Jona 3 - Ika

Isi Nke Ẹtọ Jona E Kweri Nwan D'e Zi Ozi Osolobuẹ

¹ Osolobuẹ nọzị gwa Jona oku, sị a,

² “Lihi ọtọ; jẹnmẹ obodo uku hụ wụ Ninivẹ ozigbo d'e zi ndị rịn'a ozi m zi i.”

³ Ya Jona nọ nwan mẹ ihiẹn Osolobuẹ ku: o buli, jẹnmẹ Ninivẹ. Obodo hụ wụ Ninivẹ shịa ọda-ọda — akpọhịn ẹtọ kẹ wẹ gi a ghachanrịn a.

Ndị Ninivẹ E Kweri Ozi Osolobuẹ

⁴ Jona nọ ghama obodo hụ: Ogẹn o gi ghapụ akpọhịn ohu, ọ nọ hị, “Akpọhịn ọgụnnaị sụọ k'ọ họdụ nị wẹ tikpọ Ninivẹ!!”

⁵ Ya ndị Ninivẹ nọ kweri ozi Osolobuẹ. Wẹ nọ kpọye ibu-ọnụ. Kẹ ndị-uku kẹ ndị-nta, ịhịan ile nọ yiri ẹkwa achọ wẹ gi a kwan ụya.

⁶ Makẹni, ogẹn eze Ninivẹ gi nụ ihiẹnni, ọ gha ukpo-eze ẹ lihi ọtọ, yipụ ẹwuru-nze, yiri ẹkwa-achọ, dịnọ ikpọn ntụn.

⁷ Ya ọ nọ zi wẹ d'a hịnị ndị Ninivẹ ya, sị: “Ọnwan wụ uhi eze lẹ ịhaịmẹ: onwọnni onyẹ k'e ri ihiẹn ọwụlẹ; kẹ ịhịan kẹ anụmanụ, kẹ ewu kẹ efin kẹ atụnrụn — w'e bulẹ ihiẹn ọwụlẹ che ọnụ: w'e rilẹ; w'a ralẹ!!

⁸ Ịhịan ile lẹ anụmanụ ile wẹ yiri ẹkpa tikanị, wẹ weshi olu elu kpọku Osolobuẹ ọhụnma-ọhụnma! Onyẹ ọwụlẹ ya bihutọ ẹka, ya latọ eje-obibi lẹ ẹka-ikẹn ẹ!!

⁹ Onyẹ marịn? Ikẹnkwọ Osolobuẹ e gharị, ikẹnkwọ olulu ẹ a rọ, ẹnyi a hụn isi.”

¹⁰ Ogẹn Osolobuẹ gi hụn ihiẹnni wẹ mẹ, hụn kẹ wẹ dọnmẹ latọsọnmẹ eje-omumẹ wẹ, ọ gharị, o mẹzini wẹ ihiẹn ọ sị o k'e mẹ wẹ.