Jobu 42 - Ika

Isi Nke Ẹbụọ Kwasị Ọgụnnaị Jobu A Rịọma Osolobuẹ

¹ Ya kẹ Jobu nọ sị Osolobuẹ,

² “A marịnghọ m nị ị k'a s'ẹka mẹ ihiẹn ile; onwọnni ihiẹn ị chọ n'i mẹ w'a s'ẹka a kụsị.

³ Y'a jụghọ kẹ ‘Onyẹ wụ hụnnị rị e ku kẹ sị ọ marịnghọ uche m bụ ọ marịn ihiẹn ọ rị e ku?’ Eziẹ, e kughọ m ihiẹn m ghọtalẹni, okẹn ihiẹn ndị m marịnlẹni.

⁴ Y'a sịzịghọ, ‘Gọn nwan ntịn nị m ku; m k'a jụ ụtaa, n'ị za m'a.’

⁵ Ọnụnụ mmakalaka kẹ ntịn m te nụ banyeni i, kanị ẹnya m a hụngụọ ị nwan.

⁶ Ifẹnrẹn enwẹn m e mẹgbugụọ m; E rogharịgụọ m nwan, a gwọrị m imẹ uzunzun lẹ ntụn!”

Kẹ Osolobuẹ Dọn Dọnzini Jobu Ihiẹn Osolobuẹ Sị Jobu Mẹni Ndị Kpasu Iwe Ekpere

⁷ Osolobuẹ a gwagụ Jobu ihiẹn ndịnị, Osolobuẹ nọ sị Ẹlifazị onyẹ Tẹmanị, “M rị e weni yụ lẹ ndị ọwụ ị ẹbụọ iwe, makẹni ụnụ ekuni kẹ m nọ ọhụnma kẹ odibo m wụ Jobu dọn ku.

⁸ Weri ni nwan okẹn-efin ẹsa lẹ ebulu ẹsa d'e kunrun odibo m wụ Jobu; gi ni wẹ chụnnị enwẹn ụnụ ẹjan w'a dụn ọkụn — odibo m wụ Jobu e mẹni ụnụ ekpere, e gi m ufiri Jobu nụ ekpere hụ, amamgbe m'e ye ụnụ afụnfụn makẹ nzuzu ụnụ zuzu — makẹni ụnụ ekuni ihiẹn ụnụ ku banyeni m ọhụnma, kẹ odibo m wụ Jobu dọn ku.”

⁹ Ya Ẹlifazị onyẹ Tẹmanị, Bidadị onyẹ Shu lẹ Zofa onyẹ Naama nọ mẹ ihiẹn Osolobuẹ sị wẹ mẹ; Osolobuẹ nọ gi ufiri Jobu kweri ihiẹn Jobu rịọ.

Osolobuẹ E Yekin Jobu Ihiẹn Tuhuni

¹⁰ Ogẹn Jobu gi mẹgụnị ndị ọwụ a ekpere, Osolobuẹ nọ mẹ ihiẹn rịzịnị Jobu mma, yekinchanrịn a ihiẹn ile o nwọn mbụ ụzọ ẹbụọ-ẹbụọ.

¹¹ Ya umunẹ ẹ ikẹnnyẹ ile lẹ umunẹ ẹ ikpoho ile lẹ ndị ile marịn a mbụ nọ bịa d'e sọn ẹ ri oriri iwe ẹ. Wẹ nọ rọkọ a obi, mẹ obi sụọ a ụsụọ, yeni nsọngbu ile Osolobuẹ te bukwasị a. Onyẹ-onyẹ nọ ye ẹ akpụrụ-siliva lẹ ọla goru.

¹² Osolobuẹ gọzi Jobu karị k'ọ dọn gọzi ẹ mbụ. Jobu nọ nwan nwọn atụnrụn Nnụ uku mmẹnọ (14,000), anyịnyan-kamẹlụ nnụ-uku isin (6,000), okẹn-efin nnụ-uku ẹbụọ (2,000) wẹ gi a rụn ugbo lẹ onyẹnnyẹ jaki nnụ-uku (1,000).

¹³ Ọ mụzị ikẹnnyẹ ẹsa lẹ ikpoho ẹtọ.

¹⁴ Ọ gụn okpoho ibuzọ a Jemaịma, nke ẹbụọ Kẹzia, nke ẹtọ Kẹrẹn-Hapuku.

¹⁵ Onwọnni ebe wẹ nọ a hụn ikpoho mahan mma kẹ ụmụ Jobu ikpoho ndịnị. Uwẹ lẹ umunẹ wẹ ikẹnnyẹ kẹ nẹdi wẹ ye ukuu ẹ.

¹⁶ Kẹ ihiẹn ndịnị mẹgụ, Jobu nọ tọzị ahụa ọgụn-ẹsa; ọ tọ d'e ru n'ọ hụn ụmụ a lẹ ụmụ-ụmụ a d'e rudẹ agbọ nke ẹnọ.

¹⁷ Ya ọ nọ nwụnhụn, ebe ọ kakpụkpọgụ; ọ tọ ọhụnma-ọhụnma.