Jobu 38 - Ika

Isi Nke Mmẹsatọ Kwasị Ọgụn Osolobuẹ E Buche Ọnụ Osolobuẹ A Jụma Jobu Ajụjụ

¹ Ya kẹ Osolobuẹ nọ gha imẹ okẹn ẹbi shịarị Jobu oku, sị:

² “Onyẹ wụ hụnnị hụn rị e ku kẹ sị ọ marịnghọ uche m bụ ọ marịn ihiẹn ọ rị e ku.

³ Kwademẹ nwan nke okẹnnyẹ! M k'a jụ ị ajụjụ, y'a za m.

Alị, Mirin Lẹ Igwere

⁴ “Elebe k'ị rị kẹ m gbe iyetọ ụwa? Gwa m, omẹni y'a marịnka ihiẹn.

⁵ Onyẹ ku ebe o k'a shịaru lẹ ebe o k'e sueru? Y'a marịnghọ ọhụn nụ! Onyẹ gi eriri maa a?

⁶ Elu kịnị kẹ wẹ zuye ụkụ a? Onyẹ tumẹ ọmụma gin'ẹ?

⁷ K'ọ rị e mẹmẹ ẹ, kokisẹ-ụtụntụn ile hụ a bụ ẹbụ, ndị mmọn-ozi ile hụ e yi oro ịghọghọ.

⁸ Onyẹ kpọkin ohimin ye ogẹn o gi wapụha lekẹ nwa gha ẹfọ-nnẹ ẹ zụnkpọpụha?

⁹ Onyẹ kpọkin ohimin ye ogẹn m gi yimẹ ẹ orukpu kẹ wẹ e yimẹ nwa ọhụn ẹwuru, gi ẹkpa-ishi fụma a nọkẹ nwa ọhụn;

¹⁰ ogẹn ahụn m gi mẹmẹn'ẹ ebe o k'a gha a kụsị, buche ẹkwe ẹ lẹ ihiẹn m gi kpọkin ẹ ye;

¹¹ ogẹn hụ m gi sị ohimin, ‘Ebeni k'i k'a gha a kụsị, y'a ghafekọ a; ebeni kẹ ẹbiri i ahụn a họnrọnnị k'a kụsị’?

¹² “Y'a gwatughọ ụtụntụn ihiẹn o k'e mẹ? Y'a sịtughọ eki ya fọn,

¹³ n'ọ hụn ụzọ kwọndọn ọhịhị — ọhịhị hụn a rị elu-ụwa imẹ uhinhin; ukpẹ e kwọndọn ẹ ntịn ẹnịnọ, zinzin ẹ, eje-ndị warịnị a pụha ifọn?

¹⁴ Eki fọnmẹ, e leghama wẹ elu-ụwa k'ọ rịchanrịn lekẹ ụrụa wẹ biye ihiẹn; ihiẹn rịn'a a nị legha ọhụnma lekẹ ẹwuru rị e gbukeni;

¹⁵ eki hụn ukpẹ ẹ a napụ ndị-ejẹ eje-ukpẹ wẹ — ẹka wẹ te weshi elu nị wẹ mẹ ịhịan ihiẹn a kpagipụ.

¹⁶ Y'e rutughọ ebe ohimin gha a pụha? Y'e jẹntughọ ebe kachanrịn e mi imẹ ẹ?

¹⁷ A ghọsịtughọ wẹ i ọnụ-mgbọn alị-mmọn? Y'a hụntughọ ọnụ-mgbọn ebẹhụ kachanrịn ishi a gba?

¹⁸ Y'a marịnghọ ebe ile ụwa gha? Ku nwan, omẹni y'a marịnghọ wẹ ile!

¹⁹ Elee ụzọ kẹ wẹ gha e jẹn ebe ukpẹ bi? Elebe kẹ ishi nkẹ bi?

²⁰ N'ị hụn ụzọ wejẹn wẹ ẹgbẹrẹ wẹ, marịnzịkwọ ụzọ wela wẹ iwe wẹ?

²¹ Ẹghẹẹ, y'a marịnghọ nụ, makẹni ịyụ dịan wẹ! O teọlẹ i ọda-ọda!

²² Y'a bantughọ ebe m'e dọnmẹ mirin oyi ọchan wụ sno hụn a kpụkpụrụnị mọbụ hụntu ebe m'e dọnmẹ ẹkwan-igwere —

²³ hụn m'e butọ a kịpụha ogẹn nsọngbu, hụn m'e butọ a kịpụha ụhụọhịn agha lẹ ọgụn?

²⁴ Elebe wẹ gha e jẹn ebe amụma nọ e bepụha? Elebe kẹ ufere ọwụwa ẹnyanwụn nọ e keyịya a ghagbama ụwa ile?

²⁵ Onyẹ e beyeni mirin ote ọ gha e zue, e beyeni akpara ozue hụn ọ gha ẹbi kpọma,

²⁶ kẹni mirin zueyedẹ alị ịhịan bilẹni, alị ọkpọ-nkụn ịhịan rịlẹni;

²⁷ kẹni o zueye alị wiwini hụn gbachanrịn okpokoro, mẹ ẹfịfịa e pupụha?

²⁸ Mirin e zueni e nwọnghọ nẹdi? Onyẹ mụ igirigi?

²⁹ Ẹfọ onyẹ kẹ ọkpụkpụ-mirin a rị alị gha pụha? Onyẹ mụ ọkpụkpụ-mirin oyi a gha igwere e ziẹntu

³⁰ hụn mirin gi e ze kẹ ọmụma, elu mirin a jụchanrịn oyi, ze ọda-ọda?

³¹ N'ị s'ẹka kẹngbama ọkụdụ kokisẹ wụ Pleyadẹsi? Ra n'ị s'ẹka tọpụ ihiẹn kẹngbama ọkụdụ okokisẹ wụ Oriọnụ?

³² N'ị s'ẹka e mẹ kokisẹ ichẹn-ichẹn a pụhasọnmẹ ogẹn wẹ? N'ị s'ẹka a kịpụha ọkụdụ okokisẹ wụ Biẹ lẹ ụmụ-ọkụdụ ndị ya lẹ wẹ wị?

³³ Y'a marịnghọ iwu ichẹn-ichẹn a kị ihiẹn rị igwere? N'ị sa ẹka gi wẹ kị ihiẹn rị elu-ụwa?

³⁴ N'ị s'ẹka gan orukpu rị igwere, mẹ okẹn-mirin zuekpu i?

³⁵ N'i s'ẹka gwa amụma ebe o k'e jẹn, o jẹn, o jẹngụ ọ bịa d'a sị ị, ‘E lee m!’?

³⁶ Onyẹ e mẹ obi e nwọn amamihiẹn? Onyẹ e mẹ obi e nwọn nghọta?

³⁷ Onyẹ nwọn amamihiẹn hụn o gi gụn orukpu rị igwere? Onyẹ a sa ẹka e gbugemẹ ite-mirin rịsọnmẹ igwere nị mirin zue,

³⁸ omẹni alị ze eze, omẹni alị mẹ kankankan?

Anụmanụ

³⁹ “Ịyụ a chụnnị onyẹnnyẹ-ẹwọrọ nta, e yejun okoro-ẹwọrọ ẹfọ,

⁴⁰ ebe wẹ makpuru imẹ okporo wẹ mọbụ ebe wẹ warị ọfịa e che ihiẹn w'e gburi?

⁴¹ Onyẹ e ye nnụnụ wụ uroko ihiẹn-oriri ebe ụmụ wẹ nọ a kwanghọsị Chuku mọbụ a wahunmẹ makẹni ihiẹn-oriri arịa?