Jọnụ 17 - Ika

Isi Nke Mmẹsa Ekpere Jizọsị Mẹni Ndị Nke Ẹ Ile

¹ Ogẹn Jizọsị gi kugụ ihiẹn ndịnị, ọ nọ bu ẹnya zinmẹ elu-igwee, sị, “Baba, ogẹn hụ e rugụọ! Ye Nwa ị ọghọ, kẹni Nwa ị gi ẹ wẹhẹn'i ọghọ

² nọkẹ kẹ i dọn bu ịhịan ile che okpuru ẹ kẹni o ye ndị ile i ye ẹ ndụn itẹbitẹ.

³ Ọnwan wụ ndụn itẹbitẹ: ịmarịnn'ị, Chuku hụn ya sụọ wụ Chuku nke-esi lẹ ịmarịn Jizọsị Kraịstị hụn i zihẹ.

⁴ “E yegụọ m'ị ọghọ imẹ ụwanị ghahanị ịrụnchanrịn ọrụn i ye m rụn.

⁵ Baba, yezi m nwan ọghọ ebe ị rị, ọghọ hụ m nwọn ebe ị rị nị ụwa d'e bidọn.

⁶ “E mẹgụọ m ndịnị ị gha imẹ ụwa weye m marịn ẹfan ị. Ịyụ nwọn wẹ, ị nọ we wẹ ye m; e mẹgụọ wẹ ihiẹn i ku.

⁷ A marịngụọ wẹ nwan nị ihiẹn ile i ye m gha ẹka ị bịa,

⁸ makẹlẹ a gwagụọ m wẹ ihiẹn ndị hụ ị sị m gwa wẹ. A nabanhangụọ wẹ oku ndị hụ; a marịngụọ wẹ nwan nị m gha ebe ị rị bịa nke-esi. E kwerigụọ wẹ nị yụ zihẹ m.

⁹ “Uwẹ kẹ m rị e mẹni ekpere: ẹlẹ ụwa ile kẹ m rị e mẹ ni ekpereni, kalẹ ndị hụn i ye m, makẹni wẹ wụ nke i.

¹⁰ Ihiẹn ile m nwọn wụ nke i, nke i wụzịkwọ nke m. E wẹhẹgụọnị wẹ m ọghọ.

¹¹ Arịkọzị m nwan imẹ ụwa, kanị wẹ hụkwọ imẹ ụwa — mmẹ nwẹn lala d'e kunrun i. Nẹdi rị nsọ, gi ẹfan ị chemẹ wẹ, ẹfan ahụn i ye m, kẹni wẹ wụrụ ohu kẹ mmẹ lẹ yụ dọn wụ ohu.

¹² Ẹfan ị ahụn i ye m kẹ m gi chemẹ wẹ hụnnị mmẹ lẹ wẹ rị. E chemẹgụọ m wẹ: onwọnni hụn ọwụlẹ la iwi — wezụka onyẹ ahụn mẹ ihiẹn wẹ gi a la iwi — hụn Ẹkụkwọ-nsọ gi bụn.

¹³ Kanị, m burula ị nwan; m rị e ku ihiẹn ndịnị imẹ ụwa kẹni wẹ nwọn ịghọghọ m imẹ ndụn wẹ, nwọnzu ẹ.

¹⁴ “E yegụọ m wẹ oku i, ize wẹ a ban ụwa — makẹni ẹlẹ wẹ nke ụwa, nọkẹ kẹ o dọn mẹ ni mmẹ lẹ enwẹn m ẹlẹ nke ụwa.

¹⁵ Arị m a rịọ ị n'ị wepụ wẹ imẹ ụwa; kama, m rị a rịọ n'ị chemẹ wẹ makẹ Eje-onyẹ hụ gha e mẹ wẹ ihiẹn ọwụlẹ.

¹⁶ Ẹlẹ wẹ nke ụwa — nọkẹ kẹ o dọn mẹ ni mmẹ nwẹn ẹlẹ nke ụwa.

¹⁷ Gi ezioku dọn wẹ nsọ: oku i wụ ezioku.

¹⁸ Kẹ i dọn zihẹ m imẹ ụwa kẹ m dọn rị e zi wẹ e ye imẹ ụwa.

¹⁹ “M rị nwan e gi ufiri wẹ e wepụha enwẹn m, kẹni m mẹ wẹ wụrụ ndị wẹ wepụha dọn nsọ nke-esi.

²⁰ “Ẹlẹ ndịnị rị ebeni sụọ kẹ m rị e mẹni ekpereni; kama, m rịzị e mẹni ndị hụn jẹnkọ d'e gi ufiri ozi wẹ k'e zi kwerini m,

²¹ kẹni wẹ ile wụrụ ohu, nọkẹ kẹ ịyụ, Baba, dọn rị imẹ m, mmẹ nwẹn hụ imẹ i; m rị a rịọ nị wẹ rịzịkwọ imẹ ẹnyi — kẹni ụwa kweri nị ịyụ zihẹ m.

²² E wegụọ m ọghọ hụ i ye m ye wẹ, kẹni wẹ wụrụ ohu kẹ mmẹ lẹ yụ dọn wụ ohu:

²³ kẹni ọ wụrụ nị mmẹ nwẹn hụ imẹ wẹ, yụ nwẹn hụ imẹ m; a wụrụchanrịn wẹ ohu, ụwa e gi ẹ marịn nị ịyụ zihẹ m lẹni y'e nwọnghọ ihiẹn-ọsụsụọ wẹ k'i dọn nwọn ihiẹn-ọsụsụọ m.

²⁴ “Baba! M chọ nị ndị ile i ye m sọn m rị ebe m rị, nị wẹ hụn ọghọ m, ọghọ hụn i ye m makẹni i nwọn ihiẹn-ọsụsụọ m n'i d'e kedẹ ụwa.

²⁵ “Euu Baba, Onyẹ ezi-omumẹ, ọsụọn'a nị ụwa amarịn ị, mmẹ nwẹn a marịnghọ ị; ndịnị wẹ a marịnzịghọ nị ịyụ zihẹ m.

²⁶ E mẹgụọ m wẹ marịn ị; m k'a gha e mẹ wẹ a marịn ị, kẹni ihiẹn-ọsụsụọ m i nwọn hụn ụzọ rị imẹ wẹ lẹni mmẹ nwẹn rịzị imẹ wẹ.”