Jobu 24 - Ika

Isi Nke Ẹnọ Kwasị Ọgụn Osolobuẹ Bupụdẹ Nwan Ẹnya Ra?

¹ “Kị haịn Onyẹ Hụ Nwọn Ikẹn Ile gilẹni a katọ ogẹn o gi e ye ịhịan afụnfụn? Kị haịn ndị marịnn'a gi a tụ ẹnya ụhụọhịn nọ ẹrịra mmaka?

² Ịhịan hụ e beri alị ibe ẹ; a zụn atụnrụn o zunarịn ịhịan.

³ W'e weridẹ jaki onyẹ nwọnlẹni nẹdi lẹ nnẹ, e gi efin onyẹ di ẹ nwụn e fieri ụgwọ.

⁴ W'e nu ndị elu rị a fụ e ye nkọ, e mẹ ndị igbẹnnyẹ rị alị a warị.

⁵ Ndị igbẹnnyẹ a wahunmẹ nọkẹ jaki-ọfịa rị alị ọkpọ-nkụn, a lụkpọ, a chọhunmẹ ihiẹn-oriri; hụn wẹ hụn imẹ alị ọkpọ-nkụn kẹ ụmụ wẹ e ri.

⁶ W'a chọ ihiẹn-oriri ugbo ịhịan, e jẹndẹ ugbo ndị-ejẹ d'a ghọchanpụ vaịnị wẹ ghọgụ.

⁷ Makẹni ẹkwa arịa, ọtọ kẹ w'a gba a ranhịn; enwọn wẹ ihiẹn wẹ gi e gbọn oyi.

⁸ Mirin e zue elu-ugu hụn a jụgbu enwẹn ẹ oyi a mare wẹ ẹhụ, e fiedọn wẹ ọmụma makẹni enwọn wẹ ebe w'a gbaban.

⁹ Ịhịan hụ e weridẹ nwata nẹdi ẹ nwụnhụn wẹ kelẹni ha ẹran; wẹ hụ e gi ụmụ ndị igbẹnnyẹ e fieri ụgwọ.

¹⁰ Makẹni ẹkwa arịa, ọtọ kẹ w'a gba a ghahunmẹ; wẹ hụ a ghọlụanị ịhịan ọka, kanị ẹgụn hụ a gụn wẹ.

¹¹ W'a pịnpụhanị ndị-ejẹ ofugbọn-olivu imẹ ugbo olivu; w'a pịnpụhanị ịhịan manya, kanị ẹkpịrị hụ a kpọ wẹ nkụn.

¹² Ndị rị a nwụnnị hụ a sụn udẹn imẹ obodo, ndị wẹ rụ ẹhụ hụ a kwan nị wẹ yeni wẹ ẹka. Kanị onwọnni onyẹ Chuku a jụ ukwere njọ.

¹³ O nwọnzighọ ndị sị ekweyekọnị wẹ ukpẹ — amarịn wẹ ụzọ a, w'a ra nọdị ozue ẹ.

¹⁴ Eki gi, izighẹ e heli, gbumẹ ndị igbẹnnyẹ lẹ ndị elu rị a fụ — uhinhin k'o gi e gepụ nọkẹ onyẹ-ohin.

¹⁵ Ẹnya ughẹrẹ hụ e che ni ọhị gbama; ọ hụ a sị enwẹn ẹ, ‘Onwọnni ẹnya k'a hụnnị m,’ ọ hụ e kpumẹ ihun ẹ.

¹⁶ Uhinhin, ịhịan e gbukpọ iwe ibe wẹ; kanị eki rịọlẹ elu, a kpọkin wẹ enwẹn wẹ ye imẹ ụlọ makẹni achọnị wẹ ukpẹ.

¹⁷ Ụtụntụn wụ wẹ eje-isi ẹnya; wẹ lẹ ọhịhị a tụ ịhịan egun wụ ọwụ.

Ndị Njọ Wụ Ụfọfọ

¹⁸ “Kanị wẹ wụkwọ ụfọfọ rị elu mirin; azụụn wẹ keye wẹ imẹ alị wẹ a wụrụgụọ ihiẹn Chuku bụ ọnụ, onwọnni onyẹ e jẹndẹ ugbo-vaịnị rịn'a.

¹⁹ Kẹ uwowo lẹ ọkọkị dọn a rapụ mirin hụn rị a pụha ebe ọkpụkpụ-mirin rị a rịnranpụ, ẹrịra kẹ alị-mmọn dọn e luepụ ndị mẹ njọ.

²⁰ Ẹfọ mụnị wẹ ara nyanhanzị wẹ, e họnrin wẹ ihiẹn-oriri ọhọrị; Ẹghẹẹ, w'a ra nyanhanzị wẹ, eje-ihiẹn a kpagipụ lekẹ osisi.

²¹ W'e rigbu ndị agan lẹ ikpoho mụlẹni nwa; w'a ra mẹni ndị di wẹ nwụn ẹfọma.

²² Kanị Chuku e gi ikẹn ẹ a dọkpụnpụ ndị okẹn-ịhịan; ọsụọn'a n'e turuchanrịngụọ wẹ ọhụnma-ọhụnma, ahụnkọ wẹ isi.

²³ O nwọn ikẹn nị wẹ e ro nị nsọngbu arị, kanị ọ hụ e lee kẹ wẹ rị e bi.

²⁴ W'e bushi wẹ hụ elu ẹkẹrẹ ogẹn, kanị o biekọ, nke wẹ a gụ; e wetu wẹ wẹ alị, kpọnrin wẹ rịkẹ ndị ọzọ ile; w'e bepụ wẹ kẹ isi-ọka.

²⁵ Omẹni ihiẹn ndịnị ẹlẹ ezioku, gwa nị m; ghọsị nị nị onwọnni ihiẹn oku m wụ.”