Jọnụ 16 - Ika

Isi Nke Mmisin

¹ “A gwatọgụọ m ụnụ ihiẹn ndịnị amamgbe ụnụ a danpụ imẹ okukwe.

² Wẹ jẹnkọ d'a chụpụ ụnụ imẹ ụlọ-ofufe. Ogẹn lala hụn w'e gi gbudẹ ụnụ e ro nị Osolobuẹ kẹ wẹ rị e mẹn'ẹ.

³ Wẹ jẹnkọ d'e mẹ ẹ makẹlẹ amarịn wẹ Chuku-Nẹdi, amarịn wẹ m.

⁴ Kanị, a gwatọgụọ m ụnụ ihiẹn ndịnị, kẹni, o mẹmẹ, ụnụ a nyanhan nị a gwatọgụọ m ụnụ ya. “Agwanị m ụnụ ihiẹn ndịnị isi mbidọn, makẹni mmẹ lẹ ụnụ rị.

⁵ Kanị m laburukọ nwan onyẹ hụn zihẹni m, bụ onwọnni onyẹ ọwụlẹ imẹ ụnụ rị a jụ m, ‘Elebe k'i jẹnkọ?’

⁶ Kama, ụnụ hụ a kwan makẹ ihiẹn ndịnị m gwa ụnụ.

Ọrụn Mmọn-nsọ Sikọ D'a Rụn

⁷ “Kanị nị m gwa ụnụ ezioku, erere ụnụ rọ nị m pụ apụ; makẹni, Onyẹ-eyemẹka ahụn abịakọ mmanị m lama alama. M lamagụ kẹ m'a nọ zihẹni ụnụ ya.

⁸ Ọ bịa, ịya sikọ d'a ghọsị ụwa njọ wẹ, ghọsị wẹ ihiẹn wụ ezi-omumẹ, ghọsị wẹ kẹ ikpe dọn ma wẹ.

⁹ O k'a ghọsị wẹ njọ wẹ makẹni ekwerinini wẹ m;

¹⁰ o k'a ghọsị wẹ ihiẹn ezi-omumẹ wụ makẹni m laburukọ Chuku-Nẹdi ebe ụnụ jẹnkọlẹni d'a hụn m;

¹¹ o k'a ghọsị wẹ kẹ ikpe dọn ma wẹ, makẹni Osolobuẹ a magụọ onyẹ hụn a kị ụwanị ikpe.

¹² “M nwọn ihiẹn bu ọda nkẹ m'a gwazị ụnụ, kanị isi ụnụ as'ẹka bu ẹ kikẹnni.

¹³ Mmọn-nsọ hụn a ghọsị ezioku bịa, o du ụnụ, mẹ ụnụ marịn ezioku ile. Makẹni, ẹlẹ uche ẹ k'o k'e ku; kama, ihiẹn o k'a nụ k'o k'e ku. O k'a gwazịkwọ ụnụ ihiẹn ndị jẹnkọ d'e mẹ ihun.

¹⁴ O jẹnkọ d'e ye m ọghọ, makẹni o k'e weri ihiẹn m k'e ye ẹ, gwa ụnụ.

¹⁵ Ihiẹn ile Nẹdi m nwọn wụ nke m; ya haịn m gi sị nị Mmọn-nsọ jẹnkọ d'e weri ihiẹn m k'e ye ẹ, gwa ụnụ.

Ịghọghọ Jẹnkọ D'a Nọkin Ẹnya Ẹkwan

¹⁶ “Ọ nọbe ẹkẹrẹ, ụnụ ahụnkọzị m; ọ nọbezi ẹkẹrẹ ụnụ a hụn m.”

¹⁷ Ụfọdụ ndị nsọnmazụụn a nọ sị ibe wẹ, “K'ọ rị a sịnị ẹnyi, ‘Ọ nọbe ẹkẹrẹ, ụnụ ahụnkọzị m; ọ nọbezi ẹkẹrẹ ụnụ a hụn m;’ k'ọ rị a sịnị ẹnyi, ‘makẹni m burukọ Chuku-Nẹdi’?”

¹⁸ Wẹ hụ a sị, “Kị wụ ‘Ọ nọbe ẹkẹrẹni’ ọ rị e ku? Ẹnyi aghọtanị ihiẹn ọ rị e ku!”

¹⁹ Jesu a marịngụọ nị wẹ chọ nị wẹ jụ a ajụjụ, ọ nọ sị wẹ, “Ụnụ rị a jụtarị ibe ụnụ ihiẹn haịn m gi sị, ‘Ọ nọbe ẹkẹrẹ, ụnụ ahụnkọzị m, ọ nọbezi ẹkẹrẹ, ụnụ a hụn m’?

²⁰ M rị a gwa ụnụ ezioku nị ụnụ k'a gha a kwan, e goo, ụwa nkẹ hụ a ghọghọ; ụnụ k'a sụkụrụ (gbusuru) kanị, o nọbe, ịghọghọ a nọkin ẹnya ẹkwan hụ.

²¹ “Imẹ gha e mẹ okpoho, ọ tụrụ a atụrụ makẹni ọmụmụ e rugụọ a; kanị ọ mụgụ, ọ nyanhankọzị afụnfụn hụ makẹni ọ rị a ghọghọ n'ọ mụgụọ nwa.

²² Ẹrịra kẹ ụnụ rị nwan a hụnjun ẹnya; kanị, nị m hụnzịghọ ụnụ; ogẹn hụ, ịghọghọ e jun ụnụ obi; onwọnni onyẹ k'a napụ ụnụ ịghọghọ hụ.

²³ O ru ogẹn hụ, ẹlẹ hụn ụnụ e gi jụmazị m ajụjụ. “Ezioku kẹ m rị a gwa ụnụ, ụnụ gi ẹfan m rịọ Chuku-Nẹdi ihiẹn, n'o yeghọ ụnụ ya.

²⁴ D'e rukwọ nwan ogẹnni, ụnụ egituni ẹfan m rịọ ihiẹn ọwụlẹ; rịọ nị, ụnụ jẹnkọ d'e nwọnhẹn, kẹni ịghọghọ ụnụ zu oke.

Jesu E Mẹrigụọ Ụwa

²⁵ “M hụ e gi ilu a gwa ụnụ ihiẹn ndịnị; kanị ogẹn lala hụn m'e gi gwapụ ụnụ oku Nẹdi m, ẹlẹzi ilu.

²⁶ O ru ogẹn ahụn, ẹfan m kẹ ụnụ e gi rịọ. Asịnị m ụnụ nị mmẹ k'a rịọnị ụnụ Chuku-Nẹdi,

²⁷ makẹni Chuku-Nẹdi lẹ enwẹn ẹ nwọn ihiẹn-ọsụsụọ ụnụ. Ihiẹn ụnụ a sụọ a makẹni ihiẹn m a sụọ ụnụ asụọ lẹzi makẹni ụnụ kweri nị m gha ebe Chuku rị bịa.

²⁸ M gha ebe Chuku-Nẹdi rị bịa imẹ ụwa; m pụkọzị nwan imẹ ụwa kẹni m laburu Chuku-Nẹdi.”

²⁹ Ya ndị nsọnmazụụn a nọ sị a, “Ẹhẹn! Ị rị e kupụ a nwan ọhụnma-ọhụnma, ẹlẹzi ilu!

³⁰ Echẹn kẹ ẹnyi marịn nwan n'ị marịn ihiẹn ile, n'o nwọnni onyẹ furu n'ọ jụ ị ajụjụ; ọnwan kẹ ẹnyi gi kweri n'ị gha ebe Osolobuẹ rị bịa.”

³¹ Jesu nọ sị, “Ụnụ sị nwan nị ụnụ e kwerigụọ?

³² Ogẹn lala — o rugụọdẹ nwan, hụn ụnụ e gi gbayịya, onyẹ-onyẹ e shi iwe ẹ, la mmẹ sụọ tọ. Kanị, ẹlẹ mmẹ sụọ rị, Nẹdi m nọyeni m anọyeni.

³³ A gwagụọ m ụnụ ihiẹn ndịnị kẹni obi gi ufiri m ru ụnụ alị. Imẹ ụwa, ụnụ jẹnkọ d'e nwọn nsọngbu; ka kwọndọn ni obi ụnụ, n'e mẹrigụọ m ụwa!”