Jọnụ 4 - Ika

Isi Nke Ẹnọ Jizọsị Lẹ Okpoho Sameria

¹ Ogẹn Jesu gi nwan marịn nị ndị itu-Farisi a nụgụọ nị ndị alị hụn rị a la wẹ a tọ a bannị Jesu lẹ ndị rị e mẹ mirin Chuku ẹka a a karịgụọdẹ ndị rị a la wẹ a tọ a bannị Jọnụ hụn e mẹ mirin-Chuku —

² bụ ẹlẹ Jesu lẹ enwẹn ẹ rị e mẹ wẹ mirin-Chuku, ndị nsọnmazụụn a rị e mẹ wẹ —

³ ya kẹ Jesu nọ gha Judia pụ, kinkọ Galili.

⁴ Ọ nọ ghashi alị Sameria makẹlẹ ọ rị mkpa n'ọ ghashi ẹ.

⁵ Ya ọ nọ pụha obodo ohu w'a kpọ Sika hụn rị imẹ Sameria, ẹhụ alị Jekọpụ ye Josẹfụ nwa a.

⁶ Ọmị Jekọpụ rị ebẹhụ. Ndụn gụ Jesu o gi jẹn ijẹn. Ọ nọ nọdị alị ẹhụ ọmị hụ. (Ihiẹn rịkẹ ọkụrọkụ mmẹbụọ efinnaị anwụn gi a rị isi rọ.)

⁷ Ya kẹ okpoho Sameria ohu nọ bịa d'a dọrị mirin. Jesu nọ sị a, “Ye m mirin ra.”

⁸ Ndị nsọnmazụụn Jesu e shigụọ imẹ obodo d'e ṅọnhẹn ihiẹn-oriri ogẹn hụ.

⁹ Okpoho hụ wụ onyẹ Sameria nọ sị a, “Nanị kẹ ịyụ, onyẹ Ju, dọn nwan a rịọ mmẹ wụ onyẹ Sameria mirin, bụ ndị Ju ara sọn ndị Sameria mẹkọ?”

¹⁰ Jizọsị nọ sị a, “Omẹni i te marịn ihiẹn Osolobuẹ e ye lẹ onyẹ rị a sị ị, ‘Ye m mirin ra’, nkẹ y'a rịọ a, n'o ye i mirin hụn e ye ndụn.”

¹¹ Okpoho hụ nọ sị a, “Diọkpa, ọmịnị mi emi bụ y'e gi mkpu wẹ gi a dọ mirin. Elebe y'a nọ nwan wẹhẹ mirin ahụn e ye ndụn?!

¹² Yụ kazị Jekọpụ nẹdi ẹnyi kanị ye ẹnyi ọmịnị? Kẹ ya kẹ ụmụ a kẹ anụ a a razịghọ mirin rịn'a?”

¹³ Jesu nọ sị a, “Onyẹ ragụ mirinni, ẹgụn mirin jẹnkọ d'a gụnzị a.

¹⁴ Kanị onyẹ ra mirin m jẹnkọ d'e ye ẹ, onwọnni ogẹn ẹgụn mirin e gizi gụn a elu-ụwanị, mirin hụ k'e họnrindẹ isi-mirin imẹ hụnyẹ, a mụpụhan'a ndụn itẹbitẹ.”

¹⁵ Okpoho hụ nọ sị a, “Diọkpa, ye m nwan mirin hụ amamgbe ẹgụn-mirin a gụnzị m mọbụ a bịamazị m ebeni d'a dọrị mirin.”

¹⁶ Jizọsị nọ sị a, “Jẹn d'a kpọha di i, y'e kinhẹn ebeni.”

¹⁷ Okpoho hụ nọ sị a, “Enwọn m di.” Jesu nọ sị a, “Ezioku kẹ i ku ebe ị nọ sị, ‘Enwọn m di’,

¹⁸ makẹni ọsụọn'a nị y'a lụpụgụọ di isẹn, okẹnnyẹ yụ lẹ ya rị nwan ẹlẹ di i. Ezioku k'i ku!”

¹⁹ Okpoho hụ nọ sị a, “Diọkpa, a hụnọlẹ m'a nị ị wụ onyẹ-amụma.

²⁰ Ndị nẹdi ẹnyi kanị nọ uguni fe Chuku, bụ ụnụ ndị Ju sị Jerusalẹm kẹ ịhịan k'a nọrịrị fe Chuku.”

²¹ Jesu nọ sị a, “Okpoho, kweri ihiẹn m rị e ku: ogẹn lala, hụn ụnụ jẹnkọlẹni d'a nọzị kẹ elu uguni kẹ imẹ Jerusalẹm fe Chuku-Nẹdi.

²² Ụnụ amarịn onyẹ ụnụ rị e fe; kanị, ẹnyi nwẹn a marịnghọ onyẹ ẹnyi rị e fe, makẹni ẹka ndị Ju kẹ nzụọpụha gha lala.

²³ Ogẹn laladẹ, ẹghẹẹ, o rugụọdẹ nwan, hụn ndị e fe ezigbo ofufe k'e gi fe Chuku-Nẹdi ofufe imẹ-mmọn lẹ nke ezioku. Makẹni ndị hụn e fe ẹrịra kẹ Chuku-Nẹdi chọkọ.

²⁴ Osolobuẹ wụ mmọn, ẹlẹ ịhịan; ndị k'e fen'ẹ k'e ferịrị a ofufe imẹ-mmọn lẹ nke ezioku.”

²⁵ Okpoho hụ nọ sị a, “A marịnghọ m nị Onyẹ Nzụọpụha Hụ Osolobuẹ Tumẹ hụn w'a kpọ Kraịstị lala; ọ bịa, n'ọ gwachanrịnghọ ẹnyi ihiẹn ile.”

²⁶ Jesu nọ sị a, “Mmẹ hụn rị a gwa ị oku rọ.”

²⁷ Ogẹn hụ hụra kẹ ndị nsọnmazụụn a gi kinhẹn. Ọ tụka wẹ ẹnya n'ọ rị e sọn okpoho e ku; kanị onwọnni onyẹ sị, “K'ị chọ?” mọbụ “Kị rị e dun'ẹ e ku?”

²⁸ Ya kẹ okpoho hụ nọ la ite mirin ẹ tọ, kinzi imẹ obodo, sị ndị rịn'a,

²⁹ “Bịa nị d'e lee onyẹ gwa m ihiẹn ile m mẹ!! Onyẹ ma kẹ ịya wụ Kraịstị?”

³⁰ Wẹ nọ gha imẹ obodo rujẹnmẹ ebe ọ rị.

³¹ Ogẹn hụ, ndị nsọnmazụụn Jesu hụ a rịọ a, “Onyẹ-nkuzi, dodo ri ihiẹn-oriri.”

³² Kanị ọ nọ sị wẹ, “M nwọn ihiẹn m'e ri hụn ụnụ marịnlẹni.”

³³ Ya kẹ ndị nsọnmazụụn a nọ jụma ibe wẹ, “O nwọndẹ nwan onyẹ wẹhẹn'ẹ ihiẹn-oriri ra?”

³⁴ Jizọsị nọ sị wẹ, “Ihiẹn-oriri m wụ imẹ uche onyẹ zini m lẹ ịrụnchanrịn ọrụn a.

³⁵ Ẹlẹ ụnụ a sị, ‘Ọ họdụzị ifọn ẹnọ nị wẹ ghọma ihiẹn-ugbo?’ Kanị, m rị a sị ụnụ, lehunmẹ ni ẹnya nị ụnụ hụn nị ihiẹn-ugbo a kagụọlẹ w'a ghọ.

³⁶ Onyẹ rị a ghọnị hụ a ghọ, a narịn ụgwọ-ọrụn a, e kpọntọnị ndụn itẹbitẹ, kẹni hụn kụnn'a lẹ hụn ghọn'a nwọngbama ịghọghọ.

³⁷ O mẹgụọ nwan kẹ wẹ dọn e ku ẹ: ‘Onyẹni kụn; onyẹni ghọ.’ ”

³⁸ “M zi ụnụ d'a ghọ ihiẹn ụnụ rụnlẹni; ndị ọzọ a rụngbugụọ enwẹn wẹ; ụnụ a bịagụọ d'a ghọ ihiẹn wẹ rụn.”

Ndị Sameria E Kwerini Jesu

³⁹ Ndị Sameria bu ọda bi obodo hụ kwerini Jesu, makẹni okpoho hụ sị, “Ọ gwa m ihiẹn ile m mẹ!”

⁴⁰ Ogẹn ndị Sameria gi bịa d'e kunrun Jesu, wẹ nọ rịọ a n'o sọn wẹ nọdị. Ya ọ nọ sọn wẹ nọdị akpọhịn ẹbụọ.

⁴¹ Ya kẹ ndị bu ọda nọzị kwerinin'ẹ makẹ ihiẹn wẹ nụ ọnụ a.

⁴² Wẹ nọ sị okpoho hụ, “Ẹlẹzi ihiẹn i ku sụọ kẹ ẹnyi gi kweri, makẹlẹ ẹnyi lẹ enwẹn ẹnyi a nụọlẹ ọnụ a, marịn nị ọnwan wụ Onyẹ-nzụọpụha ụwa nke-esi.”

Jizọsị A Zụọ Nwa Onyẹ-isi ọrụn Eze

⁴³ Akpọhịn ẹbụọ a ghafegụ, Jesu nọ gha Sameria pụ, shi Galili.

⁴⁴ Jizọsị lẹ enwẹn ẹ e kugụọ a nị w'a ra gbaye onyẹ-amụma alị a.

⁴⁵ Ogẹn o gi ru Galili, ndị Galili nọ nabanhan a, makẹni a hụngụọ wẹ ihiẹn ile o mẹ imẹ Jerusalẹm ogẹn Mmẹmmẹ-nghafe, makẹni wẹ nwẹn e jẹnzighọ mmẹmmẹ hụ.

⁴⁶ Ọ nọ bịazị obodo Kana rị Galili ebe ọ nọ gi mirin họnrin manya. O nwọn okẹnnyẹ ohu emu rị a kụ nwa a okẹnnyẹ imẹ Kapanọm rịzị Galili. Okẹnnyẹni rị ndị-isi ọrụn eze.

⁴⁷ Ọ nụ nị Jizọsị a ghagụọ Judia kinhẹn Galili, ọ nọ buru ẹ, rịọ a bịa d'a zụọ nwa a makẹni o d'a nwụn.

⁴⁸ Ya Jesu nọ sị a, “Mmanị ụnụ hụn ahịma lẹ ihiẹn atụmẹnya, ụnụ ekwerikọ.”

⁴⁹ Onyẹ-isi ọrụn hụ nọ sị a, “Diọkpa bịa dodo, nwa m gini d'a nwụn.”

⁵⁰ Jizọsị nọ sị a, “Lama, nwa ị anwụnkọ.” Okẹnnyẹ hụ nọ kweri oku Jizọsị gwa a, ọ nọ lama.

⁵¹ Ebe ọ lakọ, idibo ẹ nọ kunrun ẹ, gwa a nị nwa a hụ mma.

⁵² Ọ jụ wẹ ele ogẹn k'o gi rị mma, wẹ nọ sị a, “Ọkụrọkụ ohu efinnaị ụnyanhụn kẹ ẹhụ-ọkụn hụ gi hapụ a.”

⁵³ Nẹdi nwata hụ nọ nyanhan nị ogẹn hụ daị kẹ Jizọsị gi sị a, “Nwa ị anwụnkọ.” Ufiri ẹ, ya lẹ ezi-lẹ-ụlọ a nọ kwerini Jesu.

⁵⁴ Ọnwan wụ ọrụn-atụmẹnya nke ẹbụọ Jesu rụn k'ọ gha Judia lụaha Galili.