Jọnụ 15 - Ika

Isi Nke Mmisẹn Jesu Wụ Vaịnị, Ndị Nke Ẹ Wụ Agalaba

¹ “Mmẹ wụ ezigbo vaịnị; Nẹdi m wụ hụn e lepụ a ẹnya.

² Agalaba m ọwụlẹ mịlẹni mkpụrụ, o bepụ a; kanị agalaba hụn mị mkpụrụ, o befọn ẹ, kẹni ọ mịkẹnmẹ.

³ Oku m gwa ụnụ e befọngụọlẹ ụnụ.

⁴ Nọdịsọnmẹ ni nwan imẹ m, mmẹ nwẹn a nọdịsọnmẹ imẹ ụnụ. K'o dọn wụrụ nị agalaba vaịnị nọdị nke ẹ ara saẹka mị mkpụrụ, mmanị ọ rị vaịnị hụ, ẹrịra k'o dọn wụrụ nị ụnụ asaẹka mị mkpụrụ mmanị ụnụ rị imẹ m.

⁵ “Mmẹ wụ vaịnị, ụnụ nwẹn wụsọnmẹ agalaba rịn'a; onyẹ hụn rị imẹ m, mmẹ nwẹn hụ imẹ ẹ, ya sikọ d'a mị mkpụrụ ọda-ọda, makẹni, ụnụ gha imẹ m pụ, ụnụ asakọ ẹka mẹ ihiẹn ọwụlẹ.

⁶ Onyẹ nọdịlẹni imẹ m, e tuhu w'ẹ, nọkẹ ebe wẹ nọ bepụ agalaba, ọ kpọpụ nkụn; w'e kpọngbama agalaba ndị nọ ẹrịra, e kpọnye ọkụn, a dụnpụ.

⁷ Omẹni ụnụ a nọdị imẹ m, nị oku m hụ imẹ ụnụ, rịọ nị ihiẹn ọwụlẹ ụnụ chọ; Osolobuẹ jẹnkọ d'e mẹni ụnụ ya.

⁸ Ụnụ mị mkpụrụ ọda-ọda, o k'a ghọsị nị ụnụ wụ ndị nsọnmazụụn m: ọhụn jẹnkọ d'e wẹhẹni Nẹdi m ọghọ.

⁹ “Kẹ Chuku-Nẹdi dọn nwọn ihiẹn-ọsụsụọ m kẹ m dọn nwọn ihiẹn-ọsụsụọ ụnụ; wụsọnmẹkwọ nị ndị ihiẹn wẹ a sụọ m.

¹⁰ Omẹni ụnụ e mẹsọnmẹghọ ihiẹn m ku, ụnụ sikọ d'a wụsọnmẹ ndị ihiẹn wẹ a sụọ m — nọkẹ kẹ m dọn e mẹ ihiẹn Nẹdi m ku, e gi ẹ a wụsọnmẹ onyẹ ihiẹn ẹ a sụọ Nẹdi m.

¹¹ A gwatọgụọ m ụnụ ihiẹn ndịnị, kẹni ụnụ nwọn ịghọghọ m lẹni ụnụ nwọn ịghọghọ nwọnzu ẹ.

¹² “Ọnwan wụ iwu m: ihiẹn ibe ụnụ y'a sụọ ụnụ kẹ ihiẹn ụnụ dọn sụọ m.

¹³ Onwọnni onyẹ nwọn ihiẹn-ọsụsụọ ka ọnwan: nị ịhịan gi ufiri ndị ọwụ a we ndụn a ye.

¹⁴ Ndị ọwụ m kẹ ụnụ wụ — omẹni ụnụ e mẹ ihiẹn m ku.

¹⁵ Arịzị m a kpọ ụnụ igbọn, makẹlẹ igbọn amarịn ihiẹn di-nwọnn'ẹ rị e mẹ. Ọwụ kẹ m kpọ ụnụ, makẹni a gwagụọ m ụnụ ihiẹn ile m nụ ọnụ Nẹdi m.

¹⁶ “Ẹlẹ ụnụ họrị m; kaka, mmẹ họrị ụnụ, tumẹ ụnụ kẹni ụnụ d'a mị mkpụrụ — mkpụrụ hụn sikọ d'a rịsọnmẹni, kẹni Chuku-Nẹdi ye ụnụ ihiẹn ọwụlẹ ụnụ gi ẹfan m rịọ.

¹⁷ M rị e ye ụnụ iwuni: ihiẹn ibe ụnụ y'a sụọ ụnụ.

Ize Ụnụ Jẹnkọ D'e Ze Ụwa

¹⁸ “Ize ụnụ zemẹ ụwa, nyanhankwọ nị nị ize m bu ụzọ ze ụwa.

¹⁹ Omẹni ụnụ te wụ nke ụwa, nkẹ ihiẹn ụnụ hụ a sụọ ụwa kẹ nke ẹ. Kanị, ebe o mẹ ni ụnụ ẹlẹ nke ụwa makẹni a họpụgụọ m ụnụ imẹ ụwa, ya haịn ize ụnụ gi e ze ụwa.

²⁰ Nyanhan nị ihiẹn m gwa ụnụ, nị, ‘Odibo ara ka di-nwọnn'ẹ.’ Omẹni wẹ kpokpo m ekpokpo, wẹ sikọ d'e kpokpo ụnụ nwẹn; omẹni wẹ mẹ ihiẹn m ku, wẹ jẹnkọ d'e mẹzi ihiẹn ụnụ ku.

²¹ Wẹ k'e gi ufiri ẹfan m mẹ ụnụ ihiẹn ndịnị, makẹni amarịn wẹ Onyẹ ahụn zihẹni m.

²² Omẹni ete bịanị m d'a gwa wẹ oku, ikpe eke ma wẹ; kanị onwọnzini nwan ihiẹn wẹ k'e kin.

²³ Onyẹ ize m rị e ze, ize Nẹdi m rị e ze ẹ.

²⁴ Omẹni ete rụnnị m ihiẹn wẹ rụntulẹni imẹ igunrun wẹ, ikpe eke ma wẹ; kanị, a hụnchanrịngụọ wẹ nwan ọrụn-atụmẹnya ndị m rụn — bụ ize mmẹ lẹ Nẹdi m hụ e ze wẹ.

²⁵ Ihiẹn wẹ de imẹ iwu wẹ a bụngụọ nwan: nị, ‘Ize m rị e ze wẹ bụ onwọnni ihiẹn m mẹ.’

²⁶ “Onyẹ Eyemẹka ahụn Chuku-nẹdi k'e ye m zihẹni ụnụ bịa, ịya sikọ d'e ku oku m: Mmọn-nsọ hụn a ghọsị ezioku rọ, hụn gha imẹ Chuku-nẹdi lala.

²⁷ Ụnụ lẹ enwẹn ụnụ sikọ d'a shịazịkwọnị m ẹri, makẹni mmẹ lẹ ụnụ rị gha isi mbidọn lala.