Jobu 39 - Ika

Isi Nke Mmitenẹi Kwasị Ọgụn

¹ “Y'a marịnghọ ogẹn ewu ọfịa bi elu ugu gi a mụ nwa? Y'e letughọ onyẹnnyẹ ele ebe ọ rị a mụ nwa a?

² Y'a gụntughọ ifọn ole nwa a nọhan wẹ ẹfọ? Y'a marịnghọ ogẹn wẹ gi a mụ?

³ Ogẹn wẹ gi a makpuru a mụ ụmụ wẹ, imẹ rị e mẹni wẹ e bi;

⁴ Mmụ wẹ e sue, kara, imẹ ọfịa ebẹhụ, jẹnmẹ nke wẹ, w'ara kinhẹnzi.

⁵ Onyẹ mẹ jaki-ọfịa a kpahunmẹ? Onyẹ tọpụ a eriri?

⁶ Mmẹ bu ẹ che alị ọkpọ-nkụn biri, mẹ ẹ e bi ebe ẹfịfịa ghalẹni e sue.

⁷ Ọ mụ ụzụn ndị bi imẹ obodo ẹmụ — onwọnni onyẹ a kịn'a — ọrịwụzị iyin'ẹ oro.

⁸ Elu oke k'ọ nọ a chọ ẹfịfịa o ri, a chọhunmẹ ẹhụhụọ-oyiyi ọwụlẹ.

⁹ Nị okẹn-efin ọfịa kweri fe i kẹ nke ụlọ? N'ọ dịnọ ụlọ-anụ ị imẹ uhinhin?

¹⁰ N'ị s'ẹka kẹnmẹ ẹ gi ẹ dụkpọ alị-ugbo kẹ efin-ụlọ? N'o sọn i azụụn, a dụkpọ alị azụụn wẹ nọ a rụn ugbo?

¹¹ N'i gi ẹ dọn ẹnya makẹni ndụn a rịka a? N'ị la ọrụn ị tọn'a rụn?

¹² N'ị la ọka ị tọn'a bulụan'ị, kpọnhẹn ẹ ebe ị nọ a kụkpọ ọka?

¹³ Nnụnụ wụ ọstrichi gha e fe nku kpakpakpa, ọ hụ a sụọ a, kanị, n'o gi nku lẹ ugbele hụ lepụ ụmụ a ẹnya kẹ stọkụ dọn e mẹ?

¹⁴ Akpakalị k'o yitọ ẹkwan a, nị ẹjan rị alị kpọn wẹ ọkụn,

¹⁵ ara rodẹ nị ụkụ nwọn ikẹn zọkpọ wẹ mọbụ nị anụ ọfịa nwọn ikẹn zọ wẹ ụkụ.

¹⁶ Ara mẹdẹ ụmụ a nọkẹsị ya mụ wẹ; onwọnni ihiẹn ọ kpọ a nị afụnfụn ọ ta la iwi —

¹⁷ makẹni Chuku eyen'ẹ amamihiẹn mọbụ keye ẹ nghọta.

¹⁸ Kanị o femẹ nku gbakọ ọsọ, ọ gbanahịndẹ ẹshin lẹ onyẹ nyinkọn'a.

¹⁹ “Ịyụ ye ẹshin ndụn ahụn ile o nwọn ra ịyụ yimẹ ẹ ẹṅẹnrẹn ịyọmịyọ ndị hụ rị a olu?

²⁰ Ịyụ mẹ ẹ a tụ kẹ igurube, a zụn okẹn ụzụn ahụn e rọn egun?

²¹ O tisọnmẹ ụkụ alị ikẹn-ikẹn, e mẹ ndụn-ndụn e gi ndụn a a ṅan, a zụnburu ihiẹn-ọgụn.

²² Ọ mụ egun ẹmụ, onwọnni ihiẹn ọ tụ egun ẹ; ara gbanị ọpịa-agha ọsọ.

²³ Ẹkpa ọbara-ụta hụ a han kpọkọkpọkọ ẹkụnkụn onyẹ nyikọn'a — ya lẹ obo uku lẹ hụn nta rị e gbukeni.

²⁴ Ọsọ hụ a dụ a, ọ hụ e ri ọsọ; wẹ gbuọlẹ opi-agha, ara sazị ẹka wuzo ụzọ ohu.

²⁵ Opi-agha hanhụ, o kwọnlụa, ‘Ẹhẹn!’ Ọ ghadẹ ebe teni a nụ ishin agha — kẹ oro ndị-ndu agha kẹ oro-agha.

²⁶ “Amamihiẹn i kẹ anwụnkwọ gi e fe imẹ-elu imẹ-elu — e fela ẹbamịn ndịdan-mirin?

²⁷ Ịyụ a gwa ugọn mọbụ udele e fe imẹ-elu imẹ-elu, a kụ ẹkụ e ye ebe jẹngbu enwẹn ẹ elu?

²⁸ Nkp'ọnụnụ ọmụma rị elu ugu k'o bi, ebẹhụ k'ọ nọdịdẹ imẹ uhinhin; ẹkpụ rị mkpọnụnụ ọmụma k'ọ warị, e che ẹhụ.

²⁹ Ọ nọ ebẹhụ e lecheni ihiẹn o k'e ri; ẹnya a pụ-ichẹn k'o gi e lechen'ẹ.

³⁰ Ẹdeke kẹ ụmụ udele a ra; ebe ozun rị kẹ wẹ nọ a hụn a.”