Jobu 40 - Ika

Isi Nke Ọgụnnaị

¹ Osolobuẹ nọzị sị Jobu:

² “Onyẹni rị a hụn ihiẹn Onyẹ Nwọn Ikẹn Ile mẹlẹni ọhụnma, n'o ghọsị a nwan k'o dọn dọnzi ẹ? Onyẹ hụn sị ihiẹn o mẹ arị mma, y'a shịarị a nwan!”

Jobu A Rịọma Osolobuẹ

³ Ya kẹ Jobu nọ sị Osolobuẹ,

⁴ “Onwọnni ihiẹn m wụ, dodo — kịnị kẹ m k'a shịarị ị? E gigụọ m nwan ẹka kpukin ọnụ!

⁵ E kuọlẹ m kukarịdẹ; ashịarịkọ m dodo, ẹlẹ m k'e kuzi.”

Osolobuẹ A Gwazị Jobu Oku Ikẹn Osolobuẹ

⁶ Ya Osolobuẹ nọ gha imẹ ẹbi shịarị Jobu, sị,

⁷ “Kwademẹ nke okẹnnyẹ; m k'a jụ ị ajụjụ, n'ị za m.

⁸ Ị rị nwan a sị nị a ma m han eṅẹn ra? N'ị ma m ikpe ebe ị rị e kin nị ẹka ị rị ọchan?

⁹ Y'e nwọnghọ ẹka hụn a kpa ikẹn kẹ nke Chuku? Nị olu i s'ẹka wụrụ akpara kẹ nke ẹ?

¹⁰ Gi nwan ọghọ lẹ ikpẹn kẹn ekikẹn kẹ Chuku, y'e yiri mgbaye lẹ ọghọ-eze kẹ ya.

¹¹ Hupụha nwan ọnụma ị, lee onyẹ mpache ọwụlẹ ẹnya, y'e welụa a alị.

¹² Lee onyẹ mpache ọwụlẹ, y'e wetu ẹ alị; gbupụ ndị-ejẹ ebe wẹ wuzo ozigbo-ozigbo.

¹³ Ligbama wẹ ile ye imẹ alị; kpọkin wẹ ye alị-mmọn.

¹⁴ Ogẹn ahụn, mmẹ lẹ enwẹn m e kweyen'i, ku ẹ — nị ẹka ị k'a s'ẹka zụọpụha ị.

Eje-anụ Wụ Behemọtụ

¹⁵ “Ledẹ enyi-mirin, hụn m ke kẹ m dọn ke i, hụn e ri ẹfịfịa kẹ okẹn-efin.

¹⁶ Ledẹ ukun ẹ — ebe ikẹn ẹ rị; lezidẹ akwanran ghahunmẹ ẹ ẹfọ!

¹⁷ O mẹ ọdụndụn a e shiri kẹ osisi sida; ọgbọdọgbọ a wụ akwanran-akwanran.

¹⁸ Ọkpụkpụ a nọsọnmẹ kẹ igwe-bronzu nwọn okporo, ụkụ lẹ ẹka a nọsọnmẹ kẹ adansụn-igwe.

¹⁹ Ya kẹ wẹ e buzọ a kpọ imẹ ihiẹn ndị Chuku ke. Onyẹ hụn sị nị ịya ke ẹ ya gi ọpịa nọkunm'ẹ.

²⁰ Elu-òke k'ọ nọ a kpa nni, anụ-ọfịa ile rị ebẹhụ hụ e gu egu.

²¹ Okpuru akasị-mirin wụ lotusu k'o dinẹ, a warị imẹ ẹfịfịa ridi rị mkpẹnrẹn-mirin.

²² Ẹhụhụọ akasị-mirin e ye ẹ igungun; pọpla ndị rị e sue mkpẹnrẹn-mirin e kpumẹzi ẹ ekpumẹ.

²³ Ọsụọn'a nị iyi rị e hu ikẹn-ikẹn, egun ara tụ a; onwọnni ihiẹn e mẹn'ẹ, ọsụọdẹn'a nị Iyi Jọdanị ru ẹ ọnụ.

²⁴ Ẹnya a zuerini kẹ wẹ k'a hụndẹ nwan tikpọ ra ọnyan kẹ wẹ k'e gidẹ nwụn a, hapu ẹ imi?