Jobu 29 - Ika

Isi Nke Itenẹi Kwasị Ọgụn Jobu E Ku K'ọ Rịhann'a Mma Mbụ

¹ Jobu nọ kusọnmẹ ihiẹn ọ rị e ku, sị,

² “Omẹni m te nọ kẹ m nọ ifọn ole-lẹ-ole ghanị, kẹ m nọ ogẹn ahụn Chuku gi rị e lepụ m ẹnya,

³ ogẹn ukpẹ ẹ gi rị e nwunkpu m isi, m nọ rị e gi ukpẹ ẹ a gha ebe gba ishi!

⁴ Euu, omẹni m te rị kẹ m rị mbụ ogẹn ihiẹn gi rị a ghanị m, ogẹn ahụn Osolobuẹ gi rị e mẹ ikpụlọ m kẹ ndị nke ẹ;

⁵ ogẹn Onyẹ Hụ Nwọn Ikẹn Ile gi rị a nọyeni m, ogẹn hụ ụmụ m gi fihunmẹ m,

⁶ ogẹn mirin-ẹran efin m gi jun ụzọ ile, ogẹn alị zegbu enwẹn ẹ gi a mụpụhanị m ofigbọn-olivu.

⁷ Ogẹn m gi e jẹn ọgwa ọnụ-mgbọn obodo, e weri ocho m ebe ịhịan ile nọ e zu.

⁸ Ikorọbịa hụn m ogẹn ahụn, a nọye wẹ nkọ, ndị ẹgẹdi nkẹ e wuzo ọtọ;

⁹ ndị-isi e kubehi oku, gi ẹka kpumẹ ọnụ wẹ;

¹⁰ anụkọdẹ wẹ olu ndị ịhaịmẹ, ire a nyantọ wẹ okpo.

¹¹ Onyẹ nụ olu m, o ku oku m ọhụnma; onyẹ hụn m, o liyeni m ẹka.

¹² Makẹni, m'a gbapụha ogbẹnnyẹ rị a kwan nị wẹ yen'ẹ ẹka, wẹ lẹ onyẹ nwọnlẹni nẹdi lẹ onyẹ e yen'ẹ ẹka.

¹³ Ndị te nwụnkọnị a gọzi m agọzi; m'e mẹ obi a sụọmazị onyẹ di ẹ nwụn ụsụọ — ọ bụma ẹbụ-ịghọghọ.

¹⁴ M'e yi ezi-omumẹ kẹ ẹkwa, ezioku wụ ẹwuru m tueru alị lẹ okpu-isi m.

¹⁵ M te wụ ẹnya ndị ẹnya-ishi lẹ ụkụ ndị ngụrọ.

¹⁶ M wụ nẹdi ndị elu rị a fụ ogẹn hụ; m'e buru oku otumunyẹ isi.

¹⁷ M'e tikwọnpụ ndị-ejẹ eze, a napụ wẹ ndị wẹ tadọn.

¹⁸ M te hụ a sị enwẹn m, ‘M k'a nọ nwan ụlọ ẹka m nwụn ọnwụn-ẹhi — m kakpụkpọgụ.’

¹⁹ ‘Mkpọgụn m k'e kunrun mirin, igirigi k'a gha e zinye aganaba m kẹ uhinhin han.’

²⁰ ‘Ọghọ m k'a wụsọnmẹ nke ọhụn; ụta rị m ẹka k'e kẹnrẹnsọnmẹ nọkẹ nke ọhụn.’

²¹ Ogẹn mbụ ahụn, ịhịan e gọn ntịn nị wẹ nụchanrịn ihiẹn m k'e ku — a gba-nkịtịn, e che nị wẹ marịn uche m.

²² M kugụ, w'a ra kuzi — m kugụ ẹhụ e mẹ wẹ jụụ.

²³ Wẹ te e che m kẹ w'e che mbụmbụ-mirin, e lura oku m kẹ mirin-ahụa.

²⁴ M mụyeni wẹ ẹmụ, ọ tụ wẹ ẹnya, sụọ wẹ; ẹmụ rị m ihun, ndụn a ban wẹ.

²⁵ Mmẹ a gwa wẹ ebe w'a gha, a nọdị m kẹ onyẹ-isi; ogẹn ahụn, m nọ kẹ eze rị igunrun ndị-agha a; m rị kẹ onyẹ a rọkọ ndị rị a kwannị obi.