Jọnụ 10 - Ika

Isi Nke Iri Ezigbo Onyẹ-ndu Atụnrụn

¹ “Ezioku kẹ m rị a gwa ụnụ, onyẹ ghalẹni ọnụmụzọ, kanị ọ gha ebe ọzọ nyinban ụlọ atụnrụn wụ ohin lẹ onyẹ a narịn ịhịan ihiẹn ẹ.

² Kanị hụn gha ọnụmụzọ banye wụ onyẹ-ndu atụnrụn ndị hụ.

³ Ịya kẹ onyẹ nche a kpọpụnị ụzọ; ịya kẹ atụnrụn a e gọn ntịn olu ẹ. Ọ kpọ atụnrụn a ẹfan, o dupụha wẹ.

⁴ O wepụhagụ atụnrụn a ile, o buruni wẹ ụzọ, e sọn wẹ ẹ, makẹni wẹ marịn olu ẹ.

⁵ Esọnkọ wẹ onyẹ wẹ marịnlẹni; ọsọ kẹ w'a gbadẹn'a, makẹni amarịn wẹ olu ẹ.”

⁶ Jizọsị gi iluni gwa wẹ oku, kanị a ghọtanị wẹ ihiẹn o gi ẹ ku.

Jizọsị Wụ Ezigbo Onyẹ-ndu Atụnrụn Hụ

⁷ Ya Jizọsị nọ nwan sị wẹ, “Ezioku kẹ m rị a gwa ụnụ, mmẹ wụ ọnụmụzọ atụnrụn a gha.

⁸ Ndị ọzọ ile bu m ụzọ bịa wụ ndị ohin lẹ ndị a narịn ịhịan ihiẹn ẹ; atụnrụn egọnni wẹ ntịn.

⁹ Mmẹ wụ ọnụmụzọ. Onyẹ gha m banye sikọ d'e nwọn nzụọpụha; o k'a gha e jẹn, a lụa, a hụnsọnmẹ ẹfịfịa e ri.

¹⁰ Ohin enwọn ihiẹn ọzọ ọ bịanị karị n'o d'e zun, n'o d'e gbu lẹ n'o d'e wiwi ihiẹn, kanị mmẹ nwẹn bịa kẹni wẹ nwọn ndụn, nwọn ẹ mmagi-mmagi.

¹¹ “Mmẹ wụ ezigbo onyẹ-ndu atụnrụn: Ezigbo onyẹ-ndu atụnrụn e gi ufiri atụnrụn a e ye ndụn a.

¹² Nke onyẹ wẹ we ọrụn, atụnrụn ndị ahụn ẹlẹ nke ẹ. Ọ hụn ẹwọrọ k'ọ lala, ọ la atụnrụn ndị hụ tọ, gbapụ — ẹwọrọ a nwụnrụn atụnrụn, mẹ wẹ gbayịya.

¹³ Onyẹ wẹ we ọrụn a gbapụ makẹni onwọnni ihiẹn ọ kpọ atụnrụn ndị hụ.

¹⁴ “Mmẹ wụ ezigbo onyẹ-ndu atụnrụn. A marịnghọ m atụnrụn m; atụnrụn m a marịnghọ m —

¹⁵ nọkẹ kẹ Nẹdi m dọn marịn m, mmẹ nwẹn a marịn Nẹdi m. M rị e gi ufiri atụnrụn ndị hụ e ye ndụn m.

¹⁶ M nwọn atụnrụn ndị ọzọ rịlẹni igunrunni. M jẹnkọ d'e wẹhẹzi wẹ; wẹ k'e gọn m ntịn. Wẹ ile a wụrụ igunrun ohu lẹ onyẹ-ndu ohu.

¹⁷ Ihiẹn m sụọ Nẹdi m makẹ ndụn m nị m rị e ye, hụn m k'e werizi.

¹⁸ Onwọnni onyẹ rị a napụ m ndụn m; mmẹ rị e gi uche m e ye ẹ. Iyen'ẹ lẹ iwerizin'ẹ rịchanrịn m ẹka. Ẹrịra kẹ Nẹdi m gwa m.”

¹⁹ Ya kẹ ndị-ndu ndị Ju nọ kebezi yeni ihiẹn ndịnị ọ rị e ku.

²⁰ Ndị bu ọda imẹ wẹ sị, “Eje-mmọn rị imẹ ẹ; ẹra rị a pụ a! Kị ẹnyi rị e gọnn'ẹ ntịn?”

²¹ Ndị ọzọ sị, “Oku ndịnị ẹlẹ oku onyẹ eje-mmọn rị imẹ ẹ. Nị eje-mmọn saẹka shịapụ onyẹ ẹnya-ishi ẹnya?”

A Jụ Wẹ Jesu

²² Mgbe ndị Ju gi zu imẹ Jerusalẹm ogẹn oyi, e mẹ Mmẹmmẹ Idọndọnzi Ụlọ-nsọ nsọ,

²³ Jizọsị ghakọ ẹtu-ụlọ Solomọnụ hụn rị ezi-ọgwa Ụlọ-nsọ,

²⁴ ya ndị-isi ndị Ju nọ fihunmẹ ẹ, sị a, “Elee ogẹn kẹ y'e kọnmẹru ẹnyi obi elu? Omẹni yụ wụ Kraịstị, Onyẹ ahụn Osolobuẹ tumẹ, gwapụ ẹnyi?”

²⁵ Jizọsị nọ sị wẹ, “A gwagụọ m ụnụ, ụnụ ekwerini. Ọrụn-atụmẹnya ndị m gi ẹfan Nẹdi m a rụn rị a shịanị m ẹri,

²⁶ kalẹ ụnụ ekwerikwọnị, makẹni ụnụ ẹlẹ atụnrụn m.

²⁷ Atụnrụn m e gọn m ntịn egọn; a marịnghọ m wẹ; w'e sọn m esọn.

²⁸ M'e ye wẹ ndụn itẹbitẹ; alakọ wẹ iwi. Onwọnni onyẹ sikọ d'a napụ m wẹ.

²⁹ Nẹdi m hụn we wẹ che m ẹka ka ihiẹn ile; onwọnni onyẹ jẹnkọ d'a saẹka wepụ wẹ ẹka Nẹdi m.

³⁰ Mmẹ lẹ Nẹdi m wụ ohu.”

³¹ Ndị-ndu ndị Ju nọ burusọnmẹzi ọmụma nị wẹ magbu ẹ.

³² Jizọsị nọ sị wẹ, “A rụnghọsịgụọ m ụnụ ọrụn-ọma bu ọda gha ẹka Nẹdi m bịa: imẹ wẹ ile elee hụn ụnụ k'a manị m ọmụma?”

³³ Ndị Ju hụ nọ sị, “Ẹlẹ ọrụn rị mma kẹ ẹnyi k'a man'ị ọmụma, kanị, arụ ị ku. Makẹni yụ wụ ịhịan mmaka weri enwẹn i n'ị wụ Osolobuẹ.”

³⁴ Jesu nọ sị wẹ, “Ẹlẹ wẹ de ẹ imẹ Iwu ụnụ, sị, ‘E kugụọ m'a nị ụnụ wụ mmọn’?

³⁵ Ọ kpọgụọ ndị ahụn wẹ zijẹnni oku Osolobuẹ mbụ ‘mmọn’ bụ w'a ra hutọ oku rị imẹ Ẹkụkwọ-nsọ,

³⁶ onyẹ hụn Chuku-Nẹdi dọn nsọ zihẹ imẹ ụwa kẹ ụnụ rị nwan a kpọ oku ẹ arụ, makẹni m sị, ‘M wụ Nwa Osolobuẹ’?

³⁷ Omẹni arị m a rụn ọrụn Nẹdi m, egilẹ ni ihiẹn m ku dọn.

³⁸ Kanị omẹni m hụ a rụn wẹ, ọsụọn'a nị ụnụ egini oku m dọn, gi ni ọrụn-atụmẹnya ndị m rụn dọn, kẹni ụnụ marịn lẹ n'o we ụnụ ẹnya nị Chuku-Nẹdi rị imẹ m, mmẹ nwẹn rị imẹ Chuku-Nẹdi.”

³⁹ Ya wẹ nọ chọzị nị wẹ nwụnrụn a, kanị ọ nọ gbụnahịn wẹ.

⁴⁰ Ya Jizọsị nọ kinzi azụụn, fetu Iyi Jọdanị, shi ebẹhụ Jọnụ te nọ e mẹ ịhịan mirin-Chuku ogẹn mbụ, ọ nọ nọdị ebẹhụ.

⁴¹ Ndị bu ọda nọ bịa d'e kunrun ẹ, Wẹ hụ a sị, “Jọnụ arụnnị akpụ ọrụn-atụmẹnya ohu, kanị, ihiẹn ile Jọnụ ku banyeni okẹnnyẹni wụ ezioku.”

⁴² Ya ndị bu ọda nọ kwerini Jesu ebahụn.