Jobu 27 - Ika

Isi Nke Ẹsa Kwasị Ọgụn Jobu Sị O Kuhutọkọ Ọnụ

¹ Ya Jobu nọ kumẹzi ihiẹn ọ rị e ku, sị,

² “Ma Chuku hụn jụ n'ọ hankọnị m eṅẹn; ma Onyẹ hụ Nwọn Ikẹn Ile hụn ye m ụyanị m rị e ri:

³ ebe m rị ndụn, ebe m rị e kun uzun Chuku ye m,

⁴ ụgb'ọnụ m ekukọ eje-ihiẹn, ire m atụkọ ntụ.

⁵ Ekwerikọ m nị ụnụ rị e ku ezioku; e we m nwụn, ekwerikọ m nị m mẹ njọ.

⁶ M k'a tọ e ku ẹ nị ẹka m rị ọchan, ekuhutọkọ m ọnụ; ịhọrị m amakọ m ikpe e we m nwụn.

⁷ Ihiẹn e mẹ ndị-ejẹ ya mẹ ndị-iṅẹnrẹn m, ihiẹn e mẹ ndị-njọ ya mẹ ndị iwe m!

⁸ Makẹni onyẹ ghalẹni a tụ egun Osolobuẹ enwọnzi ihiẹn o kwọndọn ẹka wẹ weriọlẹ ndụn a, Chuku napụọl'a ndụn a.

⁹ Nị Chuku gọndẹ nwan ntịn ẹkwan a ogẹn nsọngbu?

¹⁰ Ihiẹn Onyẹ Hụ Nwọn Ikẹn Ile a sụọzị a? N'ọ sazị ẹka kpọku Chuku ogẹn ile?

¹¹ M k'a kuzi ụnụ kẹ ikẹn Chuku nọ; ezuemẹkọ m uche Onyẹ Hụ Nwọn Ikẹn Ile.

¹² Kanị, ụnụ ile e gigụọ ẹnya ụnụ hụn ihiẹnni. Kị wụzị nwan okuni ile nwọnlẹni isi ụnụ rị e ku?

Ẹka Osolobuẹ Gi E Sọn Ndị-ejẹ

¹³ “Lee ni ihiẹn Chuku e keye eje-ịhịan, ihiẹn Onyẹ Hụ Nwọn Ikẹn Ile e ye onyẹ ghalẹni e mẹ omikẹn:

¹⁴ Kẹ ụmụ a bulẹ ọda ru, ọpịa-agha e gbu wẹ; ụmụ a ahụnkọ rijun ẹfọ.

¹⁵ Eje-ọrịa e feni k'e gbu ndị bikin ugbẹ ẹ, inyẹnmẹ wẹ hụn wẹ nwụnnahịn akwankọ wẹ.

¹⁶ Ọsụọn'a n'o kpọntọ siliva kẹ ẹjan, kpọn ẹkwa jun nọkẹ elumelu ụrụa,

¹⁷ ndị e bi kẹ Chuku chọ k'e yi ẹkwa o kpọntọ, ndị ẹka wẹ rị ọchan k'e keri siliva a.

¹⁸ Ụnọ ọ tụn ezekarịnị ụlọ akpụkpa, o zekarịnị ọdụ onyẹ-nche tụnrụnhụ.

¹⁹ Ọdanfịn k'ọ wụ k'o dinẹ imẹ uhinhin — onwọnni ihiẹn mẹ ihiẹn ẹ, kanị ọ shịapụ ẹnya ụtụntụn, wẹ ile a lagụọ.

²⁰ Egun e buru ẹ kẹ mirin; ẹbi a jụrụ a imẹ abalị.

²¹ Ufere ọwụwa-ẹnyanwụn e buru ẹ, nke ẹ a gụ; ọ zapụ a ọnọdị a,

²² e fe ẹ ikẹn-ikẹn ebe ọ gbakọ ọnwụn-ọnwụn n'ọ wanahịn a.

²³ Ufere ahụn hụ e gi ẹ e gu egu, a mụ a ẹmụ; ọ hụ e bupụ a ọnọdị a, a zụn ụzụn kẹ onyẹ rị a ma ọsụa (ọsụọ).