Jobu 26 - Ika

Isi Nke Isin Kwasị Ọgụn Ihiẹn Jobu Shịarị Bidadị Ẹka Kẹ Ụnụ Rịdẹ Nwan E Yeni M Ra?

¹ Ya Jobu nọ sị,

² “Nanị k'i dọn nwan yeni onyẹ ndụn rịlẹni ẹka?! Nanị k'i dọn nwan zụọpụha onyẹ ndụn gụ?!

³ Ọnwan wụ nwan ezigbo ndụnmọdụn ị rị e ye onyẹ marịnlẹni ihiẹn, ra amamihiẹn kẹ ị rị nwan a ghọsị ihiẹnni?

⁴ Onyẹ ye i ihiẹn ndịnị ku? Mmọn onyẹ gi i e ku?”

Kẹ Chuku Nọ Nke-esi

⁵ “Ndị rị alị-mmọn hụ a manị Chuku piripiri, ndị rị imẹ mirin hụn rị okpuru.

⁶ Alị-mmọn gba ọtọ ẹnya Chuku; Ntikpọ nkẹ rị oghe ẹnya a.

⁷ Ọ shịshịapụ igwere rị ẹbamịn-ugu ye imẹ elu bụ onwọnni ihiẹn gidọnn'ẹ; ịya kọnmẹ ụwa — bụ onwọnni ihiẹn kwọndọnn'ẹ.

⁸ Ịya mẹ igwere ẹ wụrụ ẹkpa-mirin ẹkpa-mirin, bụ w'a ra wahị.

⁹ O kpumẹ ifọn shịagụnị ihun — orukpu ẹ k'o gi e kpumẹ ẹ.

¹⁰ Ịya tumẹ okẹn ye elu mirin; ịya tumẹ ebẹhụ ukpẹ lẹ ishi nọ kebe.

¹¹ Chuku ban mban, ihiẹn ndị gidọn elu-igwee e mẹhunmẹ, makẹni mban a a tụgbu wẹ ẹnya.

¹² Ikẹn ẹ k'o gi tinyụn ẹbiri-ohimin; amamihiẹn ẹ k'o gi jakịka eje-anụ ahụn wụ Rehabụ.

¹³ Uzun ẹ kẹ igwere gi fọn; ẹka a zupu agwọ akan ahụn wụ Lẹvịatanị.

¹⁴ Ndịnị ile wụdẹ nwan ẹkẹrẹ ihiẹn ẹka a; ẹkẹrẹ sụọ kẹ ẹnyi a nụdẹ ukwere ẹ! Onyẹ k'a sa nwan ẹka ghọtachanrịn ikẹn ẹ hụn nọ kẹ akpabọ?!”