Jọnụ 18 - Ika

Isi Nke Mmẹsatọ A Nwụnrụn Wẹ Jesu

¹ Ogẹn Jesu gi mẹgụ ekpereni, ya lẹ ndị nsọnmazụụn a nọ pụ ebẹhụ, fetu Ọdanmgbugbu Kidrọnụ, banye ugbo-nta ohu rị ebẹhụ.

² (Judasị, hụn jẹnkọ d'e ren'ẹ a marịnzịghọ ebahụn, makẹni Jesu lẹ ndị nsọnmazụụn a a nọ ebẹhụ e zu mbụ-lẹ-ẹbụọ.)

³ Ya Judasị nọ weri igunrun ndị-agha Rom lẹ ndị-nche Ụlọ-nsọ, ndị hụn ndị-isi nchụn-ẹjan lẹ ndị itu-Farisi zihẹ, o webanhan wẹ ebẹhụ. Wẹ busọnmẹ ihiẹn-ọgụn ichẹn-ichẹn lẹ ọwa lẹ ukpẹ.

⁴ Jesu a marịngụọ ihiẹn ile jẹnkọ d'e mẹn'ẹ: ọ nọ jẹnpụha, sị wẹ, “Onyẹ kẹ ụnụ rị a chọ?”

⁵ Wẹ nọ sị, “Jesu, onyẹ Nazarẹtị.” Ọ nọ sị wẹ, “Mmẹ rọ.” (Judasị hụn rị e ren'ẹ wuzoyeni wẹ ebahụn ogẹnni.)

⁶ Ogẹn Jesu gi sị wẹ, “Mmẹ rọ”, wẹ nọ jẹnkin azụụn, danchanrịn alị.

⁷ Jizọsị nọzị sị, “Onyẹ kẹ ụnụ chọkọ?” Wẹ nọ sị, “Jizọsị onyẹ Nazarẹtị.”

⁸ Jizọsị nọ sị, “A gwagụọ m ụnụ nị mmẹ rọ. O mẹ nwan nị mmẹ kẹ ụnụ rị a chọ, nị nị ndịnị lama.”

⁹ (O ku ihiẹnni kẹni okunẹi o ku bụn: “Onwọnni hụn ọwụlẹ la iwi imẹ ndị hụn i ye m.”)

¹⁰ Saịmọnụ wụ Pita bu ọpịa-agha, ya k'ọ nọ sepụha a, banpụ odibo onyẹ-isi nchụn-ẹjan ntịn ẹka-ihiẹn. (Ẹfan odibo ahụn wụ Mal'kusu.)

¹¹ Jizọsị nọ sị Pita, “Wekin ọpịa-agha ị ọbụọ a! Nị m jụ mkpu afụnfụn Nẹdi m ye m ra?”

E We Wẹ Jesu Jẹnni Anasị N'o Kin Ẹ Ikpe

¹² Ya ndị-agha Rom lẹ Onyẹ-isi agha wẹ kanị lẹ ndị-nche ndị-isi ndị Ju zihẹ nọ kwọndọn Jesu, kẹn ẹ ẹgbụn.

¹³ Wẹ nọ bu ụzọ we ẹ jẹnni Anasị, nẹdi nwunyẹ Kayafasị. Kayafasị wụ onyẹ-isi nchụn-ẹjan ahụa hụ.

¹⁴ (Kayafasịnị wụ hụn dụn ndị-isi ndị Ju ọdụn n'ọ kakwọ wẹ mma nị onyẹ ohu nwụndọnni ịhịan ile ọnwụn.)

Pita A Ghọrị, Sị Ọ Marịnzị Jesu

¹⁵ Saịmọnụ wụ Pita lẹ onyẹ nsọnmazụụn Jesu ọzọ nọ sọnmẹ Jesu. (Onyẹ-isi nchụn-ẹjan marịn onyẹ nsọnmazụụn hụn-ẹbọ hụ amarịn, ya onyẹ nsọnmazụụn hụ nọ sọn Jesu banye ezi ọgwa onyẹ-isi nchụn-ẹjan.)

¹⁶ Kanị Pita abanhannị. Onyẹ nsọnmazụụn hụ marịn onyẹ-isi nchụn-ẹjan nọ kin azụụn d'a gwa okpoho rị ọnụ-mgbọn oku, webanhan Pita.

¹⁷ Okpoho ahụn rị ọnụ-mgbọn nọ sị Pita, “Yụ nwẹn arị ndị nsọnmazụụn okẹnnyẹ hụ?” Pita nọ sị, “Ẹlẹ mmẹ!”

¹⁸ Oyi rị a tụ; ya ndị idibo lẹ ndị-nche hụ nọ fiye ọkụn, fihunmẹ ọkụn hụ, a nyan a. Ya Pita nọ jẹn d'e sọn wẹ turu ebẹhụ, a nyan ọkụn.

Onyẹ-isi Nchụn-ẹjan A Jụ Jesu Ajụjụ

¹⁹ Onyẹ-isi nchụn-ẹjan hụ a jụ Jesu oku ndị nsọnmazụụn a lẹ nkuzi ẹ.

²⁰ Jesu nọ sị, “Idẹnya ịhịan ile kẹ m nọ ku ihiẹn m ku; imẹ ụlọ-ofufe rị ichẹn-ichẹn lẹ imẹ Ụlọ-nsọ ndị Ju ile nọ e zu kẹ m nọ kuzi; onwọnni hụn m ku nzuzue.

²¹ K'ị rị nwan a jụnị m ajụjụ? Jụ ndị hụn nụ ihiẹn m ku, a marịngụọ wẹ ihiẹn m ku.”

²² Ogẹn Jesu gi ku ihiẹnni, onyẹ-nche ohu turu ẹhụ ebahụn nọ ma Jesu ọra, sị, “Ẹrịra kẹ ya a gwa onyẹ-isi nchụn-ẹjan oku!”

²³ Jesu nọ sị a, “Omẹni o nwọn eje-oku m ku, gwa ịhịan ile rị ebeni ihiẹn ọ wụ; kanị, omẹni ezioku kẹ m ku, k'ị manị m ọra?”

²⁴ Ya Anasị nọ sị wẹ weri ya lẹ ẹgbụn hụ wẹ kẹn ẹ jẹnni Kayafasị onyẹ-isi nchụn-ẹjan.

Pita A Ghọrịzị N'ọ Marịn Jesu

²⁵ Pita turukwọ ebẹhụ a nyan ọkụn. Ya ndị ọzọ nọzị sị, “Y'a rị nwan ndị nsọnmazụụn okẹnnyẹ hụ?” Kanị, Pita nọ ghọrị, sị, “Ẹlẹ mmẹ.”

²⁶ Onyẹ ohu imẹ ndị idibo onyẹ-isi nchụn-ẹjan, nwẹnẹ okẹnnyẹ hụ Pita banpụ ntịn, nọ sị Pita, “Ahụnnị m yụ lẹ ya imẹ ugbo ahụn?”

²⁷ Ya Pita nọ ghọrịzị. Ozigbo, ọkpa nọ kwan.

E We Wẹ Jesu D'e Kunrun Gọvanọ Wụ Paịleti

²⁸ Ụzụtụntụn biribiri, wẹ nọ gha iwe Kayafasị weri Jizọsị shi ọgwa Gọvanọ rị a kịnị. Kanị, abanyeni wẹ imẹ ọgwa hụ, makẹni achọnị wẹ nị wẹ mẹrụ enwẹn wẹ, kẹni wẹ hụn ụzọ ri Oriri-nghafe hụ.

²⁹ Ya Paịleti nọ jẹnburu wẹ ezi, sị, “Elee ikpe kẹ ụnụ rị e kpe okẹnnyẹni?”

³⁰ Wẹ nọ sị a, “Omẹni okẹnnyẹni ẹlẹ eje-ịhịan, ẹnyi eke wẹhẹni i y'ẹ.”

³¹ Paịleti nọ sị wẹ, “Weri n'ẹ d'e gi iwu ụnụ kin ẹ ikpe.” Ndị-ndu ndị Ju nọ sị a, “Iwu ụnụ tini ẹnyi sị ẹnyi egbulẹ onyẹ ọwụlẹ.”

³² (Hụnnị kẹ oku Jesu gi bụn — oku o gi ghọsị ụdị ọnwụn o jẹnkọ d'a nwụn.)

³³ Ya kẹ Paịleti nọ shizi imẹ ọgwa a, zi wẹ kpọ Jesu; ya ọ nọ jụma Jesu, “Ịyụ wụ eze ndị Ju?”

³⁴ Jesu nọ sị a, “Uche i k'i gidẹ nwan a jụ ajụjụnị ra wẹ gwa ị oku m?”

³⁵ Paịleti nọ sị a, “I rodẹ ni m wụ onyẹ Ju ra? Ndị Ju ibe i lẹ ndị-isi nchụn-ẹjan bu i che m ẹka; k'i mẹ?”

³⁶ Jesu nọ sị, “Alị-eze m ẹlẹ nke ụwanị. Omẹni alị-eze m te wụ nke ụwanị, nkẹ ihu m a lụ ọgụn gbọndọn wẹ ebulẹ m che ẹka ndị-ndu ndị Ju. Mba, alị-eze m ẹlẹ nke ebeni.”

³⁷ Ya Paịleti nọ jụ a, “Eze k'ị wụ nwan?” Jizọsị nọ sị a, “Ọ ghagụọ ọnụ ị pụha ni m wụ eze. M bịa d'a shịanị ezioku ẹri: ufiri ẹ kẹ wẹ gi mụ m; ịya haịn m gi bịa imẹ ụwa. Onyẹ wụ nke ezioku e gọn ntịn oku m.”

³⁸ Paịleti nọ sị a, “Kị wụ ezioku?” Paịleti a jụgụ a ya, buruzi ndị hụ ezi, sị wẹ, “Ahụnnị m ihiẹn o mẹ m'e gi ma a ikpe.

³⁹ Ụnụ sị m a hatuni ụnụ onyẹ-ngan ohu Mmẹmmẹ-nghafe ọwụlẹ; nị m hatuni nwan ụnụ Eze ndị Ju?”

⁴⁰ Ya wẹ nọ yizi, “Mba, ẹlẹ ọnwan! Barabasị kẹ ẹnyi chọ!!” (Barabasịnị rị ndị bunụmanị ndị Rom rị a kịnị.)