Jobu 41 - Ika

Isi Nke Ohu Kwasị Ọgụnnaị Osolobuẹ A Gwasọnmẹ Jobu Oku Eje-anụ Wụ Lẹvịatanị

¹ “N'ị s'ẹka gi ukpo nwụn eje-anụ mirin wụ Lẹvịatanị dọkpụnpụha? N'ị s'ẹka gi eriri kẹn ẹ ire?

² N'ị s'ẹka we ụdọ gha a imi mọbụ gi ukpo hapu ẹ agban?

³ N'ọ rịọma ị dodo, a rịọ ị a rịọdọnzi kẹni i mẹn'ẹ omikẹn? N'o gi ọnụ alụlụa gwa ị oku?

⁴ N'ọ gwẹrụ (gwarị) kweri hụn ọwụlẹ i ku, kweri n'i gi ẹ họnrin igbọn i o we nwụn?

⁵ N'i s'ẹka gi ẹ gu egu kẹ nnụnụ mọbụ limẹni ụmụ-ị-ikpoho ya nị wẹ gi ẹ gu egu?

⁶ Nị ndị yụ lẹ wẹ gba e gbu azụụn kumẹ ọnụ egho w'e gi ṅọn ẹ? Nị wẹ jakịkanị ndị-afịa anụ a?

⁷ N'ị s'ẹka gi obo hụ wẹ e kẹnye eriri zupu ẹ akpụkpọ ẹhụ ra obo mmaka wẹ gi e gbu azụn k'i k'e gi zupu ẹ isi?

⁸ I ma-ama mẹtụ a ẹka, o mẹ i ihiẹn wẹ ghalẹni a zọ, y'e kwekọzị maye ẹ.

⁹ Onyẹ sị n'o k'e mẹri ẹ rị a tụ ntụ; ọ pụhahụ, ndụn a gụ onyẹ te sikọ d'a mayen'ẹ.

¹⁰ Onwọnni onyẹ egun a nị a kpọtiẹn ẹ. “Onyẹ kẹ egun k'a nị nwan che m ọgụn?

¹¹ Onyẹ kẹ m gi ụgwọ hụn m k'a kụrịrị? Mmẹ nwọn ihiẹn ile rị okpuru igwere.

¹² M k'e kuzidẹ oku ụkụ Lẹvịatanị lẹ ẹka a lẹ ndụn ile o nwọn lẹzi kẹ m dọn dọnkwamachanrịn ẹhụ a ọhụnma.

¹³ Onyẹ k'a s'ẹka han a akpụkpọ? Onyẹ k'a s'ẹka zupu ẹhụ a hụn nọ kẹ ẹwuru-igwe?

¹⁴ Onyẹ k'a s'ẹka nyawa ọnụ a ahụn, ọnụmụzọ ahụn rị a ihun, hụn wẹ gi eze ẹ ahụn e rọn egun ghahunmẹ?

¹⁵ Azụụn a wụ akpaịn-akpaịn hụn wẹ dọnyesọnmẹ ogele-ogele, wẹ ile nyangbama nke wụnị ẹgbata arịd'a;

¹⁶ wẹ nọkunmẹ ibe wẹ ọhụnma-ọhụnma nke wụnị ufere ara sadẹ ẹka gha ẹgbata wẹ.

¹⁷ Wẹ nyanrịn ibe wẹ ọhụnma-ọhụnma; nyangbama kẹnkẹnkẹn — nke wụnị asakọ wẹ ẹka nyanpụ wẹ.

¹⁸ O ziẹn uziẹnrẹn, ukpẹ e be ‘nwaịn!’ Ẹnya a e nwun kẹ ebe ẹnyanwụn ụtụntụn nọ wa.

¹⁹ Ọkụn rị e nwunni hụ a gha a ọnụ e hupụha; ikeke-ọkụn hụ a pụha.

²⁰ Ẹnwụnrụn hụ a gha a imi a lọpụha nọkẹ ite rị a gbọnị lẹ ẹfịfịa rị a dụn ọkụn.

²¹ Uzun o kunpụha e mẹ ikeke-ọkụn e nwunrun ọkụn; ọkụn a ghazịdẹ a ọnụ a pụha.

²² Akwanran olu Lẹvịatanị e zekẹ; ọ pụha, ndụn a gụ onyẹ ọwụlẹ.

²³ Uru-ẹhụ a ze ọda-ọda; ọ nọ kẹ igwe, ara mẹhunmẹ.

²⁴ Obi ẹ ze kẹ ọmụma — lekẹ ọlọ wẹ gi a kwọ ihiẹn.

²⁵ O helihụ, ẹhụ a mama dikẹn nni; O mẹhunmẹ k'o dọn e mẹhunmẹ, e gi wẹ egun gbama ọsọ.

²⁶ Onyẹ rị e be ẹ ọpịa rị e mẹ mmaka — kẹ onyẹ rị a tụd'a obo-uku mọbụ obo-nta.

²⁷ O mẹdẹ igwe kẹ ẹfịfịa ọkpọ-nkụn, e mẹ igwe-bronzu kẹ osisi rehigụnị.

²⁸ Ara gbanị obo ọsọ; wẹ gbad'a araba, ọ rị a hụ kẹ irinrin ẹfịfịa ọka ọkpọ-nkụn.

²⁹ Ẹgbee nọ a hụ kẹ ifunfun achara ẹhụ; obo wẹ tụ a lalanị ebe ọ rị, ẹmụ a nahịn a.

³⁰ Ihiẹn a tụ nkọ kẹ mpekele ite jun ẹ okpuru ẹfọ; nrịrị a nọhụ kẹ ugbẹnrẹn ihiẹn wẹ gi a rụn ẹfịfịa e vinye alị.

³¹ O gberụrụ ohimin ọ nọ kẹ ite rị a gbọnị, a rụrụ ohimin kẹ udẹn-ori rị a gbọnị.

³² Ọ ghakọnị imẹ mirin ebe ọ gha hụ e be nwaịn-nwaịn, ịhịan e ro ni ohimin pu ẹwọ.

³³ Onwọnzini ihiẹn yin'ẹ imẹ ụwa — anụ egun ghalẹni a tụ.

³⁴ Lẹvịatanị e legberi eje-anụ ọzọ ile; ịya wụ eze eje-anụ ile.”