Jọnụ 20 - Ika

Isi Nke Ọgụn Okpokoro Ili

¹ Ụzụtụntụn biribiri ụhụọhịn ibuzọ imẹ izuka, Meri onyẹ Magidala nọ jẹn ili hụ. Ya k'ọ nọ hụn nị e nupụgụọ wẹ ọmụma wẹ te gi nukin ọnụ ili hụ.

² Ọ nọ gbajẹn d'a gwa Saịmọnụ wụ Pita lẹ onyẹ nsọnmazụụn nẹi ihiẹn ẹ a sụọ Jesu, sị wẹ, “E bupụgụọ wẹ Di-nwọnni-ẹnyi imẹ ili hụ, kanị ẹnyi amarịn ebe wẹ buche ẹ.”

³ Ya kẹ Pita lẹ onyẹ nsọnmazụụn ahụn ihiẹn ẹ a sụọ Jesu nọ gbashi ili hụ.

⁴ Onyẹ nsọnmazụụn ahụn nọ gbaghafe Pita, bu ụzọ ru ebahụn.

⁵ O hulụa alị, nyọnye imẹ ili, ọ nọ hụn ẹkwa linẹ ndị ahụn wẹ te gi kwama Jesu ebe wẹ rị alị, kanị ọ banyeni imẹ ili hụ.

⁶ Saịmọnụ Pita hụn sọnkọ a azụụn e ru ebẹhụ, shi imẹ ili hụ. Ọ nọ hụn ẹkwa linẹ ndị hụ alị ebẹhụ;

⁷ ọ hụnzị ẹkwa wẹ te gi kẹnmẹ Jesu isi lẹ ihun. Ya lẹ linẹ ndị ahụn arị ụzọ ohu, a fụmagụọ wẹ hụn wẹ te gi kẹnmẹ ẹ isi lẹ ihun, bu ẹ tọ nkọ ohu.

⁸ Ya onyẹ nsọnmazụụn ahụn te bu ụzọ ru ili hụ nọ banyezi; ọ hụn, ọ nọ kweri.

⁹ (Ogẹn ahụn, w'e ke ghọtakwọ ihiẹn hụ Ẹkụkwọ-nsọ ku n'o jẹnkọ d'a gha ọnwụn lihi.)

¹⁰ Ndị nsọnmazụụn a ndị ahụn a hụngụ ihiẹn ndịnị, onyẹ-onyẹ nọ la iwe ẹ.

Meri Onyẹ Magidala A Hụn Jesu K'ọ Ghagụ Ọnwụn Lihi

¹¹ Kanị Meri turuhụkwọ ihun ili hụ, a kwan. Hụn ahụn ọ rị a kwan, ọ nọ hulụa alị, nyọnye imẹ ili hụ,

¹² ọ nọ hụn ndị mmọn-ozi ẹbụọ yi ẹkwa ọchan kẹ wẹ nọdị alị ebahụn ẹhụ Jesu te rị, onyẹ ohu rị ibe isi, hụn-ẹbọ rị ibe ụkụ.

¹³ Wẹ nọ sị Mẹri, “Okpoho, k'ị rị a kwannị?” Ọ nọ sị wẹ, “E bupụgụọ wẹ Di-nwọnni m, kanị amarịn m ebe wẹ buche ẹ!”

¹⁴ O kugụ ihiẹnni, ya ọ nọ gbehutọ, hụn Jesu k'o turu ebẹhụ, kanị ọ marịn nị ya rọ.

¹⁵ Jesu nọ sị a, “Okpoho, k'ị rị a kwannị? Onyẹ k'ị rị a chọ?” Meri ro ni hụn e lepụ ugbo-nta hụ ẹnya rọ, ya ọ nọ sị a, “Diọkpa, omẹni yụ bupụ a, gwa m ebe i buche ẹ, m k'e jẹn d'e buru ẹ.”

¹⁶ Jizọsị nọ hị a, “Meri!” Meri nọ gbehutọ buchanrịn ihun zinmẹ ẹ, gi asụsụ Hibru hị a, “Raboni!” (Ọnụ ndị Ju Raboni wụ Onyẹ-nkuzi)

¹⁷ Jesu nọ sị a, “Eke kwọndọnlẹ m ẹka, makẹni m'e ke jẹn elu-igwee d'e kunrun Chuku-Nẹdi. Ka jẹn d'e kunrun umunẹ m, y'a sị wẹ, ‘M lakọ elu-igwee d'e kunrun Nẹdi m hụn wụzị Nẹdi ụnụ, Osolobuẹ m hụn wụzị Osolobuẹ ụnụ.’ ”

¹⁸ Ya kẹ Meri onyẹ Magidala nọ jẹn d'a gwa ndị nsọnmazụụn Jesu, “A hụngụọ m Di-nwọnni-ẹnyi!” Ya kẹ ọ nọzị gwachanrịn wẹ ihiẹn ndị hụ ọ gwa a.

Jesu E Nwọnpụha Imẹ Igunrun Ndị nsọnmazụụn A

¹⁹ Ẹnyasị ụhụọhịn ahụn wụ ụhụọhịn ibuzọ imẹ izuka, ndị nsọnmazụụn Jesu gi egun ndị-ndu ndị Ju kpọkin enwẹn wẹ ye mmụlọ wẹ rị. Ya Jesu nọ nwọnpụha idẹnmizi, turu imẹ igunrun wẹ, sị, “Udọn ya rịnị ụnụ!”

²⁰ Ogẹn o gi kugụ ihiẹnni, ọ nọ ghọsị wẹ ẹka a ẹbụbụọ lẹ ẹkụnkụn a. Ya kẹ ndị nsọnmazụụn a nọ ghọghọ ọda-ọda n'a hụn wẹ Di-nwọnni-ẹnyi.

²¹ Ya Jizọsị nọzị nwan sị wẹ, “Udọn ya rịnị ụnụ. M rị nwan e zi ụnụ kẹ Chuku-Nẹdi dọn zi m.”

²² O kugụ ihiẹnni, ọ nọ horokpu wẹ, sị, “Narịn nị Mmọn-nsọ.

²³ Ụnụ gbagharị ịhịan njọ wẹ, Osolobuẹ a gbagharị wẹ ya; ụnụ agbagharịnị ịhịan njọ wẹ, Osolobuẹ agbagharịkọ wẹ.”

Kẹ Tamọsị Dọn Rụ Ụka

²⁴ Tamọsị w'a kpọ Ejimẹ, onyẹ ohu imẹ ndị nsọnmazụụn mmẹbụọ, arị imẹ igunrun wẹ kẹ Jesu bịa.

²⁵ Ya ndị nsọnmazụụn ibe ẹ nọ sị a, “Ẹnyi a hụngụọ Di-nwọnni-ẹnyi.” Kanị Tamọsị nọ sị wẹ, “Mmanị m hụn ẹnya ntu ndị hụ rị a ẹka ẹbụbụọ, bu mkpịnsịn-ẹka m che ẹnya ntu ndị hụ, bu ẹka m che ẹkụnkụn a — ekwerikọ m!”

²⁶ Hụn mẹ ẹ izuka, ebe ndị nsọnmazụụn Jesu rịzị imẹ ụlọ wẹ lẹ Tamọsị; ụzọ kpọkin akpọkin kanị Jesu nọzị nwọnpụha, turu imẹ igunrun wẹ, sị, “Udọn ya rịnị ụnụ.”

²⁷ Ya kẹ ọ nọ sị Tamọsị, “Wẹhẹ mkpịnsịn-ẹka ị n'i bu ẹ che ebeni; lee ẹka m ẹbụbụọ; wẹhẹ nwan ẹka ị n'i buche m ẹkụnkụn. Arụzịlẹ ụka; kweri!”

²⁸ Tamọsị nọ za a, sị, “Di-nwọnni m lẹ Chuku m!”

²⁹ Jesu nọ sị a, “Ẹlẹ hụnnị ị hụngụ m k'i gi kweri? Ngọzi wụ nke ndị kelẹni hụn bụ e kweri wẹ.”

Ihiẹn Wẹ Deni Ẹkụkwọnị

³⁰ O nwọnzighọ ọrụn-atụmẹnya bu ọda Jesu rụn idẹnya ndị nsọnmazụụn a hụn wẹ deyelẹni imẹ ẹkụkwọnị.

³¹ Kanị, wẹ deye ndịnị kẹni ụnụ hụn ụzọ kweri nị Jesu wụ Kraịstị (hụn wụ Onyẹ Nzụọpụha Hụ Osolobuẹ Tumẹ), Nwa Osolobuẹ, kẹni ụnụ gi ẹfan a nwọn ndụn ghahanị okweri ụnụ kwerin'ẹ.