Jobu 4 - Ika

Isi Nke Ẹnọ Oku Ibuzọ Ẹlifazị Ku

¹ Ya Ẹlifazị onyẹ Tẹmanị nọ sị:

² “Dodo, omẹni ịhịan sị n'ọ gwa ị ẹkẹrẹ oku, n'o ze i ize? Onyẹ k'a sa nwan ẹka gbachanrịn nkịtịn?

³ Nyanhankwọ nị y'a dụngụọ ndị bu ọda ọdụn, y'e mẹgụọ ẹka ndị zelẹni kẹnrẹn.

⁴ Oku-ọnụ ị a ghọdọngụọ ndị te kpọgburuni; y'e mẹgụọ mkpụkụ ndị zelẹni kẹnrẹn.

⁵ Nsọngbu a bịan'ị nwan, ndụn a gụ ị; o rugụọ ị nwan ẹhụ, ẹhụ a rọ ị.

⁶ Y'a nịkọ egun-Osolobuẹ rị imẹ i mẹ obi ru i alị? Y'e gikọ obibi nwọnlẹni nkọrịanị ị rị e bi nwọnrin olilẹnya?

⁷ Lee nwan ẹnya: Onyẹ kẹ ẹka a rị ọchan latu iwi? Gwalele m: O nwọntughọ onyẹ ẹka a rị ọchan la ntikpọ?

⁸ A hụnọlẹ m'a nị ndị hụn kụn eje-ihiẹn lẹ ndị ghaye nsọngbu, a ghọrị a.

⁹ Chuku kunhụ uzun kpu wẹ, a la wẹ iwi; o gi olulu ẹ mẹ wẹ ihiẹn, nke wẹ a gụ.

¹⁰ Ẹwọrọ nwọn ikẹn dẹn, dẹnchanrịn ihiẹn ahụn ile o dẹn, kanị eze okoro-ẹwọrọ e tikwọn etikwọn.

¹¹ Ẹgụn e gbudẹ ẹwọrọ egbu; ụmụ onyẹnnyẹ-ẹwọrọ a gbayịyadẹ agbayiya.

Ihiẹn Wẹ Gwa M Nzuzue

¹² “Wẹ gi nzuzue wẹhẹni m ozi, ọ nọ feban m ntịn.

¹³ Ebe nrọ m rọ rị e hue m uhue imẹ uhinhin, ogẹn hụ okẹn ụran gi e buru ịhịan,

¹⁴ egun nọ tụma m, ẹhụ a mama m nni, mẹ ọkpụkpụ m ile mẹhunmẹ.

¹⁵ Ihiẹn ohu nọ ghafe m ihun lekẹ ufere, akpata-oyi nọ gba m.

¹⁶ Ọ kụsị, kanị amarịn m ihiẹn ọ wụ. Ihiẹn ohu nọ wuzo ihun m, m nọ nụ kẹ olu ohu rị e ku ẹkẹrẹ-ẹkẹrẹ, a sị:

¹⁷ ‘Nị ịhịan a nwụnnị kadẹ Chuku ọchan a rị ra? Nị ịhịan rịnahịn Onyẹ ken'ẹ ọchan?

¹⁸ Omẹni Chuku egini idibo ẹ dọn ẹnya; omẹni ndị mmọn-ozi ezun'ẹ oke ẹnya —

¹⁹ kị wụzị ịhịan hụn bi ẹhụ wẹ gi ụrụa kpụ, ẹhụ wẹ gi uzunzun gbe iyetọ a, hụn kadẹ nfe ogwepịa karị akpụkpa?!

²⁰ Eki fọn, a mụ wẹ wẹ; eki gini e gi, e tipipịagụọ wẹ wẹ; wẹ gini d'a marịn, a lagụọ wẹ iwi jẹnrin ejẹn.

²¹ Wẹ huepụhụ ụdọ wẹ gi limẹ ụlọ ahụn w'a kpụkpọrị hụn wụ ẹhụ wẹ, a nwụnhụn wẹ bụ onwọnni ihiẹn wẹ marịn?’