Jọnụ 13 - Ika

Isi Nke Mmẹtọ Kẹ Jesu Dọn Chanchan Ndị nsọnmazụụn A Ụkụ

¹ Nị Mmẹmmẹ-nghafe d'e ru, Jesu a marịngụọ n'o rugụọ ogẹn o gi hapụ ụwanị laburu Nẹdi ẹ. Ebe o nwọn ihiẹn-ọsụsụọ ndị nke ẹ rị imẹ ụwa, ọ nọ nwan ghọsịchanrịn wẹ ya d'e ru isi ẹ.

² Ebahụn wẹ nọ e ri ihiẹn-oriri ẹnyasị, Ekwensụ e bugụọl'a che Judasị nwa Saịmọnụ Iskarọtụ obi n'o d'e re Jizọsị.

³ Jizọsị a marịngụọ nị Chuku-Nẹdi e bugụọ ihiẹn ile che ẹ ẹka; ọ marịnghọ nị ebe Chuku-Nẹdi rị k'ọ gha bịa lẹni Chuku-Nẹdi k'ọ laburukọ:

⁴ ọ nọ lihi ọtọ ebẹhụ ọ rị e ri ihiẹn-oriri, yipụ ẹkwa o yiye elu ẹ, jeri ẹkwa wẹ gi e finchan ẹhụ.

⁵ Ọ nọ hu mirin ye imẹ afẹrẹ, chanma ndị nsọnmazụụn a ụkụ, e gi ẹkwa hụ wẹ gi e finchan ẹhụ o je e finchan wẹ ya.

⁶ O ru Saịmọnụ wụ Pita, Pita nọ sị a, “Di-nwọnni-ẹnyi, ịyụ k'a chanmazị m ụkụ ra?!”

⁷ Jizọsị nọ sị, “Y'a marịn ihiẹn m rị e mẹ kikẹnni; kanị omẹgụ, ị k'a ghọta a.”

⁸ Kanị Pita nọ sị a, “Onwọnni ogẹn y'e gi chan m ụkụ, kaka!” Jesu nọ sị a, “Omẹni achannị m'ị, onwọnni ihiẹn mmẹ lẹ yụ gi.”

⁹ Ya Saịmọnụ wụ Pita nọ sị a, “Di-nwọnni-ẹnyi, ẹlẹzi nwan ụkụ sụọ kị k'a chan m, chanzị m nwan ẹka lẹ isi!”

¹⁰ Jesu nọ sị a, “Onyẹ wụgụ ẹhụ, ẹlẹzi hụn w'a wụmazị ẹhụ, ụkụ sụọ kẹ w'a chan a, makẹni o nwungụọ. Ụnụ e nwungụọ nke-esi — kanị ẹlẹ ụnụ ile.”

¹¹ Jesu a marịngụọ onyẹ jẹnkọ d'e ren'ẹ, ya haịn o gi sị, “Ẹlẹ ụnụ ile nwun.”

¹² Ogẹn o gi changụ wẹ nwan ụkụ, yiri ẹkwa ahụn ọ gbụpụ, dịnọzị ebe ọ nọ e ri ihiẹn-oriri. Ya ọ nọ sị wẹ, “Ụnụ a ghọtaghọ ihiẹn m mẹni ụnụ?

¹³ Ụnụ a kpọ m ‘Onyẹ-nkuzi’, a kpọ m ‘Di-nwọnni-ẹnyi’; ezioku rọ makẹni ya kẹ m wụ.

¹⁴ O mẹ nwan nị mmẹ hụn wụ di-nwọnni ụnụ lẹ Onyẹ-nkuzi ụnụ, chan ụnụ ụkụ, ya wụ o furu nị ụnụ nwẹn chan ibe ụnụ ụkụ.

¹⁵ A ghọsịọlẹ m ụnụ ihiẹn ụnụ k'e leri, kẹni ụnụ hụn ụzọ mẹ kẹ m dọn mẹni ụnụ.

¹⁶ Ezioku kẹ m rị a gwa ụnụ, odibo ara ka onyẹ nwọnn'ẹ; onyẹ wẹ zi ozi ara ka onyẹ zin'ẹ.

¹⁷ Ebe o mẹni ụnụ a marịnghọ ihiẹn ndịnị, Osolobuẹ jẹnkọ d'a gọzi ụnụ ụnụ mẹ wẹ.

¹⁸ “Ẹlẹ ụnụ ile kẹ m rị e ku, n'a marịnghọ m ndị m họrị. Kanị, ihiẹn Ẹkụkwọ-nsọ ku, nị ‘Onyẹ ri ihiẹn-oriri m e bugụọ nụmanị m’, k'a bụnrịrị.

¹⁹ M rị nwan a gwatọ ụnụ ihiẹnni, kẹni, o mẹ, nị ụnụ kweri nị mmẹ wụ Onyẹ Hụ m ku.

²⁰ Ezioku kẹ m rị a gwa ụnụ, onyẹ hụn nabanhan onyẹ m zi, nabanhan m; onyẹ nabanhannị m, nabanhan onyẹ zihẹni m.”

Jesu E Ku Onyẹ Sikọ D'e Ren'ẹ

²¹ Ogẹn Jizọsị gi kugụ ihiẹnni, obi eruzin'ẹ alị, ọ nọ sị, “Ezioku kẹ m rị a gwa ụnụ, onyẹ ohu imẹ ụnụ jẹnkọ d'e re m.”

²² Ya kẹ ndị nsọnmazụụn a nọ lemẹ ibe wẹ. Amarịn wẹ onyẹ ọ rị e ku.

²³ Onyẹ nsọnmazụụn a ohu, onyẹ ahụn ihiẹn ẹ a sụọ Jesu, nọsọn Jesu.

²⁴ Ya Saịmọnụ wụ Pita nọ gi ẹka gwa a ya jụ Jizọsị onyẹ ọ rị e ku.

²⁵ Ya onyẹ nsọnmazụụn a hụ nọ danbemẹ Jesu, sị a, “Di-nwọnni-ẹnyi, onyẹ rọ?”

²⁶ Jesu nọ sị, “Onyẹ m jẹnkọ d'e ye brẹdini m surugụ ihiẹn rị afẹrẹ rọ.” Ya ọ nọ gi brẹdi hụ suru ihiẹn wẹ gi e ri ẹ, we ẹ ye Judasị nwa Saịmọnụ Iskarọtụ.

²⁷ Ogẹn Judasị gi narịngụ brẹdi ahụn, Ekwensụ nọ banye imẹ ẹ. Jesu nọ sị a, “Mẹ ihiẹn ị k'e mẹ ozigbo!”

²⁸ Kanị, onwọnni onyẹ ọzọ rị ebahụn e ri ihiẹn-oriri ghọta ihiẹn Jesu gi gwa Judasị okuni.

²⁹ Makẹni Judasị e kwọndọnni wẹ egho, o nwọn ndị ro ni Jizọsị rị a gwa a d'e ṅọnhẹn ihiẹn mmẹmmẹ hụ, mọbụ ya d'e ye ndị igbẹnnyẹ ihiẹn.

³⁰ Ogẹn Judasị gi narịngụ brẹdi hụ, ọ pụ ozigbo; imẹ uchinchin rọ.

Iwu Ọhụn

³¹ Ogẹn Judasị gi pụgụ, Jesu nọ sị, “Wẹ jẹnkọ nwan d'e ye Nwa nke Ịhịan ọghọ, gi Nwa nke Ịhịan ye Osolobuẹ ọghọ.

³² Osolobuẹ gi ẹ ye enwẹn ẹ ọghọ, Osolobuẹ sikọ d'e ye ya nwẹn ọghọ imẹ Osolobuẹ; o jẹnkọ d'e ye ẹ ọghọ ozigbo-ozigbo.

³³ “Ụmụ m, mmẹ lẹ ụnụ sikọ d'a nọdịzị ẹkẹrẹ sụọ. Ụnụ jẹnkọ d'a chọ m. Kẹ m dọn gwa ndị-ndu ndị Ju kẹ m rị nwan a gwa ụnụ: ‘Ụnụ asakọ ẹka bịa ebe m jẹnkọ.’

³⁴ M rị nwan e ye ụnụ iwu ọhụn: e nwọn ni ihiẹn-ọsụsụọ ibe ụnụ. Kẹ m dọn nwọn ihiẹn-ọsụsụọ ụnụ kẹ ụnụ k'a dọn nwọn ihiẹn-ọsụsụọ ibe ụnụ.

³⁵ Omẹni ihiẹn ibe ụnụ a sụọ ụnụ, ya kẹ ịhịan ile e gi marịn nị ụnụ wụ ndị nsọnmazụụn m.”

Jesu E ku Ẹ Nị Pita Jẹnkọ D'a Ghọrị N'ọ Marịn A

³⁶ Saịmọnụ w'a kpọ Pita nọ sị a, “Di-nwọnni-ẹnyi, elebe k'i jẹnkọ?” Jizọsị nọ sị, “Ebe m jẹnkọ, y'a saẹka sọn m kikẹnni — kanị omẹgụ kẹ yụ nwẹn sikọ d'a bịa.”

³⁷ Pita nọ sị a, “Di-nwọnni-ẹnyi, kị wụnị asa m ẹka sọn i kikẹnni? Nị m nwụnghọdẹni i ọnwụn!”

³⁸ Jesu nọ sị, “N'ị nwụnnị m ọnwụn? Ezioku kẹ m rị a gwa ị, ọkpa gini d'a kwan, i jẹnkọ d'a ghọrị ku mgbe ẹtọ nị y'a marịn m.”