m chọ nị m banye, onyẹ ọzọ e bu m ụzọ banye.”

⁸ Jizọsị nọ sị a, “Lihi ọtọ! Heri ute i jẹnmẹ ijẹn!”

⁹ Ozigbo, okẹnnyẹ ahụn nọ dịnhịn, heri ute ẹ, jẹnmẹ ijẹn. Ụhụọhịn Ezumikẹn kẹ ihiẹnni mẹ.

¹⁰ Ya kẹ ndị-ndu ndị Ju nọ sị okẹnnyẹ hụ Jizọsị zụọ, “Tannị wụ Ụhụọhịn Ezumikẹn, o furuni nị y'e bu ute i. Iwu gi i.”

¹¹ Ọ nọ shịarị wẹ, sị, “Onyẹ hụn zụọnị m sị m, ‘Heri ute i jẹnmẹ ijẹn.’ ”

¹² Wẹ nọ jụma a, “Onyẹ wụ onyẹ hụ sị ị heri ute i jẹnmẹ ijẹn?”

¹³ Kanị okẹnnyẹ hụ Jizọsị zụọ amarịn onyẹ ọ wụ, makẹni Jizọsị a rụbangụọ imẹ igunrun rị ebahụn.

¹⁴ Omẹgụ, Jizọsị a hụn a imẹ Ụlọ-nsọ. Ọ nọ sị a, “Lee ẹnya: Y'a rịgụọ mma! Mẹbehi nwan njọ amamgbe ihiẹn ka ọhụn gha e mẹ i.”

¹⁵ Okẹnnyẹ ahụn nọ jẹn d'a gwa ndị-ndu ndị Ju nị Jesu wụ onyẹ hụ zụọn'a.

¹⁶ Ya kẹ ndị-ndu ndị Ju nọ kpokpomẹ Jesu o gi mẹ ihiẹnni Ụhụọhịn Ezumikẹn.

¹⁷ Kanị Jizọsị nọ sị wẹ, “Echẹn kẹ Nẹdi m rị a rụn, mmẹ nwẹn hụkwọ a rụn.”

Jizọsị lẹ Osolobuẹ Han

¹⁸ Ufiri ihiẹnni o ku, ndị-ndu ndị Ju nọ sị nị wẹ k'e gburịrị a. Makẹlẹ, ẹlẹ n'ọ dan iwu Ezumikẹn sụọ, kanị, ọ kpọzịkwọ Osolobuẹ Nẹdi ẹ, ya wụ nị ya lẹ Osolobuẹ han.

Ikẹn Jesu

¹⁹ Jizọsị nọ sị wẹ, “Ezioku kẹ m rị a gwa ụnụ, Nwa asaẹka gi uche ẹ mẹ ihiẹn ọwụlẹ — mmanị ihiẹn ọ hụn Chuku-Nẹdi rị e mẹ; makẹni ihiẹn Chuku-Nẹdi mẹ kẹ Nwa a nkẹ e mẹ.

²⁰ Makẹni ihiẹn Nwa a a sụọ Chuku-Nẹdi, o ye Nwa a ikẹn a rụn ihiẹn ile Nwa a rị a rụn. O k'e yedẹ ẹ ikẹn rụn hụn ka ndịnị, kẹni ọ tụ ụnụ ẹnya.

²¹ Eziẹ, kẹ Chuku-Nẹdi dọn e weli onyẹ nwụnhụnnị e we ndụn e ye ẹ, ẹrịra kẹ Nwa a dọnzi e we ndụn e ye ndị ọ chọ n'o ye.

²² Onwọnni onyẹ Chuku-Nẹdi e kin ikpe, kama, o bugụọ ikpe ile che Nwa a ẹka kin,

²³ kẹni ịhịan ile gbaye Nwa a kẹ wẹ dọn a gbaye Chuku-Nẹdi. Onyẹ gbayelẹni Nwa a agbayeni Chuku-Nẹdi zihẹn'ẹ.

²⁴ “M rị a gwa ụnụ ezioku, nị onyẹ nụ oku m kweyeni onyẹ zihẹni m, hụnyẹ e nwọngụọ ndụn itẹbitẹ. Amakọ w'a ikpe, kama, ọ ghagụọdẹ ọnwụn banye ndụn.

²⁵ “Ezioku kẹ m rị a gwa ụnụ, ogẹn lala — o rụgụọdẹ nwan — ogẹn ndị nwụnnị k'e gi nụ olu Nwa Osolobuẹ, ndị nụn'a a rị ndụn.

²⁶ Kẹ Chuku-Nẹdi dọn nwọn ndụn imẹ enwẹn ẹ, ẹrịra k'o dọnzikwọ ye Nwa ikẹn o gi e nwọn ndụn imẹ enwẹn ẹ.

²⁷ O yegụọzị Nwa a ikẹn o gi kin ịhịan ile ikpe makẹni ịya wụ Nwa nke Ịhịan.

²⁸ Anịlẹ ni ọnwan tụ ụnụ ẹnya, makẹni ogẹn lala hụn ndị ile rị imẹ ili jẹnkọ d'e gi nụ olu ẹ,

²⁹ a pụha wẹ — ndị mẹ mma e lihi banye ndụn itẹbitẹ; ndị mẹ njọ e lihi narịn ikpe-ọmụma.

Ndị A Shịanị Jesu Ẹri

³⁰ “Asa m ẹka gi ikẹn m mẹ ihiẹn ọwụlẹ. M hụ a nụ ihiẹn Osolobuẹ rị a gwa m, e gi ẹ a han eṅẹn; ya wụ, ezigbo eṅẹn kẹ m'a han, makẹni arị m e mẹ uche m, kalẹ uche onyẹ zihẹni m.

³¹ M shịanị enwẹn m ẹri, ẹri m ẹlẹ hụn w'e gi dọn.

³² O nwọnzighọ onyẹ a shịanị m ẹri. A marịnghọ m nị ẹri ọ shịanị m wụ ezioku.

³³ Ụnụ e zigụọ wẹ d'a jụ Jọnụ. Ọ gwagụọ ụnụ ezioku.

³⁴ Ẹlẹ ni m chọ ẹri ịhịan, kanị m rị e ku ihiẹnni kẹni ụnụ nwọn nzụọpụha.

³⁵ Jọnụ te rị a dụn, e nwun kẹ ukpẹ; ụnụ a ghọghọghọ nị ukpẹ ẹ ẹkẹrẹ ogẹn.

³⁶ “Kanị m nwọn ẹri hụn ka hụn Jọnụ shịanị m. Ọrụn ndị hụn Nẹdi m ye m rụn, ya wụ ọrụn ndịnị m rị a rụn, wẹ rị a shịanị m ẹri nị Chuku-Nẹdi zihẹ m.

³⁷ “Chuku-Nẹdi lẹ enwẹn ẹ hụn zihẹni m a shịagụọnị m ẹri. Ụnụ anụtuni olu ẹ; ụnụ ahụntuni k'ọ nọ;

³⁸ oku ẹ arị imẹ ndụn ụnụ, makẹni ụnụ ekwerinini onyẹ o zihẹ.

³⁹ “Ụnụ a mụ Ẹkụkwọ-nsọ a mụshi ẹ ikẹn, makẹni ụnụ ro ni imẹ ẹ kẹ ụnụ a gha nwọn ndụn-itẹbitẹ; bụ Ẹkụkwọ-nsọ hụ rị a shịanị m ẹri,

⁴⁰ kanị ụnụ achọnị nwan nị ụnụ bịa d'e kunrun m kẹni ụnụ nwọnrin ndụn.

⁴¹ M'a ra narịn ọjịja-mma ịhịan;

⁴² kanị a marịnghọ m ndị ụnụ wụ, nị ihiẹn Osolobuẹ ara sụọ ụnụ.

⁴³ M gi nwan ẹfan Nẹdi m bịa, ụnụ anabanhannị m, kanị onyẹ ọzọ gi ẹfan enwẹn ẹ bịa, ụnụ a nabanhan a.

⁴⁴ Nanị nkẹ ụnụ a dọndẹ nwan kweri? Ụnụ hụn a narịn ọjịja-mma ẹka ibe ụnụ, kanị ụnụ ara lịlịma nị Onyẹ hụ ya sụọ wụ Osolobuẹ ja ụnụ mma.

⁴⁵ “Erokwọlẹ ni nị m k'e kpe ụnụ ẹka Chuku-Nẹdi; onyẹ e kpeni ụnụ wụ Mozizi ahụn ụnụ gi dọn ẹnya.

⁴⁶ Makẹni, omẹni ụnụ te gi oku Mozizi dọn, nkẹ ụnụ e gi oku m dọn, makẹni mmẹ kẹ Mozizi de banyeni.

⁴⁷ Ebe o mẹni ụnụ egini ihiẹn Mozizi de dọn, nanị ụnụ e dọn nwan gi oku m dọn?”