Jona 2 - Ika

Isi Nke Ẹbụọ Ekpere Jona Mẹ Imẹ Ẹfọ Azụn

¹ Ya kẹ Jona nọ mẹ ekpere imẹ ẹfọ azụn hụ rịọma Osolobuẹ wụ Chuku ẹ, sị,

² “Kẹ m rị imẹ nsọngbu, m nọ kpọku Osolobuẹ, ọ nọ za m; imẹ-imẹ alị mmọn kẹ m ghadẹ kpọku i, ị nọ za m.

³ Ịyụ tụ m ye imẹ okẹn mirin, tụ m ye imẹ-imẹ ohimin; ẹregede mirin nọ rukpumẹ m, a kpọ m, e buhunmẹ m.

⁴ Ya m nọ sị, ‘Euu, y'a chụpụọlẹ m ebe ọ rị kanị m k'e leghazị Ụnọ-NSỌ!’

⁵ “Mirin ahụn ile e rukpumẹ m n'o gbu m, ohimin e fihunmẹ m, ẹfịfịa-mirin a fụkpumẹ m isi.

⁶ E rubanchanrịn m imẹ-imẹ mirin — rudẹ ebe ugu gha suepụha; a banyedẹ m alị-mmọn, ọ nọ kpọkin m ye jẹnrin-ejẹn. Kanị, ịyụ Osolobuẹ wụ Chuku m nọ gha imẹ Mgbugbu gbapụha m.

⁷ “Ogẹn ndụn m gi lakọ, m nọ nyanhan ị, Osolobuẹ, m nọ mẹ ekpere rịọ ị; ekpere m nọ ru ebe ị rị imẹ Ụnọ-NSỌ ị.

⁸ Ndị hụn e fe mmọn nwọnlẹni isi a latọgụọ ihiẹn yụ lẹ wẹ kwerigbama.

⁹ Kanị mmẹ nwẹn k'e gi ẹbụ okele bịa d'a chụnyen'i ẹjan; m k'e mẹ ihiẹn m kwe i nkwa a. Ẹka ị Osolobuẹ sụọ kẹ nzụọpụha gha a bịa!!”

¹⁰ Ya kẹ Osolobuẹ nọ gwa azụn hụ oku, ọ nọ gbọpụha Jona ye mkpẹnrẹn mirin.