Jọnụ 1 - Ika

Isi Nke Ohu Jesu Wụ Oku Osolobuẹ

¹ Isi mbidọn, onyẹ hụ wụ Oku Chuku rị arị; onyẹ hụ wụ Oku Chuku lẹ Chuku rị; onyẹ hụ wụ Oku Chuku wụ Chuku.

² Ya lẹ Chuku rị isi mbidọn.

³ Chuku ke ihiẹn ile rịnị ghahan'a; onwọnni ihiẹn Chuku ke hụn o kelẹni ghahan'a.

⁴ Imẹ ẹ kẹ ndụn rị; ndụn hụ wụ ukpẹ ịhịan ile.

⁵ Ukpẹ hụ e nwun imẹ ishi, kanị ishi a s'ẹka tinyụn a.

⁶ O nwọn okẹnnyẹ ohu Osolobuẹ zihẹ; ẹfan a wụ Jọnụ.

⁷ Ọ bịa d'a shịanị Ukpẹ hụ ẹri, kẹni ịhịan ile nụ ẹri ẹ, kweri.

⁸ Ẹlẹ ya wụ Ukpẹ hụ, kalẹ ọ bịa d'a shịanị Ukpẹ hụ ẹri.

⁹ Onyẹ hụn wụ Ezigbo Ukpẹ hụn e ye ịhịan ile ukpẹ lala imẹ ụwa ogẹn ahụn.

¹⁰ Ọ rị imẹ ụwa, hụn Osolobuẹ gi ẹ ke, kanị ụwa amarịnn'a.

¹¹ Ọ bịa d'e kunrun ndị nke ẹ, kanị ndị nke ẹ anabanhann'a.

¹² Kanị, ndị ile nabanhann'a, ndị ile kwerinin'ẹ, o ye wẹ ikẹn nị wẹ wụrụ ụmụ Osolobuẹ:

¹³ ẹlẹ ịhịan mụ wẹ; egini wẹ uche ịhịan mụ wẹ, onwọnni okẹnnyẹ han wẹ mụ wẹ, kama, Osolobuẹ mụ wẹ.

¹⁴ Oku Chuku nọ họnrin ịhịan, sọn ẹnyi biri elu-ụwa. Ẹfọma lẹ ezioku jun imẹ ẹ! Ẹnyi a hụnọlẹ ikpẹn ẹ, ikpẹn akpụ Nwa ohu Chuku-Nẹdi mụ rọ.

¹⁵ Jọnụ ku oku ẹ, yi, “Ọnwan wụ onyẹ hụn m rị e ku ogẹn m gi sị, ‘Onyẹ hụn lalanị m mẹmẹgụ ka m, makẹlẹ ọ rị a rị nị wẹ d'a mụ m.’ ”

¹⁶ Ẹfọma ahụn jun imẹ ẹ hụ e ru ẹnyi ẹka mmagi-mmagi.

¹⁷ Osolobuẹ ye Iwu ghahanị Mozizi; kanị ẹfọma lẹ ezioku gha ẹka Jesu Kristi bịa.

¹⁸ Onwọnni onyẹ hụntu Osolobuẹ, kanị akpụ Nwa ohu ọ mụ sụọ, hụn wụ Osolobuẹ, hụn ya lẹ Nẹdi ẹ rị, e mẹgụọ ẹnyi marịn Osolobuẹ.

Kẹ Jọnụ Hụn E Mẹ Mirin-Chuku Dọn Shịanị Jesu Ẹri

¹⁹ Ọnwan wụ ẹri Jọnụ shịa ogẹn ndị-ndu ndị Ju gi gha Jerusalẹm zihẹ ndị nchụn-ẹjan lẹ ndị Livaị d'a jụ a, “Onyẹ k'ị wụ?”

²⁰ Jọnụ nọ kupụ a, ọ ghọrịnị; ọ sị wẹ, “Ẹlẹ m Kraịstị.”

²¹ Wẹ nọzị jụ a, “Onyẹ k'ị wụ nwan? Ịyụ wụ Ẹlaịja?” Ọ nọ sị, “Ẹlẹ mmẹ.” Wẹ nọ jụzị a, sị, “Ịyụ wụ Onyẹ-amụma hụ pụ-ichẹn?” Ọ sị, “Mba.”

²² Wẹ nọ sị a, “Onyẹ k'ị wụ nwan? Gwa ẹnyi nị ẹnyi marịn ihiẹn ẹnyi sikọ d'a gwa ndị zini ẹnyi. Onyẹ k'ị sị ya k'ị wụ?”

²³ Ọ nọ gi ihiẹn onyẹ-amụma wụ Azaya ku za wẹ, sị, “Mmẹ wụ olu hụ rị e yi oro imẹ atụ, a sị, ‘Kwa nị ụzọ Di-nwọnni-ẹnyi n'o zinrin!’ ”

²⁴ Ndị Itu Farisi hụn rị imẹ ndị hụ wẹ zihẹn'ẹ

²⁵ nọ jụ a, “Kị haịn nwan i gi e mẹ mirin-Chuku omẹni y'ẹlẹ Kraịstị mọbụ Ẹlaịja mọbụ Onyẹ-amụma hụ pụ-ichẹn?”

²⁶ Jọnụ nọ sị wẹ, “M gi mirin mmaka e mẹ mirin-Chuku, kanị o nwọn onyẹ turu imẹ ụnụ hụn ụnụ marịnlẹni.

²⁷ Ịya wụ onyẹ hụ lalanị m mẹmẹgụ. Erudẹni m onyẹ sikọ d'a tọpụ eriri akpụkụ a.”

²⁸ Ọnwan mẹ imẹ Bẹtani, nfetu Jọdanị, ebe Jọnụ nọ rị e mẹ mirin-Chuku.

Jizọsị Wụ Nwa-ebulu Osolobuẹ

²⁹ Eki e fọn, Jọnụ nọ hụn Jizọsị k'ọ lala, Jọnụ nọ sị, “Lee n'ẹ! Ọnwan wụ Nwa-ebulu Osolobuẹ hụn e wepụ njọ ụwa!

³⁰ Ịya kẹ m rị e ku ogẹn m gi sị, ‘M mẹmẹgụ, okẹnnyẹ ohu kanị m lala.’ Ịya ka m makẹni ọ rị arị nị wẹ d'a mụ m.

³¹ E te marịn m'a, kanị m rị e mẹ mirin-Chukuni m rị e gi mirin e mẹ kẹni ndị Izrẹlụ marịn a.”

³² Jọnụ shịa ẹri, sị, “M hụn Mmọn-nsọ k'ọ gha elu-igwee hidanla nọkẹ nduru, nọkwasị a.

³³ E te marịn m'a, kanị onyẹ hụn zi m d'e gi mirin mẹ ịhịan mirin-Chuku sị m, ‘Onyẹ i jẹnkọ d'a hụn kẹ Mmọn-nsọ hidan nọkwasị, ịya wụ onyẹ hụ jẹnkọ d'e gi Mmọn-nsọ mẹ ịhịan mirin-Chuku.’

³⁴ A hụnọlẹ m'a; e kuọlẹ m nị ịya wụ Nwa Osolobuẹ.”

Ndị nsọnmazụụn Ibuzọ Jesu Kpọ

³⁵ Eki e fọn, ebe Jọnụ lẹ ndị nsọnmazụụn a ẹbụọ wuzozi,

³⁶ Jọnụ hụ e lee Jesu ebe ọ ghafekọ, ya ọ nọ sị, “Lẹhụ Nwa-ebulu Osolobuẹ!”

³⁷ Ndị nsọnmazụụn Jọnụ ẹbụbụọ ahụn a nụ k'o ku ihiẹnni, wẹ nọ sọnmẹ Jesu.

³⁸ Jesu e gbehutọ, hụn wẹ kẹ wẹ rị e sọn ẹ, ọ nọ sị wẹ, “Kị ụnụ chọkọ?” Wẹ nọ sị, “Rabaị, elebe k'i bi?” (“Rabaị” wụ “Onyẹ-nkuzi.”)

³⁹ Ọ nọ sị wẹ, “Bịa nị d'e lee ẹ.” Wẹ nọ jẹn d'a hụn ebe o bi; ihiẹn rịkẹ ọkụrọkụ ẹnọ efinnaị rị a kụ ogẹn hụ; wẹ nọ du ẹ nọdịchanrịn ụhụọhịn hụ.

⁴⁰ Onyẹ ohu imẹ madụ ẹbụbụọnị nụ ihiẹn Jọnụ ku sọnmẹ Jesu wụ Andrụ nwẹnẹ Saịmọnụ Pita.

⁴¹ Ọ nọ bu ụzọ chọjẹn nwẹnẹ ẹ wụ Saịmọnụ, sị a, “Ẹnyi a hụnọlẹ Onyẹ Nzụọpụha Hụ Osolobuẹ Tumẹ hụn wụ Kraịstị.”

⁴² Andrụ nọ we Saịmọnụ d'e kunrun Jizọsị. Jizọsị nọ bu ẹnya tụma Saịmọnụ, sị a, “Yụ wụ Saịmọnụ nwa Jọnụ. Ẹfan ị jẹnkọ nwan d'a wụ Kẹfasị.” (Kẹfasị wụ Pita ọnụ Griki hụn wụ Ọmụma).

⁴³ Eki e fọn, Jesu chọ n'o jẹn Galili; ọ hụn Filipu, ọ nọ sị a, “Sọnmẹ m.”

⁴⁴ Filipu wụ onyẹ Bẹtisaịda, obodo Andrụ lẹ Pita.

⁴⁵ Filipu a hụn Natanẹlụ, ọ nọ sị a, “Ẹnyi a hụnọlẹ onyẹ hụ Mozizi de imẹ Iwu, onyẹ ahụn wẹ dezikwọ imẹ ẹkụkwọ ndị-amụma — Jesu onyẹ Nazarẹtị nwa Josẹfụ rọ.”

⁴⁶ Natanẹlụ nọ sị a, “Nị ihiẹn rị mma saẹka gha Nazarẹtị pụha?” Filipu nọ sị a, “Bịa d'e lee.”

⁴⁷ Ogẹn Jizọsị gi hụn Natanẹlụ k'ọ lala d'e kunrun ẹ, ọ nọ sị, “Ọnwan wụchanrịn onyẹ Izrẹlụ hụn nwọnlẹni ẹro!”

⁴⁸ Ya kẹ Natanẹlụ nọ sị a, “Nanị ị dọn marịn m?” Jizọsị nọ sị a, “A hụngụọdẹ m'i k'ị rị okpuru osisi figi hụ nị Filipu d'a kpọ ị!”

⁴⁹ Natanẹlụ nọ sị, “Onyẹ-nkuzi, eziẹ ịyụ wụ Nwa Osolobuẹ; ịyụ wụ Eze ndị Izrẹlụ!”

⁵⁰ Jizọsị nọ sị a, “Y'e kweriọlẹ makẹni m gwa ị hụ nị m hụn ị okpuru osisi figi?! Ị jẹnkọ d'a hụndẹ ihiẹn ndị ka ọnwan!”

⁵¹ Ọ nọ sị a, “M rị a gwa ụnụ ezioku, ụnụ jẹnkọ d'a hụn kẹ elu-igwee kpupụ, hụn ndị mmọn-ozi Osolobuẹ rị e jẹnjẹn e jẹnlụa ebe Nwa nke Ịhịan rị.”