Jobu 6 - Ika

6 Isi Nke Isin Jobu A Shịarị N'ọ Rịnị Nfe

¹ Ya Jobu nọ sị:

² “Omẹni afụnfụn m te k'a nị wẹ ma nị wẹ marịn k'ọ nyịnhan; omẹni nsọngbu m te k'a nị lele elu skelu nị wẹ marịn k'ọ nyịnhan!

³ Nkẹ ọ nyịnnahịn ẹjan rị ohimin! Ya haịn m gizilẹni e rogụ d'e ku.

⁴ Onyẹ Hụ Nwọn Ikẹn Ile e gigụọ ụta gba ọbara-ụta jun m ẹhụ, ẹdide wẹ te wẹ hụ e ru mmọn m; Chuku e bugụọ ihiẹn-egun bu ọda tọnị m.

⁵ Omẹni jaki ọfịa a hụngụọ ẹfịfịa o k'e ri, n'o yimẹzi oro? Omẹni okẹn-efin a hụngụọ ihiẹn o k'e ri, n'ọ rịamazị?

⁶ W'e ridẹ ihiẹn-oriri ghalẹni asụọ nnu rịlẹni, ra ebẹhụ a chan ụchan imẹ ẹkwan a sụọ asụọ?

⁷ Emẹtụkọ m'a ẹka; ihiẹn-oriri nọ ẹrịra a kụ m emu!

Jobu Sị Ọnwụn Ka A Mma

⁸ “K'ọ rị m, e mẹni wẹ m ihiẹn m rị a rịọ; k'ọ rị m, Chuku e mẹ ihiẹn m rị a tụ ẹnya a.

⁹ K'ọ rị m, Chuku e kweri gwerinrin m, kweri gi ndụn a ile ti m ihiẹn k'e gbuni m!

¹⁰ Ogẹn ahụn, obi e gi ihiẹn ohu ru m alị — ihiẹn ohu hụn m gi a ghọghọ imẹ okẹn-ụfụnị ghalẹni e bi: nị onwọnni ogẹn m gi latọ oku Onyẹ Hụ Rị Nsọ.

¹¹ Elee ndụn kẹ m nwọnzi m'e gi bi, hụn m k'e gi ufiri ẹ nwọnmẹ olilẹnya? Kị m'e gizi nwan ufiri ẹ bi, hụn m'e gi dinmẹ ndidin?

¹² M zedẹ nwan kẹ ọmụma ra ẹhụ m wụdẹ igwe-bronzu?

¹³ M nwọndẹ nwan ndụn m'e gi yeni enwẹn m ẹka, ra m nwọnzi nwan ndụn hụnnị wẹ napụgụ m ihiẹn m gi wụrụ ịhịan?

Ndị Ọwụ M Asazịnị Ẹka Turu

¹⁴ “Ndụn gụ ịhịan, o furu nị ndị ọwụ a yen'ẹ ẹka, ọsụọn'a n'ọ rịzịnị a tụ egun Onyẹ Hụ Nwọn Ikẹn Ile.

¹⁵ Kanị umunẹ m ndịnị efuruni w'e gi dọn ẹnya; wẹ nọhụ kẹ iyi ndị hụ mirin wẹ e jungụ, a tahịzị — lekẹ iyi ndị e junghafegụ okẹn,

¹⁶ ogẹn ọkpụkpụ mirin rị e dẹnhinni gi rị e huye wẹ, ogẹn mirin oyi ọchan kpụkpụrụnị rị a rịnranpụnị gi e mẹ wẹ e jun;

¹⁷ kanị ọhọhị bịa, a tahị wẹ; uwowo bịa, arịkọzị wẹ ote wẹ.

¹⁸ Ndị-ijẹn ghapụha nị wẹ ra, ahụnkọ wẹ, a wahunmẹmẹ wẹ, a chọ mirin, washidẹ alị ọkpọ-nkụn, ọnwụn e gbu wẹ.

¹⁹ Ndị-afịa Tẹma a chọjẹn mirin ebẹhụ, ndị-ijẹn Shẹba rị ụzọ e bu wẹ obi nị mirin hụ ebẹhụ.

²⁰ Kanị, o kpuye k'o kpuye wẹ, makẹni wẹ te buchanrịn obi wẹ che ẹ; e ru wẹ nwan ebẹhụ, onwọnni mirin wẹ hụn ra!

²¹ Ụnụ nọ nwan kẹ iyi ndị ahụn; ụnụ a hụngụọ ihiẹn-egun, egun a tụma ụnụ.

Kị Wụ Njọ M?

²² “A sịtughọ m ụnụ, ‘Yedọn ni ni m ihiẹn’? A sịtughọ m ụnụ, ‘Gi ni ihiẹn ụnụ nwọn kụpụnị m ụgwọ m gi’?

²³ A sịtughọ m, ‘gbapụha nị m ẹka ndị-iṅẹnrẹn m mọbụ zụọpụha nị m ẹka ndị ẹfọ-njọ’?

²⁴ Gwa nị m, nị m hụn ụzọ gba nkịtịn; ghọsị nị m ebe m nọ mẹfie.

²⁵ Ezioku a fụkẹnmẹkẹ ụfụ! Kị ụnụ gi nwan ndọndọ ụnụ ile ghọsị?

²⁶ Ụnụ rịdẹ nwan a chọ nị ụnụ ghọsị nị ekuni m'ẹ ọhụnma, nị ụnụ mẹ oku-ọnụ onyẹ ndụn rị a gụ rịkẹ ufere mmakalaka?

²⁷ Nkẹ ụnụ a tụdẹ mkpọ gi weri nwa nwọnlẹni nẹdi; nkẹ ụnụ a hịụndẹ ọwụ ụnụ repụ a.

²⁸ Dodo ni, budẹ ni nwan ẹnya zinmẹ m. Nị m tụma nwan ntụ idẹnya ụnụ?

²⁹ Weri ni nwayọ; amalẹ ni onyẹ nwọnlẹni ihiẹn o mẹ ikpe; lebanzịnị ẹnya ihiẹn ụnụ rị e ku, n'o nwọnni ogẹn m gi latọ ezi-omumẹ.

³⁰ M gidẹ nwan ọnụ m e ku eje-ihiẹn ra? Ọnụ m ku eje-ihiẹn, ọ marịnkọ?