Jobu 7 - Ika

Isi Nke Ẹsa Afụnfụn-afụnfụn Kẹ Ịhịan Rị Elu-ụwa

¹ “Ẹlẹ afụnfụn-afụnfụn kẹ ịhịan rị elu-ụwanị? Ẹlẹ elu onyẹ wẹ we ọrụn kẹ ịhịan e bi?

² Kẹ igbọn rị ọrụn dọn a tụ ẹnya ẹnyasị anwụn gi a rọ lẹzi kẹ onyẹ wẹ we ọrụn dọn a tụkẹnmẹ ẹnya ụgwọ-ọrụn a,

³ ẹrịra kẹ wẹ rị e mẹ m e che ochiche ọlaliwi ifọn-ifọn; ẹrịra kẹ wẹ rị e mẹ m a kwan ẹkwan ọlaliwi uhinhin ile.

⁴ M dinẹ, e romẹ m, ‘Elee mgbe m'e lihidẹ nwan ọtọ?’ Eki a jụ n'o fọnkọ, a tọ m e kperehunmẹ eki e we fọn.

⁵ Ọhọrị lẹ ẹjan e jun m ẹhụ ile, ẹtẹ lẹ ẹbụn e jun m akpụkpọ-ẹhụ.

⁶ Ogẹn m hụ a gha ozigbo-ozigbo nọkẹ ẹka rị a kpa ẹkwa; o d'a gụnahịn m hụ kẹ oruru — bụ onwọnni ebe o weshikọ m.

Jobu A Kwanghọsị Chuku

⁷ “Euu Chuku nyanhankwọ nị onwọnni ihiẹn ndụn m wụ karị uzun; nị onwọnzini ogẹn ẹfọ e gi sụọ m ụsụọ.

⁸ Ẹnya rị a hụnnị m kikẹnni ahụnkọzị m; ị k'a chọ m, kanị y'a hụnkọzị m.

⁹ Kẹ orukpu dọn e fọnpụ, fọnpụchanrịn — ẹrịra kẹ onyẹ jẹn imẹ ili ghalẹni e kinhẹn azụụn.

¹⁰ Ọ lụahakọzị iwe ẹ, ebe o bi amarịnkọzị a.

¹¹ Ya wụ, agbakọ m nkịtịn; m k'e ku ẹ k'o dọn rị a fụ m akpobi, m k'e ku ẹ k'ọ dọn rị a fụ m.

¹² M wụdẹ nwan ohimin mọbụ eje-anụ ohimin, i gi kpọkin m ye ra?

¹³ M sị enwẹn m nị elu-ukpo kẹ ẹhụ a nọ fu m, nị m dinẹ, ranhịn, kẹ nsọngbu m a nọ belụa,

¹⁴ y'e gizidẹ nrọ e rọn m egun ebẹhụ, e mẹ m a hụn ọhụn egun gi a tụgbu m,

¹⁵ nke wụ nị ọ kadẹ m mma nị wẹ rụkwọn m olu, gbu m, karị nị m rị ndụn imẹ ẹhụ m nị.

¹⁶ Ize ndụn m rị e ze m; achọnị m nị m tọ e bi. Hapụ m ye, nị elu m enwọnzini isi.

¹⁷ Kị ịhịan wụdẹ nwan i gi e ke ẹ nke ẹnịna, i gi e buchekẹnmẹ ẹnya ẹnịna ebe ọ rị;

¹⁸ i gi e nyọnchan a ụtụntụn ile, e lele ẹ ogẹn ile?

¹⁹ Y'e bupụkọ m ẹnya, mọbụ yedẹni m efe njube-ẹnya ohu?

²⁰ Omẹni o nwọn njọ m mẹ, kịnị kẹ m gi ẹ mẹ i? Ịyụ, hụn e ke ịhịan nke! K'ị rị e dọnni m kẹ anụ? E họnringụọdẹ m'i nwan okẹn ibu olu ra?

²¹ Kị haịn i gilẹni a gbagharị m mmẹfie m ile, kị haịn i gilẹni gi njọ ndị m mẹ hụnma? O biekọkwọ a lashi m imẹ ẹjan d'e dinẹ; ị k'a chọ m, kanị, arịkọzị m'a.”