Jobu 3 - Ika

Isi Nke Ẹtọ Jobu A Bụ Ụhụọhịn Wẹ Mụ A Ọnụ

¹ Omẹgụ, Jobu nọ shịapụ ọnụ bụ ụhụọhịn wẹ mụ a ọnụ.

² Ọ sị:

³ “Ụhụọhịn wẹ mụ m ya la iwi — ya lẹ uhinhin ahụn sị, ‘A tụrụ wẹ imẹ okẹnnyẹ!’

⁴ Ụhụọhịn ahụn ya gba ishi; Chuku hụn rị elu ya akpọl'a ihiẹn ọwụlẹ; ukpẹ ya enwunyel'ẹ kaka.

⁵ Ishi ka ishi ya werizi ụhụọhịn ahụn; igwere-ogi ya rukpumẹ ẹ; ishi ya gbakin ukpẹ ẹ.

⁶ Ishi ya weri uhinhin ahụn; w'a gụnl'a yeni ụhụọhịn rị imẹ ahụa mọbụ gụn a ye imẹ ifọn ọwụlẹ.

⁷ Uhinhin hụ ya họnrin agan; w'a nụzịlẹ oro ịghọghọ imẹ ẹ.

⁸ Ndị a bụ ụhụọhịn ọnụ wẹ d'a bụ ụhụọhịn ahụn ọnụ, ndị a gwọkarị ibe wẹ ọgụn: ndị ma kpọntiẹn Lẹvịatanị — ẹregede agwọ akan hụ bi imẹ ohimin.

⁹ Kokisẹ ụtụntụn ụhụọhịn hụ ya gba-ishi; ya tọ e che eki n'o fọn, y'a hụnlẹ ebe eki nọ fọnmẹ,

¹⁰ makẹni ọ kpọkinni m ye imẹ ẹfọ nnẹ m, amamgbe ẹnya m a hụn nsọngbu.

Jobu Sị K'ọ Rị A Wẹ Mụgbu Ẹ Amụgbu

¹¹ “Kị haịn wẹ gilẹni mụgbu m; kị haịn m gilẹni nwụnhụn kẹ m gha ẹfọ pụla?

¹² Kị haịn wẹ gi hụn ụkụ pa m che, hụn ẹran ye m?

¹³ Nkẹ ẹhụ e fu m nwan ebe m dinẹ imẹ ili; nkẹ m hụ nwan ụran, e zu ikẹn —

¹⁴ mmẹ lẹ ndị-nze lẹ ịhaịmẹ ụwa lagụnị, hụn tụnrụn ihiẹn ndị ahụn ile dankpọgụnị nwan,

¹⁵ mmẹ lẹ ndị ọkịkị hụn te nwọn goru, ndị te kpọn siliva kpọnjun iwe wẹ.

¹⁶ Kị haịn wẹ gilẹni bu m zuemẹ imẹ alị nọkẹ nwa nwụntọ ẹfọ, nọkẹ nwa hụnlẹni eki rị elu?

¹⁷ Ndị-ejẹ ara yezi nsọngbu ebẹhụ, ndị ẹhụ rọ nọ ebẹhụ e zu ikẹn.

¹⁸ Ebẹhụ kẹ ẹhụ nọzị e fu ndị rị ẹgbụn; w'a ra nụzị oro ndị rị e kị igbọn.

¹⁹ Kẹ ndị-nta kẹ ndị uku rị ebẹhụ, igbọn ara rịzị okpuru ndị nwọnni wẹ.

Kị Haịn Osolobuẹ Gi Nị M Rị Ndụn?

²⁰ “Kị w'e yeni ndị rị e ri ụya ukpẹ, e ye ndị elu rị a fụ ndụn e bi?

²¹ Ndị rị a chọdẹ ọnwụn kanị ọnwụn ara bịanị wẹ, a chọ a karị kẹ w'a chọ ihiẹn rị mkpa zuerini;

²² ndị ẹfọ k'a sụọ ụsụọ ọda-ọda, a ghọghọ wẹ — hụn wẹ gihụ ru imẹ ili.

²³ Kị w'e yeni ịhịan ndụn, ịhịan hụn nwọnlẹni onyẹ e leghan'a, ịhịan hụn Chuku kehunmẹgụ?

²⁴ Ịsụn-udẹn anịnị m ri ihiẹn-oriri; ẹnya-mirin ẹkwan nsọngbu m hụ e hupụha kẹ mirin.

²⁵ Ihiẹn a tụ m egun e kunrungụọ m; ihiẹn e hue m uhue e mẹgụọ m.

²⁶ Ẹhụ efuni m, obi eruni m alị; enwọn m ezumikẹn, nsọngbu sụọ kẹ m rị a hụn.”