Jobu 5 - Ika

Isi Nke Isẹn Kpọ Oku Eyemẹka

¹ “Ọ sụọ ị y'a hị — onyẹ jẹnkọ d'a za ị? Elee mmọn-ozi k'i burukọ nwan?

² Iwe-ẹnya e gbu onyẹ-nzuzu; ẹnya-ụfụ e gbu onyẹ marịnlẹni ihiẹn.

³ Mmẹ nwẹn a hụngụọ kẹ onyẹ marịnlẹni Osolobuẹ gbọrịma, kanị idẹnmizi Osolobuẹ nọ bụ ikpụlọ a ọnụ,

⁴ ụmụ a nọ rị imẹ nsọngbu, wẹ hụ e mẹgbu wẹ imẹ ụlọ-ikpe — makẹni enwọn wẹ onyẹ e kuni wẹ ọnụ wẹ.

⁵ Ndị ẹgụn e ripụ ihiẹn-ugbo ẹ, kẹ hụn ogun fịfịmadẹ; ọ hụ a gụn wẹ kẹ mirin nị wẹ weridẹ akụ-lẹ-ụba a.

⁶ Afụnfụn ara gha alị suepụha; nsọngbu ara gha alị pupụha —

⁷ nsọngbu-nsọngbu a bịanị ịhịan — k'o dọn mẹni elu-elu kẹ ọkụn e nwunshi.

⁸ Omẹni mmẹ rọ, nkẹ m'a rịọma Chuku; ịya nkẹ m'e kinghọsị.

⁹ Ọ rụnsọnmẹ ihiẹn a tụ ẹnya, hụn wẹ ghalẹni asẹka a ghọta ọrụn-atụmẹnya wẹ ghalẹni as'ẹka a gụngụ.

¹⁰ O mẹ mirin e zueye elu ụwa, o zi mirin e ye ugbo lẹ ọfịa.

¹¹ O bushi ndị e welụa enwẹn wẹ alị elu. O wepụha ndị rị a kwannị imẹ nsọngbu.

¹² Ọ kpayịya ihiẹn ndị ẹro romẹ, amamgbe ihiẹn gha aghanị wẹ.

¹³ O gi ihiẹn ndị akọ romẹ a nwụn wẹ, ndị ẹro zugụ umẹ, o mẹ ẹ la iwi.

¹⁴ Ishi a gbakunrun wẹ ebe eki rị elu; efinnaị, wẹ hụ e bi ẹka lekẹ sị uhinhin rọ.

¹⁵ O gi ẹ a zụọpụha ndị nwọnlẹni eyemẹka ọnụ ọpịa hụn rị ndị-ejẹni ọnụ, a zụọpụha wẹ ẹka ndị zeni.

¹⁶ Ogbẹnnyẹ e gi ẹ nwọn olilẹnya, mmẹgbu e kpumẹ ọnụ.

¹⁷ Ya wụ, onyẹ hụn Chuku sị ‘Ẹlẹ ẹrịra, mẹmẹ ẹ ẹnịna’ e nwọnkẹ ngọzi; elegberilẹ nwan mkpịnsịn hụn Onyẹ Hụn Nwọn Ikẹn Ile rị a fịan ị.

¹⁸ Ọ rụ ịhịan ẹhụ nke-esi, kanị o kẹnmẹzi ebe ọ rụ a ẹhụ ekẹnmẹ, ọ rụ ịhịan ẹhụ a rụ, kanị ẹka a a zụọzịkwọ ịhịan azụọ.

¹⁹ Osolobuẹ k'a gbapụhadẹ i imẹ eje-ihiẹn isin — ọsụọn'a ẹsa, erukọ wẹ i ẹhụ.

²⁰ Ụnwụn bịa, o k'a gbapụha ị ẹka ọnwụn, agha bịa, o k'a gbapụha ị ọnụ ọpịa.

²¹ O k'e kpumẹ i amamgbe eje-oku e ru i ẹhụ; ntikpọ bịa, egun atụkọ ị.

²² Ị k'a mụ ntikpọ lẹ ụnwụn ẹmụ, egun eje-anụ ụwa atụkọ ị.

²³ Ịyụ lẹ ọmụma rị alị ugbo hụn a nọkin ndị-ọzọ ụzọ k'e họnrin ọwụ, ẹgbata yụ lẹ anụ-ọfịa k'a rị mma.

²⁴ Obi jẹnkọ d'e ru i alị n'o nwọnni ihiẹn k'e mẹ ụlọ ị; ị k'a gụn ihiẹn i, y'a hụn a n'o nwọnni hụn tuhuni.

²⁵ Obi k'e ru i alị nị ụmụ ị k'e bu ọda, nị agbọ ị k'e jun kẹ irurue rị alị.

²⁶ Ị k'a kakpụkpọgụ i kebe nwụnhụn, nọkẹ ọka wẹ be ogẹn-ọka, kpọntọ.

²⁷ Ẹnyi e lekpọgụọ ihiẹnni; ezioku rọ; nụ a nwan, y'e gi ẹ bi.”