Jọnụ 11 - Ika

Isi Nke Mmanaị Ọnwụn Lazarọsụ

¹ O nwọn okẹnnyẹ ohu emu rị a kụ. Ẹfan a wụ Lazarọsụ. Onyẹ Bẹtani rọ. Ebẹhụ kẹ ya lẹ umunẹ ẹ wụ Meri lẹ Mata bi.

² Merini wụ hụn hu udẹn e kun fuẹin ye Di-nwọnni-ẹnyi wụ Jesu ụkụ, gi ntutu ẹ lọgbu ẹ; nwẹnẹ ẹ wụ Lazarọsụ kẹ emu rị a kụ.

³ Ya umunẹ ẹbụbụọ hụ nọ zi ozi jẹnni Jizọsị, sị, “Di-nwọnni-ẹnyi, emu rị a kụ ọwụ ị.”

⁴ Kanị, ogẹn Jizọsị gi nụ ihiẹnni, ọ nọ sị, “Emuni ẹlẹ nke ọnwụn, kama, o k'e wẹhẹni Osolobuẹ ọghọ; Nwa Osolobuẹ k'e gi ẹ nwọnrin ọghọ.”

⁵ (Ihiẹn Mata lẹ Meri nwẹnẹ ẹ lẹ Lazarọsụ a sụọ Jesu asụọ.)

⁶ Kanị Jesu a nụgụ nwan nị emu rị a kụ Lazarọsụ, ọ nọdịzị ebẹhụ ọ rị akpọhịn ẹbụọ!

⁷ Omẹgụ, ọ nọ sị ndị nsọnmazụụn a, “Nị ẹnyi kin ni Judia.”

⁸ Ndị nsọnmazụụn a nọ sị a, “Onyẹ-nkuzi, o ke te ndị Ju chọ nị wẹ ma ị ọmụma ebahụn, y'e d'e kinzi azụụn ebẹhụ?”

⁹ Jesu nọ sị, “Ẹlẹ mgbahunmẹ ọkụrọkụ mmẹbụọ kẹ eki gi a rị elu? Onyẹ e jẹnhunmẹ ogẹn eki gi rị elu ara kpọgburu, makẹni o gi ukpẹ rị ụwanị e legha ụzọ.

¹⁰ Kanị onyẹ gi ukinkin e jẹnhunmẹ a kpọgburu akpọgburu, makẹni ukpẹ arị imẹ ẹ.”

¹¹ Jesu e kugụ ihiẹnni, ọ nọzị sị wẹ, “Ụran e buruọlẹ ọwụ ẹnyi wụ Lazarọsụ, kalẹ, m jẹnkọ ebẹhụ d'a kpọtiẹn ẹ.”

¹² Ya ndị nsọnmazụụn a nọ sị a, “Di-nwọnni-ẹnyi, omẹni ọ rị ụran, n'ọ dịnhịnghọ.”

¹³ Jizọsị gi ẹ e ku n'ọ nwụnhụngụọ, kanị wẹ ro n'ọ rị e ku ụran mmaka.

¹⁴ Ya Jizọsị nọ gwapụ wẹ, “Lazarọsụ a nwụnhụngụọ,

¹⁵ kanị, ufiri ụnụ, m rị a ghọghọ nị arị m ebahụn, makẹni ihiẹn ụnụ e gi kweri e mẹgụọ. Pụha nị nwan nị ẹnyi d'e kunrun ẹ.”

¹⁶ Ya kẹ Tamọsị (hụn w'a kpọ Ejimẹ) nọ sị ndị nsọnmazụụn ibe ẹ, “Nị ẹnyi nwẹn jẹnzi, kẹni ẹnyi sọn onyẹ-nkuzi nwụn!”

Jesu Wụ Onyẹ Hụn E Weli Ndị Nwụnhụnnị

¹⁷ Ogẹn Jizọsị gi ru nke Lazarọsụ wẹ, ọ nọ hụn a nị Lazarọsụ a rịọlẹ imẹ ili ọrọgbọ akpọhịn ẹnọ.

¹⁸ Bẹtani nọkunmẹ Jerusalẹm, ẹgbata wẹ wụ ihiẹn rịkẹ maịlị ẹbụọ.

¹⁹ Ndị Ju bu ọda a bịaọlẹ d'a rọkọ Meri lẹ Mata obi yeni ọnwụn nwẹnẹ wẹ Lazarọsụ.

²⁰ Ogẹn Mata gi nụ nị Jizọsị lala, ọ nọ jẹnmẹ d'e kunrun ẹ. Meri nkẹ nọdị alị imẹ ụlọ.

²¹ Mata nọ sị Jesu, “Di-nwọnni-ẹnyi, omẹni i te rị ebeni, nwẹnẹ m eke nwụn.

²² Kanị a marịnghọ m nị kẹ hụnnị ọ nwụnhụngụ, Osolobuẹ jẹnkọ d'e ye i ihiẹn ọwụlẹ ị rịọ a.”

²³ Jizọsị nọ sị a, “Nwẹnẹ i jẹnkọ d'e lihi.”

²⁴ Mata nọ sị a, “A marịnghọ m n'o jẹnkọ d'e lihi Ụhụọhịn ikpanzụụn ndị nwụnhụnnị e gi lihi.”

²⁵ Ya kẹ Jizọsị nọ sị a, “Mmẹ e weli ndị nwụnhụnnị; mmẹ e ye ndụn. Onyẹ kwerinini m, ọ sụọ n'a nị ọ nwụnhụn anwụnhụn, o sikọ d'a rị ndụn;

²⁶ onyẹ ọwụlẹ rị ndụn hụn kwerinini m anwụnkọ, kaka. Y'e kwerighọ?”

²⁷ Mata nọ sị a, “Ẹghẹẹ Di-nwọnni-ẹnyi, e kwerighọ m nị yụ wụ Kraịstị Nwa Osolobuẹ, onyẹ ahụn wẹ rị e lee ẹnya a elu ụwa.”

Jizọsị A Kwan Ẹkwan

²⁸ Ogẹn Mata gi kugụ ihiẹnni, ọ nọ kin azụụn d'a kpọ nwẹnẹ ẹ wụ Meri. Ọ nọ kagwa a, sị a, “Onyẹ-nkuzi rị ebeni, ọ rị a kpọ ị.”

²⁹ Ogẹn Mẹri gi nụ ihiẹnni, ọ nọ felihi ozigbo, jẹn d'e kunrun Jesu.

³⁰ Jesu eke banyekwọ imẹ obodo hụ ogẹnni — echẹn k'ọ rịkwọ ebe Mata nọ kunrun ẹ.

³¹ Ndị Ju rị a rọkọ Mẹri obi, ndị ahụn wẹ lẹ ịya rị imẹ ụlọ, a hụn kẹ Meri felihi pụ, wẹ nọ sọnmẹ ẹ, makẹni wẹ ro n'o jẹnkọ ili ahụn d'a kwan ẹkwan.

³² Ogẹn Meri gi nwan ru ebẹhụ Jizọsị rị, ọ hụn Jizọsị, ọ nọ dan alị ụkụ a, sị a, “Euu, Di-nwọnni-ẹnyi, omẹni i te rị ebeni, nwẹnẹ m eke nwụn!”

³³ Ogẹn Jizọsị gi hụn k'ọ rị a kwan, hụnzị kẹ ndị Ju ya lẹ wẹ wị rị a kwan, o mẹtụ a ọda-ọda, ọ fụ a.

³⁴ Ọ nọ sị wẹ, “Ebe ụnụ liye ẹ?” Wẹ nọ sị a, “Di-nwọnni-ẹnyi, bịa d'e lee ẹ.”

³⁵ Ya kẹ Jizọsị nọ kwan ẹkwan.

³⁶ Ya ndị Ju ahụn nọ sị, “Euu, ihiẹn ẹ a sụọk'a!”

³⁷ Kanị o nwọnzighọ ndị sị, “Onyẹni shịapụ onyẹ ẹnya-ishi ẹnya, o ke saẹka mẹ okẹnnyẹni anwụnhụnlẹ?”

Jizọsị A Gha Ọnwụn Weli Lazarọsụ

³⁸ O mẹtụzị Jizọsị ọda-ọda; ọ nọ nọkunmẹ ili hụ wụ okporo wẹ gi ọmụma nukin ọnụ a.

³⁹ Jizọsị nọ sị, “Nupụ nị ọmụma hụ.” Mata, nwẹnẹ okẹnnyẹ hụ nwụnhụnnị nọ sị a, “Di-nwọnni-ẹnyi, o k'e shin ọda-ọda, makẹlẹ tannị mẹ akpọhịn ẹnọ wẹ li ẹ.”

⁴⁰ Jizọsị nọ sị a, “Agwanị m'ị n'i jẹnkọ d'a hụn ikẹn Osolobuẹ omẹni y'e kwerighọ?”

⁴¹ E nupụ wẹ ọmụma hụ; ya Jizọsị nọ weshi ẹnya elu, sị, “M rị a kpanmịn ị Baba, makẹni y'a nụgụọ ekpere m.

⁴² A marịngụọ m nị y'a nụ ihiẹn m ku ogẹn ile, kanị ndịnị rị ebeni haịn m gi ku ihiẹnni, kẹni wẹ kweri nị yụ zihẹ m.”

⁴³ O ku ihiẹnni, ya ọ nọ gi okẹn olu yi, “Lazarọsụ, pụha!!”

⁴⁴ Ya kẹ okẹnnyẹ nwẹn nwụnhụnnị nọ pụha, ya lẹ ẹkwa wẹ gi fụkpumẹ ẹ ụkụ lẹ ẹka lẹ hụn wẹ gi fụma a ihun. Jizọsị nọ sị wẹ, “Tọpụ n'a, hapụ a n'ọ lama.”

E Zuni Wẹ Jesu Umẹ Nị Wẹ Gbu Ẹ

⁴⁵ Imẹrinmẹ ndị Ju ahụn bịa d'a hụn Meri a hụn ihiẹn ndị Jesu mẹ, wẹ nọ kwerin'ẹ.

⁴⁶ Kanị o nwọnzighọ ndị jẹnmẹ d'e kunrun ndị Itu-Farisi, gwa wẹ ihiẹn Jizọsị mẹ.

⁴⁷ Ya ndị Itu-Farisi lẹ ndị-isi nchụn-ẹjan nọ kpọ ọgwa Ndị-isi Nkịkwama, sị, “Kị ẹnyi jẹnkọ d'e mẹ? Okẹnnyẹni rị a rụn ọrụn-atụmẹnya bu ọda!

⁴⁸ Ẹnyi yesọnmẹ ẹ efe ẹnịna, ịhịan ile jẹnkọ d'e kwerin'ẹ; ogẹn hụ, ndị Rom ẹnyi rị okpuru wẹ a bịa d'e bụpụ Ụlọ-nsọ ẹnyi lẹ ndị alị ẹnyi!”

⁴⁹ Ya kẹ onyẹ ohu imẹ wẹ wụ Kayafasị hụn wụ onyẹ-isi nchụn-ẹjan ahụa hụ nọ sị wẹ, “Ụnụ amarịn ihiẹn kaka!

⁵⁰ Ụnụ ahụnn'a n'ọ ka ụnụ mma nị onyẹ ohu nwụndọnni ịhịan ile ọnwụn, karị nị ndị alị ẹnyi ile a la iwi?”

⁵¹ Kanị, ẹlẹ ya gi uche ẹ ku ihiẹnni: ịya wụ onyẹ-isi nchụn-ẹjan ahụa hụ, amụma k'o bu ihiẹn hụ — nị Jesu jẹnkọ d'a nwụndọnni ndị Ju ọnwụn.

⁵² Ẹlẹdẹ ndị Ju sụọ kẹ Jesu sikọ d'a nwụndọnni, n'o gizighọ ọnwụn a wegbama ndị nke Osolobuẹ ile rị ebe ọwụlẹ.

⁵³ Gha ụhụọhịn hụ jẹnmẹ, ndị-ndu ndị Ju nọ tụma iroro w'e gi gbu Jesu.

⁵⁴ Ya kẹ Jesu nọ kpabehi ebe ịhịan rị imẹ Judia, ọ gha ebẹhụ pụ, shi ụmụ-alị nọkunmẹ atụ d'a nọdị obodo w'a kpọ Ifrem — ịya lẹ ndị nsọnmazụụn a nọ nọdị ebẹhụ.

⁵⁵ Mmẹmmẹ-nghafe e rumẹgụọ ogẹnni. Ndị Ju bu ọda nọ gha ụmụ-alị ichẹn-ichẹn jẹn Jerusalẹm d'e fegụ ẹhụ kẹ iwu wẹ dọn ku.

⁵⁶ Wẹ hụ a chọ Jesu; wẹ hụ a jụ ibe wẹ ajụjụ imẹ Ụlọ-nsọ, sị, “Ya wụ, ọ bịakọdẹ nwan mmẹmmẹni ra?”

⁵⁷ Ogẹn hụ, ndị-isi nchụn-ẹjan lẹ ndị Itu-Farisi e tigụọ iwu nị onyẹ marịn ebe Jesu rị ya bịa d'a gwa wẹ, kẹni wẹ nwụnrụn a.