Jọnụ 12 - Ika

Isi Nke Mmẹbụọ E Hukpu Wẹ Jesu Udẹn

¹ Ọ họdụ akpọhịn isin nị wẹ mẹ Mmẹmmẹ-nghafe, Jizọsị nọ jẹn Bẹtani, ebe Lazarọsụ hụn ọ gha ọnwụn weli bi.

² Wẹ nọ shini Jesu ihiẹn-oriri ẹnyasị. Mata rị e buye wẹ ihiẹn-oriri; Lazarọsụ rị ndị wẹ lẹ Jesu gba rị teburu e ri ihiẹn-oriri.

³ Ya kẹ Meri nọ wẹhẹ udẹn e kun fuẹin ṅanrannị wẹ gi mirin osisi nadị wẹ buchelẹni ihiẹn ọzọ mẹmẹ. Udẹn hụ k'e jun ihiẹn nọ kẹ ọgọ-nta ohu lẹ nkirishi. Ọ nọ hu ẹ ye Jesu ụkụ, e gi ntutu ẹ a lọgbu ẹ; udẹn hụ e kungbarị ụlọ hụ ile.

⁴ Kanị onyẹ nsọnmazụụn a ohu wụ Judasị nwa Iskarọtụ, Judasị hụn jẹnkọ d'e ren'ẹ, nọ sị,

⁵ “Kị haịn wẹ gilẹni re udẹnni egho-ọrụn akpọhịn ọgụn-mmisẹn, we egho ẹ ye ndị igbẹnnyẹ?”

⁶ (Ẹlẹ ni ndị igbẹnnyẹ rị a mkpa haịn o gi ku ihiẹnni. Kanị, onyẹ-ohin k'ọ wụ: ịya e dọnmẹni Jesu wẹ egho; o werisọnmẹ egho wẹ ye ẹ dọnmẹ.)

⁷ Ya kẹ Jizọsị nọ sị, “Hatu n'ẹ, n'o gigụọ a kwademẹ olili m.

⁸ Ụnụ lẹ ndị igbẹnnyẹ rị ogẹn ile, kanị mmẹ nwẹn esọnkọ ụnụ nọdịferi.”

E Zuni Wẹ Lazarọsụ Eje Umẹ

⁹ Ogẹn igunrun ndị Ju ahụn bịa mmẹmmẹ gi nụ nị Jesu rị Bẹtani, wẹ nọ bịa ebahụn. Kanị, ẹlẹ ufiri Jesu sụọ kẹ wẹ gi bịa, wẹ chọzị nị wẹ hụn Lazarọsụ hụn ọ gha ọnwụn weli.

¹⁰ Ya kẹ ndị-isi nchụn-ẹjan nọ zumẹni Lazarọsụ umẹ nị wẹ gbuzi ya nwẹn,

¹¹ makẹlẹ ufiri ẹ kẹ ndị Ju bu ọda gi rị a la wẹ a tọ, e kwerini Jesu.

Jesu A Banhan Jerusalẹm Nọkẹ Eze

¹² Ogẹn eki gi fọn, igunrun ahụn bịa Mmẹmmẹ-nghafe a nụ nị Jesu lala Jerusalẹm,

¹³ ya wẹ nọ werisọnmẹ iguru, jẹnmẹ d'e kunrun ẹ, e yi, “Ja nị Osolobuẹ mma; ngọzi ya rịnị onyẹ ahụn gi ẹfan Di-nwọnni-ẹnyi lala, ọjịja-mma ya rịnị Chuku hụn wụ Eze Izrẹlụ.”

¹⁴ Jesu nọ chọrị nwa jaki, nyinrin ẹ jẹnmẹ, nọkẹ kẹ Ẹkụkwọ-nsọ dọn ku — Ẹkụkwọ-nsọ sị:

¹⁵ “Obodo Zayọnụ, atụlẹ egun! Lee ẹ, Eze i lala; ọ rị elu nwa jaki.”

¹⁶ Ndị nsọnmazụụn Jesu aghọtanị ihiẹnni ogẹn hụ, kanị, ogẹn Jesu gi nwụnhụngụ lihi nwọnrin ọghọ kẹ wẹ gi nyanhan nị Ẹkụkwọ-nsọ ku ihiẹnni banyen'ẹ lẹni e mẹghọnị w'a ihiẹn ndịnị.

¹⁷ Ndị rị igunrun ahụn wẹ lẹ Jizọsị wị ogẹn o gi kpọpụha Lazarọsụ imẹ ili, gha ọnwụn weli ẹ, hụ a gwa ndị ọzọ ihiẹn mẹni.

¹⁸ Ya haịn igunrunni gi bịa d'e kunrun Jizọsị. Ọrụn-atụmẹnyanị wẹ nụ n'ọ rụn dọha wẹ.

¹⁹ Ya ndị Itu-Farisi nọ nwan sị ibe wẹ, “Ụnụ hụ a hụn a?! Ihiẹn ile ẹnyi rị e mẹ a rị a danye kaka! Lee n'ẹ, ụwa ile e sọnmẹgụọ a!”

Ndị Alị Ọzọ Hụn Chọha Jesu

²⁰ O nwọnzighọ ndị wụlẹni ndị Ju hụn bịa Jerusalẹm d'e fe ofufe ogẹn mmẹmmẹ hụ.

²¹ Wẹ nọ jẹn d'e kunrun Filipu hụn wụ onyẹ Bẹtisaịda rị imẹ Galili, sị a, “Diọkpa, ẹnyi chọ nị ẹnyi hụn Jesu.”

²² Filipu nọ jẹn d'a gwa Andrụ, wẹ ẹbụbụọ nọ wịrị d'a gwa Jesu.

²³ Jesu nọ za wẹ, sị, “Ogẹn e rugụọ w'e gi ye Nwa nke Ịhịan ọghọ.

²⁴ M rị a gwa ụnụ ezioku, mmanị akpụrụ ọka dan alị nwụnhụn, ọ karịkọ akpohu; kanị ọ nwụnhụn, ọ mị mkpụrụ ọda-ọda.

²⁵ Onyẹ ndụn a a sụọ k'e tuhu ẹ, kanị onyẹ e legberi ndụn a elu-ụwanị rị e dọnmẹ ẹ a tọnị ndụn itẹbitẹ.

²⁶ Onyẹ chọ n'ọ gbanị m odibo ya sọnmẹ m, nị ebe m rị kẹ odibo m k'a rị; Nẹdi m jẹnkọ d'e ye onyẹ k'a gbanị m odibo ọghọ.

²⁷ “Obi rị nwan e feri m. Kị m'e ku nwan? Nị m sị, ‘Baba, anịlẹ ogẹn afụnfụnnị bịanị m’? Mba! Makẹni, ya haịn m gi rị ebeni, m bịa kẹni m hụn ụzọ ta afụnfụnnị.

²⁸ Baba, ye ẹfan ị ọghọ!” Ya kẹ olu nọ gha elu-igwee sị, “E yegụọlẹ m ẹfan m ọghọ; m jẹnkọ nwan d'e yezi ẹ ọghọ.”

²⁹ Igunrun ahụn rị ebẹhụ a nụghọ olu hụ: Ụfọdụ sị, “Akpabọ rọ,” ndị ọzọ sị “Mmọn-ozi gwa a oku!”

³⁰ Kanị, Jesu nọ sị wẹ, “Ẹlẹkwọ ufiri m kẹ olu ahụn gi bịa, kalẹ ufiri ụnụ.

³¹ Kikẹnni kẹ wẹ jẹnkọ d'a ma ụwanị ikpe; kikẹnni kẹ wẹ sikọ d'a chụpụ onyẹ rị a kị ụwanị.

³² Mmẹ nwẹn, ogẹn w'e gi gha alị weshi m elu, m jẹnkọ d'a dọrị ịhịan ile.”

³³ Jesu gi ihiẹnni o ku ghọsị ụdị ọnwụn o jẹnkọ d'a nwụn.

³⁴ Ya kẹ igunrun hụ nọ sị a, “Iwu ẹnyi gwa ẹnyi nị Kraịstị jẹnkọ d'a rị ndụn jẹnrin ejẹn. Kị ị rị a sịnị nị wẹ sikọ d'e weshi Nwa nke Ịhịan elu? Onyẹ wụdẹ nwan Nwa nke Ịhịannị?”

³⁵ Jesu nọ sị wẹ, “Ukpẹ jẹnkọ d'e sọnzi ụnụ nọdị ẹkẹrẹ sụọ. A ghahunmẹ ni nwan hụnnị ụnụ nwọn ukpẹ, amamgbe ọhịhị a gbakunrun ụnụ idẹnmuzi, makẹni onyẹ ghakọ imẹ ishi amarịn ebe o jẹnkọ.

³⁶ Ya wụ, kwerinini ukpẹ hụnnị ụnụ nwọn ukpẹ, kẹni ụnụ hụn ụzọ wụrụ ụmụ ukpẹ.” Ogẹn Jesu gi kugụ ihiẹnni, ọ nọ pụnị wẹ, jẹn d'a warị.

Ihiẹn Wẹ Gi Oku Jesu Mẹ

³⁷ Ọsụọn'a nị Jesu rụn ọrụn-atụmẹnya bu ọda idẹnya wẹ, ekwerikwọnị wẹ.

³⁸ Ihiẹn onyẹ-amụma wụ Azaya ku nọ bụn, Azaya sị, “Di-nwọnni-ẹnyi, onyẹ kweri ozi ẹnyi zi? Onyẹ kẹ Di-nwọnni-ẹnyi ghọsị ihiẹnni o mẹ?”

³⁹ Asanị wẹ ẹka kweri: ọ nọhụ kẹ Azaya dọnzi ku ẹ, sị,

⁴⁰ “Chuku e mẹgụọ ẹnya kpu wẹ ishi, mẹ obi tikin wẹ — amamgbe wẹ e gi ẹnya wẹ legha ụzọ, gi obi wẹ ghọta, e gbehutọ wẹ d'e kunrun m; a zụọ m wẹ. Ya kẹ Chuku ku.”

⁴¹ Azaya ku ihiẹnni makẹni ọ hụngụọ ọghọ Jizọsị jẹnkọ d'e nwọn, ọ nọ ku oku Jizọsị.

⁴² K'osilẹrị, ndị-ndu bu ọda e kwerighọnị Jesu. Kanị, egun ndị Itu-Farisi anịnị wẹ ku ẹ ebe ịhịan rị, amamgbe w'a chụpụ wẹ imẹ ụlọ-ofufe.

⁴³ Mma ịhịan k'a ja wẹ ka wẹ a sụọ karị hụn Osolobuẹ k'a ja wẹ.

Ihiẹn Jesu Ku Kẹ Wẹ K'e Gi Han Eṅẹn

⁴⁴ Jesu nọ yi, “Onyẹ kwerinini m ẹlẹ mmẹ k'o kwerini, kanị onyẹ hụn zihẹni m.

⁴⁵ Onyẹ hụnnị m a hụngụọ onyẹ zihẹni m.

⁴⁶ M bịa imẹ ụwa d'a wụ ukpẹ kẹni, onyẹ kwerinini m, ọ rịkọ imẹ ishi.

⁴⁷ Onyẹ nụ ihiẹn m ku bụ o mẹn'ẹ, amakọ m'a ikpe. Makẹni, abịanị m d'a ma ụwa ikpe, m bịa d'a zụọpụha wẹ.

⁴⁸ Onyẹ hụn jụ mmẹ lẹ oku m nwọn onyẹ k'a ma a ikpe: ihiẹn m ku, ịya jẹnkọ d'a ma a ikpe Ụhụọhịn ikpanzụụn.

⁴⁹ Makẹni, ẹlẹ m gi uche m e ku; Nẹdi m hụn zihẹni m gwa m ihiẹn m sikọ d'a sị lẹ ihiẹn m sikọ d'e ku.

⁵⁰ A marịnghọ m nị ihiẹn o ku e ye ndụn itẹbitẹ. Ya wụ, ihiẹn Chuku-Nẹdi sị m ku kẹ m'e kuchanrịn.”