Jona 4 - Ika

Isi Nke Ẹnọ Iwe Jona lẹ Omikẹn Osolobuẹ

¹ Kanị, ẹfọ asụọnị Jona ụsụọ kaka — nị Osolobuẹ etikpọzịnị ndị Ninivẹ, iwe nọ we ẹ.

² Ya Jona nọ mẹ ekpere sị Osolobuẹ, “Heuu Osolobuẹ! Ekuni m'ẹ nị m d'a gha ụlọ buli n'i jẹnkọ d'e mẹ ẹnịna? Ịya haịn m te gi gbashikọ Tashishi. Amarịnghọ m n'ị wụ Chuku hụn e ro ịhịan, n'i wụ Onyẹ-omikẹn; nị y'a ra bukẹnrin olulu; nị y'e nwọnkẹ ihiẹn-ọsụsụọ ịhịan, nị y'e rohutọ a latọ afụnfụn i te k'e ye ịhịan.

³ Gbu m nwan, Osolobuẹ, nị ọnwụn ka m mma karị nị m rị ndụn a hụn ihiẹnni.”

⁴ Ya kẹ Osolobuẹ nọ jụ Jona kẹ o furughọ n'o we iwe.

⁵ Jona nọ gha imẹ obodo pụ, jẹnmẹ d'a nọdị alị ẹbamịn ọwụwa-ẹnyanwụn obodo ahụn; o mẹmẹrin ọdụ, nọdị alị igungun ẹ, e che n'ọ hụn ihiẹn k'e mẹ obodo ahụn.

⁶ Ya kẹ Osolobuẹ wụ Chuku nọ mẹ ogiri-igbọn pu ebẹhụ, m'ẹ sue, kpumẹ ebe Jona rị kẹni o ye ẹ igungun — kẹni ẹhụ fu ẹ. Ẹfọ nọ sụọma Jona ọda-ọda nị ya wụ ihiẹn hụ ebẹhụ.

⁷ Kanị, e ki e fọn, Chuku nọ zi ọwụwụ, ọ nọ rigbu ihiẹn-akụnkụn hụ, ọ nọ shinwụn.

⁸ Anwụn a mụma, Chuku nọ zihẹ ufere rị a nụ ọkụn gha ẹbamịn ọwụwa-ẹnyanwụn bịa, ọ nọ feye Jona isi ọda-ọda, o d'a fọhị; ọ nọ chọma ọnwụn, a sị, “Ọnwụn te ka m mma.”

⁹ Ya kẹ Chuku nọ jụ a kẹ o furughọ n'o ze ize nị ihiẹn-akụnkụn hụ shinwụn eshinwụn. Jona nọ za, sị, “Ize k'e ze m nụ! O d'e zegbudẹ m!”

¹⁰ Ya kẹ Osolobuẹ nọ sị a, “Ọ rị a fụ ị nị osisi hụ e shinwụn? Osisi o mẹ ni ẹlẹ yụ kụn a, ẹlẹ yụ zụn a? Osisi punihụ, eki e fọn ọ nwụnhụn?

¹¹ Kị wụ nwan n'ọ fụkọ m nị obodo Ninivẹ chọ n'ọ la iwi? Obodo uku hụn ihiẹn karị madụ nnụ ọgụn-mmisẹn (120,000) marịnlẹni ẹka-nni wẹ lẹ ẹka-ekpẹn wẹ bi imẹ ẹ; obodo hụ ihiẹn-uriri jun.”