Jobu 28 - Ika

Isi Nke Ẹsatọ Kwasị Ọgụn Elebe Kẹ Amamihiẹn Gha A Bịa? Siliva Lẹ Goru Nwọn Ebe Wẹ Gha A Pụha

¹ “O nwọnghọ ebe wẹ nọ e gu siliva lẹ ebe wẹ nọ a chanchanpụha goru.

² Alị kẹ wẹ gha e weri igwe; ọmụma hụn igwe-kọpa a rị kẹ wẹ gha a rịnranpụha igwe-kọpa.

³ Ịhịan e gi ukpẹ a banye imẹ ishi; ọ gwalọ ebe kachanrịn e te imẹ alị a chọ ọmụma ihiẹn ndịnị rị imẹ ẹ ebe gbagbu enwẹn ẹ ishi.

⁴ O jẹnte ebe ịhịan bilẹni d'e gu olu, ebe ụkụ ghalẹni e rudẹ; ọ rị ọrụn imẹ-alị imẹ-alị ịhịan ghalẹni e ru, ya lẹ eriri wẹ kẹnmẹye ẹ ukun, o gi e jẹnjẹn e jẹnlụa.

⁵ Alị hụn ihiẹn-oriri gha elu ẹ a pụha ịya kẹ okpuru ẹ nọ nwan kẹ ebe dụn ọkụn;

⁶ ọmụma rịn'a kẹ safaya gha a pụha; ẹjan rịn'a nwọnsọnmẹ ọkpụrụkpụ goru.

⁷ Nnụnụ ka ibe ẹ ebe teni e legha amarịndẹ ụzọ wẹ ghasọnmẹ e jẹn ebeni zuerini; onwọnni egbe ọwụlẹ ẹnya a leghatu wẹ.

⁸ Eje-anụ e gbudẹ ịhịan ara ru ebẹhụ — onwọnni ẹwọrọ a kpa ebahụn.

⁹ Ẹka ịhịan e gukpọ ọmụma zeni, d'e ru ni ukun ugu a gba oghe.

¹⁰ O be ụzọ e ye imẹ ọmụma, ẹnya a a hụn ihiẹn ile w'a chọ achọ rịn'a.

¹¹ O gbọnkin iyi ichẹn-ichẹn, e wepụha ihiẹn te zuerini ifọn.

Kanị Elebe W'a Nọ Hụn Amamihiẹn?

¹² “Kanị elebe kẹ w'a nọ nwan hụn amamihiẹn? Elebe kẹ nghọta bi?

¹³ Ịhịan amarịn; w'a ra hụn a imẹ ndị rị ndụn elu ụwanị.

¹⁴ Mirin rị imẹ-alị imẹ-alị sị, ‘Ẹlẹ imẹ m k'ọ rị’; ohimin sị, ‘Ẹlẹ iwe m k'ọ rị.’

¹⁵ W'a ra gidẹ goru kachanrịn mma ṅọn ẹ; onwọnni siliva ru ọnụ a.

¹⁶ W'a ra gidẹ goru alị Ofiri hụn pụ ichẹn ṅọn ẹ, mọbụ ọnik'si mọbụ safaya umunẹ goru.

¹⁷ Kẹ goru kẹ ughegbe e be nwaịn-nwaịn anọnị kẹ ịya kaka, onwọnni ihiẹn goru w'e gi ghatarị a.

¹⁸ Kọralụ e gbukeni w'a chọ achọ lẹ jaspa nwẹnẹ ẹ erudẹni w'e fọn ẹfan ebe ọ rị; onwọnni hụn wẹ gi e ṅọn amamihiẹn.

¹⁹ W'a ra gidẹ tọpazị Ẹtiopịa e gbukeni jen'ẹ; w'a ra gidẹ ezigbo goru ṅọn ẹ.

Chuku Sụọ Marịn Ihiẹn Amamihiẹn Wụ

²⁰ “Elebe kẹ amamihiẹn gha nwan a bịa? Elebe kẹ nghọta bi?

²¹ Onwọnni ihiẹn rị ndụn marịnn'a, nnụnụ e fe imẹ elu amarịnd'a.

²² Ntikpọ lẹ Ọnwụn sị, ‘Ẹnyi a nụhụ kẹ wẹ rị e ku oku ẹ.’

²³ “Chuku sụọ ghọta ụzọ ebe ọ rị, ịya sụọ marịn ebe o bi —

²⁴ makẹni ịya a hụnchanrịn elu ụwa ile, a hụnchanrịn ihiẹn ile rị okpuru igwere.

²⁵ Ogẹn o gi mẹ ufere femẹ k'o fe, mẹ mirin han k'ọ han —

²⁶ ogẹn o gi tini mirin iwu o gi e zue, tumẹni amụma ụzọ o k'a gha.

²⁷ Ogẹn hụ k'o gi lehunmẹ amamihiẹn, ku ihiẹn ọ wụ; mẹ ẹ turu, lele ẹ.

²⁸ Ya ọ nọ sị ịhịan, ‘Ịtụ egun Osolobuẹ — ịya wụ amamihiẹn, ịjụ eje-ihiẹn — ịya wụ nghọta.’ ”