Jọnụ 3 - Ika

Isi Nke Ẹtọ Kẹ Nikodimọsụ Dọn Chọha Jizọsị

¹ O nwọn onyẹ Itu Farisi w'a kpọ Nikodimọsụ, onyẹ ohu imẹ ndị-isi ndị Ju.

² Okẹnnyẹni gi uhinhin chọha Jizọsị, sị a, “Onyẹ-nkuzi, ẹnyi a marịnghọ n'ị wụ onyẹ-nkuzi gha ebe Osolobuẹ rị bịa, makẹlẹ onwọnni onyẹ k'a s'ẹka rụn ọrụn-atụmẹnya ndịnị ị rị a rụn mmanị Osolobuẹ nọyen'ẹ.”

³ Jesu nọ sị a, “Ezioku kẹ m rị a gwa ị, mmanị wẹ mụdọnzi ịhịan, ọ saẹka hụn Alị-eze Osolobuẹ.”

⁴ Nikodimọsụ nọ sị a, “Nanị w'a dọnzi nwan mụdọnzi ịhịan ebe ọ kagụ ẹgẹdi?! N'ọ sazị ẹka banyezi ẹfọ nnẹ ẹ, a mụzị w'a nke mgbe ẹbụọ?”

⁵ Jizọsị nọ sị a, “Ezioku kẹ m rị a gwa ị, mmanị wẹ gi mirin lẹ Mmọn-nsọ mụ ịhịan, ọ saẹka banye Alị-eze Osolobuẹ.

⁶ Hụn ịhịan mụ wụ ịhịan; hụn Mmọn-nsọ mụ wụ nke imẹ-mmọn.

⁷ Y'a tụlẹ i ẹnya nị m sị, ‘Wẹ sikọ d'a mụdọnzigụrịrị ụnụ.’

⁸ Ufere e feshi ebe ọ chọ, ụnụ a nụ ụzụn a, kanị ụnụ ara marịn ebe ọ gha fela mọbụ ebe o fekọ. Ẹrịra kẹ onyẹ ọwụlẹ Mmọn Osolobuẹ mụ rị.”

⁹ Ya kẹ Nikodimọsụ nọ sị Jizọsị, “Nanị ihiẹn ndịnị e dọn saẹka mẹ?”

¹⁰ Jizọsị nọ sị a, “Onyẹ-nkuzi kị wụ imẹ Izrẹlụ bụ y'a marịn ihiẹn ndịnị?

¹¹ Ezioku kẹ m rị a gwa ị, ẹnyi rị e ku ihiẹn ẹnyi marịn, a shịa ẹri ihiẹn ẹnyi hụn, kanị ụnụ ara gi ẹri ẹnyi dọn.

¹² M hụ e gi ihiẹn rị elu-ụwa a gwa ụnụ oku, ụnụ egini ẹ dọn, m gi ihiẹn rị elu-igwee gwa ụnụ oku, nanị ụnụ a dọn gi ẹ dọn?

¹³ Onwọnni onyẹ jẹntu elu-igwee wezụka onyẹ hụn gha elu-igwee bịa — mmẹ Nwa nke Ịhịan.

¹⁴ “Kẹ Mozizi dọn weshi agwọ hụ elu imẹ atụ, ẹrịra kẹ wẹ k'e weshi Nwa nke Ịhịan elu,

¹⁵ kẹni onyẹ ọwụlẹ hụn kwerinin'ẹ hụn ụzọ nwọn ndụn itẹbitẹ.

¹⁶ “Makẹni Osolobuẹ nwọn ihiẹn-ọsụsụọ ndị rị ụwa ọda-ọda, ya haịn o gi we akpụ Nwa ohu o nwọn ye, n'ọ wụrụ nị onyẹ ọwụlẹ kwerinin'ẹ alakọ iwi, kama o nwọn ndụn itẹbitẹ.

¹⁷ Ẹlẹ ikpe kẹ Osolobuẹ zi Nwa a d'a ma ndị rị ụwa, o zi ẹ kẹni wẹ gha ẹka a nwọnrin nzụọpụha.

¹⁸ Ikpe amanị onyẹ hụn kwerinin'ẹ, kanị ikpe a magụọlẹ onyẹ hụn kwerilẹni, o gilẹni kwerini ẹfan akpụ Nwa ohu Osolobuẹ mụ.

¹⁹ Ọnwan kẹ wẹ gi hangbu wẹ eṅẹn: nị ukpẹ a bịagụọ imẹ ụwa, kalẹ ishi a ka ịhịan a sụọ karị ukpẹ, makẹni eje-ihiẹn kẹ w'e mẹ.

²⁰ Ndị ile e mẹ eje-ihiẹn ara chọ nị wẹ gi ẹnya hụn ukpẹ; w'a ra bịa ebe ukpẹ rị amamgbe eje-ihiẹn wẹ rị e mẹ a pụha ifọn.

²¹ “Kanị ndị hụn e mẹ ihiẹn rị mma a bịa ebe ukpẹ rị, kẹni ịhịan ile hụn a nị ihiẹn Osolobuẹ chọ kẹ wẹ rị e mẹ.”

Jọnụ Esọnni Jizọsị Ma Usue

²² Omẹgụ, Jizọsị lẹ ndị nsọnmazụụn a nọ shi ẹgbẹrẹ Judia, ọ nọ du wẹ nọdị ebẹhụ. Ọ hụ e mẹ ịhịan mirin-Chuku k'ọ rị ebẹhụ.

²³ Jọnụ nkẹ rị obodo Ẹnọnụ hụn nọkunmẹ Salim e mẹzikwọ mirin-Chuku, makẹni mirin rị ebahụn ọda-ọda, wẹ hụ e jẹnburu ẹ d'e mẹ mirin-Chuku.

²⁴ W'e ke bu Jọnụ che imẹ ụlọ-ngan ogẹn ahụn.

²⁵ Ya k'o gi mẹni ebe ndị nsọnmazụụn Jọnụ lẹ onyẹ Ju rị a dọ oku ẹhụ w'a chan wẹ gi e fe ẹhụ,

²⁶ wẹ nọ bịa d'e kunrun Jọnụ, sị a, “Onyẹ-nkuzi, lee nwan nị onyẹ hụ yụ lẹ ya rịtan nfetu Iyi Jọdanị, hụn ị gwa ịhịan ile oku ẹ, rị nwan e mẹ mirin-Chuku, ịhịan ile hụ e jẹnburu ẹ.”

²⁷ Jọnụ nọ shịarị wẹ, sị, “Onwọnni ihiẹn e ru ịhịan ẹka mmanị wẹ gha elu-igwee y'ẹ ya.

²⁸ Ụnụ lẹ enwẹn ụnụ wụ ọshẹri m nị e kughọ m'a nị ‘Ẹlẹ m Kraịstị, kanị wẹ zi m d'a kwan'a ụzọ.’

²⁹ Onyẹ rị a lụ okpoho nwọn okpoho ahụn ọ rị a lụ. Ọwụ a wuzohụ ẹhụ a, a ghọghọ n'ọ rị a nụ olu ẹ. Ịghọghọ m e zuọlẹ nwan oke.

³⁰ Kraịstị k'a gha a waye; mmẹ nwẹn k'a gha e belụa.

³¹ “Onyẹ gha elu-igwee bịa ka ịhịan ile; onyẹ gha elu-ụwa bịa gha elu-ụwa bịa, o ku oku ihiẹn rị elu-ụwa. Hụn gha elu-igwee bịa ka ịhịan ile.

³² Ọ hụ e ku ihiẹn ọ hụn lẹ ihiẹn ọ nụ, kanị onwọnni onyẹ e gi ẹri ẹ e dọn.

³³ Onyẹ gi oku ẹ dọn a ghọsịọlẹ nị Osolobuẹ wụ onyẹ-ezioku.

³⁴ Makẹni onyẹ Osolobuẹ zihẹ rọ, o ku oku Osolobuẹ, ufiri nị Osolobuẹ eyen'ẹ Mmọn-nsọ yehọdụ.

³⁵ Chuku-Nẹdi nwọn ihiẹn-ọsụsụọ Nwa a wụ Kraịstị, o bugụọ ihiẹn ile che ẹ ẹka.

³⁶ Onyẹ hụn kwerini Nwa Osolobuẹ nwọn ndụn itẹbitẹ; onyẹ kwerilẹnini Nwa Osolobuẹ ahụnkọ ndụn; kama, iwe-lẹ-ọnụma kẹ Osolobuẹ k'e gi sọn ẹ.”