Jobu 23 - Ika

Isi Nke Ẹtọ Kwasị Ọgụn Jobu A Shịarị

¹ Ya kẹ Jobu nọ sị,

² “Kẹ tannị, m hụkwọ a kwan elu m, a kwanshi ẹ ikẹn; kẹ m sụnhanlẹ udẹn, ẹka Chuku gihụkwọ m ebe o gi m.

³ Omẹni m te marịn nwan ebe m'a nọ hụn Chuku; omẹni m te k'a s'ẹka jẹn ebe o bi!

⁴ Nkẹ m'e kinghọsị a, nkẹ m'a hụn ihiẹn m k'e kin ọhụnma-ọhụnma.

⁵ A hụn m ihiẹn o k'a shịarị m, a ghọta m ihiẹn o k'e ku.

⁶ Nị Chuku gi ikẹn ẹ hi-ogbe sọn m? Mba, o k'e gọn m ntịn.

⁷ Ebẹhụ, makẹni m kụrụ ọtọ, m k'a s'ẹka kinghọsị a elee-m elee-i, a wanahịn m'a, ịya hụn wụ Ọka-ikpe m.

⁸ Kanị, a chọgụọ m'a ẹbamịn ọwụwa-ẹnyanwụn, ọ rị ebẹhụ; e jẹn m ẹbamịn ọdịdan-ẹnyanwụn, ahụnnị m'a.

⁹ Ogẹn o gi rị ọrụn ẹbamịn-ugu, ahụnzịkwọnị m'a; o shi ẹbamịn ndịdan-mirin, ẹnya m egẹnrindẹn'ẹ.

¹⁰ Kanị ọ marịnghọ ụzọ m'a gha; o lelegụ m, m k'a pụha ọhụnma lekẹ goru.

¹¹ M'e sọnchanrịn nzọmụkụ a; ụzọ a kẹ m'e sọn — aghatuni m'ẹ pụ.

¹² Apatuni m oku gha a ọnụ pụha; oku-ọnụ a kadẹ m mkpa karị ihiẹn-oriri m.

¹³ Okusị-ọgụ k'ọ wụ; onyẹ k'a jụ a ihiẹn ọwụlẹ? Ihiẹn sụọn'a k'o mẹ.

¹⁴ Ọ hụ e mẹ m ihiẹn hụn o kutọgụ n'o k'e mẹ m, o nwọnzighọ ihiẹn bu ọda nọ ẹrịra o rotọnị m.

¹⁵ Ịya kẹ egun ẹ gi a tụ m; m nyanhan ihiẹnni ile, egun ẹ a tụma m.

¹⁶ Chuku e mẹgụọ ndụn gụ m; Onyẹ Hụ Nwọn Ikẹn Ile e bugụọ egun che m ẹnya.

¹⁷ Kanị ishi m rị imẹ ẹ ekpukinkọ m ọnụ; ẹkpa-ishini kpumẹ m ẹnya akwakinkọ m ọnụ.