Jobu 30 - Ika

Isi Nke Iri Kwasị Ọgụn Jobu Sị Wẹ Rị Nwan A Mụ A Ẹmụ

¹ “Kanị wẹ rị nwan a mụ m ẹmụ, ndị m dịan; ndị nẹdi wẹ rulẹni ndị w'e dọnmẹ wẹ lẹ nkitẹ m, nkitẹ ndị wẹ gi e du atụnrụn m.

² Kẹ m te k'e gidẹ wẹ lẹ akpan-ẹka wẹ mẹ — ebe o mẹ ni enwọnzi wẹ ndụn w'e gi rụn ọrụn?

³ E mẹ wẹ ogun-ogun yeni ẹgụn lẹ elu rị a fụnị wẹ; w'a wahunmẹ alị ọkpọ-nkụn imẹ uhinhin imẹ alị gba okpokoro la iwi.

⁴ Wẹ hụ a kpari ẹfịfịa malo lẹ ẹfịfịa ndị ọzọ imẹ ọfịa rị alị ọkpọ-nkụn, a bụri akwanran ẹfịfịa brumu makẹni ẹgụn e d'e gbu wẹ.

⁵ Ọchụpụ kẹ wẹ chụpụ wẹ alị wẹ, e yisọn wẹ oro kẹ ndị ohin —

⁶ wẹ nọ gwẹrụ (gwarị) biri akpak'alị iyi tahịnị, ebe ọmụma jun lẹ imẹ ọnụ rịsọnmẹ alị.

⁷ W'a nọ ọfịa wẹ rị e yi kẹ jaki, a kpụjun ukun osisi ichẹn-ichẹn.

⁸ Igunrun ndị ẹwobi nwọnlẹni ẹfan — ndị wẹ chụpụ alị.

⁹ Uwẹ kẹ ụmụ wẹ rị nwan a gba m ẹbụ; e họnringụọ m ihiẹn wẹ gi a mụ ẹmụ.

¹⁰ M wụ nwan ihiẹn ize ebe wẹ rị, wẹ hụ a gbanị m ẹhụ-ẹhụ; w'a ra ledẹ ẹnya azụụn wẹ gha a jụ m ẹsọn ihun.

¹¹ Hụnnị Chuku lụlụagụ nwan ụta m, mẹ m a ta afụnfụn, w'e mẹ nwan ihiẹn sụọnị wẹ ihun m.

¹² Ndị ịkpantannị gha ẹka-nni m a maye m; eshitọgụọnị wẹ m ọnyan, a tụnhunmẹ wẹ m ihiẹn wẹ e nyinrin a gba ụta.

¹³ E wiwi wẹ ụzọ m te k'a gha; a hụngụọ wẹ ụzọ tikpọ m — onwọndẹni onyẹ wẹ rịọ yeni wẹ ẹka.

¹⁴ A zụnbanhan wẹ rịkẹ ndị agha rị a gha oghe rị mgbọn a banhan wẹ hụ e fetu mkpọkọ ihiẹn jun azụụn ile, e ruhẹ.

¹⁵ Egun hụ a tụ m, ọghọ m hụ a la lekẹ ebe ufere rị e bupụ ihiẹn, ihiẹn ile rị m mma ẹhụ e fopụgụọ kẹ orukpu.

¹⁶ Ndụn m hụ a la; ụhụọhịn-ụhụọhịn, m hụ a ta afụnfụn.

¹⁷ Abalị ọwụlẹ, ọkpụkpụ hụ a mị m; ihiẹn rị a tụrụnị m arị e yeni m efe kaka.

¹⁸ O gi ikẹn ẹ hi ogbe e sedọn ẹwuru m; ọ tọdọn m ẹkpịrị lekẹ olu ẹwuru m.

¹⁹ Chuku a tụgụọ m ye imẹ ịkpọtọ, e họnrin m uzunzun lẹ ntụn mmakalaka.

²⁰ A kwanburu m'i — Chuku, y'a zanị; e wuzo m ọtọ mẹ ekpere, kanị ị hụhụ e lee m.

²¹ Y'e hutọgụọ gi ẹka-ikẹn nụmanị m; ị hụ e gi ndụn ị ile a maye m.

²² Y'a tụshi m elu, tụ m yeni ufere buru; ị hụ a tụhunmẹ m imẹ ẹbi.

²³ A marịnghọ m n'i zilakọ m mmọn, ebe ndị ile rị ndụn lakọ.

²⁴ W'ara gi ẹka-ikẹn sọn onyẹ elu rị a fụ ebe ọ rị imẹ nsọngbu a kwan nị wẹ d'e yen'ẹ ẹka.

²⁵ Akwannị nị m ndị rị imẹ nsọngbu ẹkwan? Ọ fụnị m ru akpobi nị elu rị a fụ ịhịan?

²⁶ Kanị a tụ m ẹnya ihiẹn rị ọma, eje-ihiẹn a bịa; e lee m ẹnya nị ukpẹ bịa, ya kẹ ishi nọ bịa.

²⁷ Onwọnni ogẹn ẹhụ gi e mẹ m jụụ; ụhụọhịn ile kẹ nsọngbu gi a kpọ m ihun.

²⁸ E gikpochanrịngụọ m — bụ ẹlẹ anwụn gikpo m; m'e wuzo imẹ ọgwa ndị nke ẹnyi, a kwan nị wẹ yeni m ẹka.

²⁹ Mmẹ lẹ jakalụ rị ọfịa e yi oro e họnringụọ ohu; e yimẹgụọ m oro kẹ onyẹ ya lẹ ozuzu gba a wị.

³⁰ Akpụkpọ-ẹhụ m hụ e gikpo, a gbụrụ; ẹhụ-ọkụn e d'e gbu m.

³¹ Ẹbụ-ụya ẹbụ-ụya kẹ ụbọ m rị nwan a kpọ; olu-ẹkwan olu-ẹkwan kẹ ẹkpịrị m rị nwan a han.