Jobu 36 - Ika

Isi Nke Mmisin Kwasị Ọgụn

¹ Ya Ẹlihu nọ kusọnmẹ, sị,

² “Nwọnzini m ndidin ẹkẹrẹ nị m ghọsị ị nị ihiẹn wẹ k'e kuzini Chuku jun ejun.

³ M k'e gi ihiẹn ile bugbu enwẹn ẹ ọda m marịn ghọsị nị Onyẹ keni m rị ọchan.

⁴ Marịn nị oku m ẹlẹ ntụ — nị yụ lẹ onyẹ marịnzu ihiẹn rị ebeni.

⁵ Chuku e hikẹ ogbe kanị onwọnni onyẹ o legberi. O hikẹ ogbe ọ ghọtachanrịn ihiẹn ile.

⁶ Ara dọnmẹ onyẹ ẹfọ-njọ ndụn, kama o ye onyẹ wẹ rị e mẹgbu ihiẹn run'ẹ.

⁷ Ẹnya a ara pụ ebe ndị ezi-omumẹ rị; o mẹ wẹ e sọn ndị nze a kị, e ye wẹ ọghọ jẹnrin ejẹn.

⁸ Kanị omẹni wẹ kpọma wẹ ẹgan, gi afụnfụn kẹnmẹ wẹ,

⁹ ọ gwa wẹ ihiẹn wẹ mẹ — nị wẹ pache apache.

¹⁰ O gi ẹ e mẹ wẹ e gọn ntịn oku ẹ; sị wẹ bihutọ ẹka.

¹¹ Omẹni e gighọ w'ẹ dọn, fem'ẹ, ihiẹn a ghasọnmẹni wẹ e we wẹ nwụn, e nwọnsọnmẹ wẹ ẹfọ-ojunjun ndụn wẹ ile.

¹² Kanị omẹni egini w'ẹ dọn, a nwụn wẹ ọnwụn-ikẹn nwụntọ imẹ nzuzu.

¹³ Ndị ghalẹni a tụ egun Osolobuẹ e bu iwe obi; Chuku kẹnmẹdẹ wẹ, arịọkọ wẹ Chuku.

¹⁴ W'a nwụnchu anwụnchu — ọnwụn ifẹnrẹn ebe wẹ rị e mẹ mgba wẹ gi a rụa mmọn.

¹⁵ Kanị o gi afụnfụn ịhịan rị imẹ ẹ a zụọpụha ịhịan; o gi nsọngbu ịhịan rị imẹ ẹ a gwa a oku.

¹⁶ Ọ rị nwan a gha eje-ọnọdị a rẹrẹpụha ị e weshi i ebe shịanị ẹhụ a nọ fu i, e weshi i teburu ezigbo ihiẹn-oriri jun.

¹⁷ Kanị afụnfụn ndị-njọ a narịn k'ị rị nwan a narịn; afụnfụn ru njọ hụn i mẹ k'ị rị nwan imẹ ẹ.

¹⁸ Ka dọnrinkwọ ẹnya, amamgbe olulu e dufie i mẹ i lelịa Chuku emẹkwọl'a, ọsụọn'a n'i k'e gi e nwọnrin akụ-lẹ-ụba hi ogbe;

¹⁹ N'ị s'ẹka gi akụ-lẹ-ụba ị lẹ ọlụkpọ ị ile wanahịn nsọngbu?

²⁰ Anịlẹ ishi ahụn wụ ọnwụn da ị, ishi hụ hụn a gha iwe ịhịan a dọkpụnrụn a.

²¹ Kpachanpụkwọ ẹnya amamgbe y'e mẹmẹ eje-ihiẹn, makẹni ọ rị ị nwan n'i mẹ eje-ihiẹn karị ịta-afụnfụn.

Ẹlaịhu A Nyanhannị Jobu Ikẹn Osolobuẹ

²² “Chuku e hikẹ ogbe. Ele onyẹ-nkuzi rịkẹ ịya?

²³ Onyẹ nwọn a gwa a ihiẹn o k'e mẹ mọbụ sị a, ‘Y'e mẹfieọlẹ’?

²⁴ Nyanhan ja ihiẹn ọ rụn mma, hụn ndị ichẹn-ichẹn gi ẹbụ ku nị ọrụn a arịka mma.

²⁵ Ịhịan ile a hụngụọ a; ịhịan gha ebe teni a gba a ile.

²⁶ Chuku e hikẹ ogbe — ẹnyi amarịn a kaka! W'a ra gụnmarịn ahụa a.

²⁷ O mẹ mirin a lashi elu, gi ẹ họnrin mirin o k'e zihẹ;

²⁸ igwere e zuetu mirin rịn'a, mirin e zueni ịhịan ọda-ọda.

²⁹ Onyẹ k'a s'ẹka ghọta k'o dọn mẹmẹ igwere, k'o dọn a gha ebẹhụ o bi e gi akpabọ e ku oku?

³⁰ Ledẹ k'o dọn e mẹ amụma a e behunmẹ imẹ igwere, e berudẹ akpakalị ohimin.

³¹ Ihiẹn ndịnị k'o gi a kị ndị alị ichẹn-ichẹn, e ye wẹ ihiẹn-oriri ọda-ọda.

³² O kpọn amụma e jun ẹka, a gwa a k'o k'a dọn be.

³³ Akpara Chuku a ghọsị nị okẹn-mirin e d'a bịa; efin nkẹ a marịndẹ amarịn ọ lalanị.