Jobu 8 - Ika

Isi Nke Ẹsatọ Ihiẹn Bidadị Shịarị Jobu “Njọ Buhẹ Nsọngbuni”

¹ Ya Bidadị onyẹ Shu nọ sị:

² “Elee mgbe y'e kubehi oku nọ ẹnịna? Oku rị a gha ị ọnụ a pụha nọ kẹ okẹn ufere mmakalaka.

³ Chuku a handẹ eje-eṅẹn ra? Onyẹ Hụ Nwọn Ikẹn Ile a sịdẹ nwan nị ihiẹn rị mma jọ njọ ra?

⁴ Omẹni ụmụ ị mẹ ẹ njọ, ya wụ nị o mẹgụọ wẹ gi isi buru njọ wẹ.

⁵ Kanị, omẹni i k'e bu ẹnya zinmẹ Chuku, rịọ Chuku, Onyẹ Hụ Nwọn Ikẹn Ile, dodo,

⁶ omẹni obi i a rịghọ ọchan lẹ ni y'a kụrụghọ ọtọ, Chuku k'e gi ufiri i lihi — kẹ hụnnị ihiẹn nọ ẹnịna, wekin i ọnọdị furuni i.

⁷ Ihiẹn ile ị wụ mbụ k'a nọkẹsị onwọnni ihiẹn wẹ wụ, makẹni o k'a masịn'ị ọda-ọda ihun.

Bidadị Sị Ndị Mbụ Ka Ẹnyi Ihiẹn A Marịn

⁸ “D'a jụ wẹ oku elu-mbụ, kẹn'i hụn ihiẹn ndị nẹdi ẹnyi wẹ marịn —

⁹ makẹni ụnyanhụn hụra kẹ wẹ mụ ẹnyi — onwọnni ihiẹn ẹnyi marịn; ẹnyi nọhụ kẹ onyinyọn, ẹnyi eke tọ atọ elu-ụwanị.

¹⁰ Wẹ k'a kuzi i, gwa ị ihiẹn wẹ marịn. Wẹ k'a gwa ị ihiẹn wẹ ghọta.

¹¹ Nị achara-mirin papirọsụ sue usue omẹni ọrịnị mkpẹnrẹn-mirin? Nị achara-iyi sue ọhụnma omẹni mirin arị a?

¹² Ara kẹrẹdẹni wẹ ka imẹ ọnọdị hụ, wẹ e shinwụnkẹnrin karịdẹ ẹfịfịa ndị-ọzọ.

¹³ Ẹrịra kẹ onyẹ ọwụlẹ zọ Chuku e jẹn; ẹrịra k'o kpuye onyẹ ghalẹni a tụ egun Osolobuẹ.

¹⁴ Ihiẹn a kpagini k'ọ rị e gi e dọn ẹnya; ntan-akpụkpa k'ọ rị a tụkwasị obi.

¹⁵ Ọ danbemẹ ntan-akpụkpa hụ ọ danbemẹ, kanị, ntan-akpụkpa nwẹn nọ bihi; o fiedọn ntan-akpụkpa, ọ nọ nahịn a.

¹⁶ Ọ nọhụ kẹ ihiẹn-akụnkụn wẹ gba mirin ọhụnma, hụn anwụn rị a ma ọhụnma, rị a washi agalaba azụụn ile imẹ ugbo;

¹⁷ o gidẹ mkpọgụn a fịfịrị ikpọn ọmụma, e weridẹ ọnọdị ebe ọmụma rị.

¹⁸ Kanị wẹ huepụ a hụ ọnọdị a, ebẹhụ o te rị a jụ a, sị, ‘Ahụntuni m'i.’

¹⁹ O shinwụn, ihiẹn ọzọ e pupụha alị ebẹhụ.

²⁰ Ya wụ, Chuku ara jụ onyẹ nwọnlẹni nkọrịanị mọbụ na ndị e mẹ eje-ihiẹn ẹka.

²¹ O k'e mẹzi ẹmụ jun i ọnụ, mẹ oro ịghọghọ jun i ụgb'ọnụ.

²² Ifẹnrẹn k'e mẹgbu ndị-iṅẹnrẹn i, ụlọ ndị eje-ịhịan arịkọzị.”