Jọnụ 2 - Ika

Isi Nke Ẹbụọ Jesu E Gi Mirin Họnrin Manya

¹ Hụn mẹ ẹ akpọhịn ẹtọ, o nwọn ndị rị a gba ẹkụkwọ imẹ Kana rị Galili. Nnẹ Jizọsị rị ebahụn.

² Wẹ kpọzịkwọ Jizọsị lẹ ndị nsọnmazụụn a agbamẹkụkwọ hụ.

³ Manya a gụ, nnẹ Jizọsị nọ sị a, “Manya wẹ a gụ.”

⁴ Jizọsị nọ sị a, “Okpoho, hatu m ye nụ, ogẹn m eke ru.”

⁵ Nnẹ ẹ nọ sị ndị rị e jẹn ozi, “Ihiẹn ọwụlẹ ọ sị ụnụ mẹ, ụnụ e mẹ.”

⁶ O nwọn ite-mirin isin wẹ gi ọmụma mẹmẹ rị ebahụn wẹ gi a chan ihiẹn ile w'a chan wẹ gi e mẹzu omẹnalị ndị Ju. Ohu-ohu imẹ wẹ e ripụ ite-mirin isẹn mọbụ ẹsa.

⁷ Jesu nọ sị ndị ahụn rị e jẹn ozi, “Gbajun ni ite ndị hụ mirin.” Ya wẹ nọ gbajun wẹ pụ ọnụ.

⁸ Ọ nọ sị wẹ, “Kuru ni nwan wejẹnni onyẹ-isi ocho.” Ya wẹ nọ kuru.

⁹ Onyẹ-isi ocho nọ danmịn mirin hụ họnringụ manya. Ọ marịn ebe ọ gha bịa, kanị ndị hụ rị e jẹn ozi a marịnghọ. Ya kẹ ọ nọ kpọ okẹnnyẹ hụ rị a gba ẹkụkwọ,

¹⁰ sị a, “Ndị ọzọ ile e wepụhagụ manya ka a sụọ, ịhịan ile rajungụ ẹfọ wẹ kebe wepụha hụn sụọlẹni; kalẹ y'e bu hụnnị ka mma tọ d'e ru ogẹnni.”

¹¹ Imẹ Kana rị Galili kẹ Jesu nọ rụn ọrụn-atụmẹnya ibuzọnị o gi ghọsị onyẹ ọ wụ, ndị nsọnmazụụn a nọ kwerin'ẹ.

¹² Omẹgụ, Jesu lẹ nnẹ ẹ lẹ umunẹ ẹ lẹ ndị nsọnmazụụn a nọ shi Kapanọm, nọdị ebẹhụ ẹkẹrẹ.

Jesu E Jẹn Ụlọ-nsọ

¹³ O rumẹ ogẹn ndị Ju gi e mẹ Mmẹmmẹ-nghafe, Jesu nọ shi Jerusalẹm.

¹⁴ Ọ nọ hụn ndị rị ezi-ọgwa Ụlọ-nsọ ebẹhụ e re okẹn-efin lẹ atụnrụn lẹ oluikuku lẹ ndị a gbahutọ egho nọdịyeni teburu wẹ.

¹⁵ Ọ nọ kpa iberi, gi ẹ chụpụ wẹ ile lẹ okẹn-efin wẹ imẹ Ụlọ-nsọ, bụọyịya egho ndị a gbahutọ egho, hukpumẹsọnmẹ teburu wẹ.

¹⁶ Ọ sị ndị rị e re oluikuku, “Wepụ nị ihiẹn ndịnị ebeni; egizilẹ ni ụlọ Nẹdi m e họnrin afịa!”

¹⁷ Ndị nsọnmazụụn a nọ nyanhan nị Ẹkụkwọ-nsọ sị, “Oku ụlọ ị jẹnkọ d'e bu m ri.”

¹⁸ Ya kẹ ndị-ndu ndị Ju nọ sị a, “Ele ahịma kẹ y'e gi ghọsị nị Osolobuẹ sị ị mẹ ihiẹnni.”

¹⁹ Jizọsị nọ za wẹ, sị, “Tikpọ nị Ụlọ-nsọnị, e gi m akpọhịn ẹtọ weshi ẹ elu.”

²⁰ Ya ndị-ndu ndị Ju nọ sị a, “Ụlọ-nsọnị wẹ gi ahụa isin-kwasị-ọgụnnaị tụn k'i jẹnkọ d'e gi akpọhịn ẹtọ weshi elu?”

²¹ Kanị Ụlọ-nsọ Jesu rị e ku oku ẹ wụ ẹhụ a.

²² Ogẹn Jesu gi ghagụ ọnwụn lihi, ndị nsọnmazụụn a nọ nwan nyanhan n'o kughọ ihiẹnni, wẹ nọ gi ihiẹn Ẹkụkwọ-nsọ ku lẹ ihiẹn Jesu ku dọn.

Jesu Marịn Kẹ Ịhịan Nọ

²³ Ogẹn Jesu gi rị imẹ Jerusalẹm ogẹn Mmẹmmẹ-nghafe, ndị bu ọda kwerin'ẹ makẹni wẹ hụn ọrụn-atụmẹnya ndị ọ rị a rụn.

²⁴ Kanị Jizọsị ebuni enwẹn ẹ ye wẹ, makẹni ọ marịngụọ kẹ ịhịan ile nọ.

²⁵ Ẹlẹ hụn w'e gi gwama a kẹ ịhịan nọ, makẹni ya lẹ enwẹn ẹ a marịngụọ ihiẹn rị imẹ ịhịan.