Jobu 22 - Ika

Isi Nke Ẹbụọ Kwasị Ọgụn Ẹlifazị E Kumẹzi Ẹlẹ Njọ Ị Mẹ I Ihiẹnni?

¹ Ya Ẹlifazị onyẹ Tẹmanị nọ sị Jobu,

² “Nị ịhịan sa nwan ẹka bannị Chuku erere? Ele erere kẹ onyẹ marịn ihiẹn k'a bandẹn'a?

³ Nanị ẹfọ e dọn sụọdẹ Onyẹ Hụ Nwọn Ikẹn Ile ụsụọ n'ị wụ onyẹ ezi-omumẹ? K'o k'e nwọnhẹn omẹni ị rị e bigha?

⁴ Nị y'a gbaye Chuku k'o gidẹ rị a jụgbọ ị ra? Ịya k'ọ rịdẹ nwan a manị ị ikpe ra?

⁵ Ẹlẹ njọ ị bu ọda haịn? Ẹlẹ njọ ị tọ e mẹ haịn?

⁶ Y'e gighọdẹ ihiẹn umunẹ i fieri ụgwọ, umunẹ i hụn nwọnlẹni ihiẹn wẹ mẹ; y'a gbụnarịnghọ ndị ẹkwa zulẹni ukun ẹwuru wẹ.

⁷ Y'e yeni onyẹ ndụn gụ mirin ra, y'e kweni ye onyẹ ẹgụn gi ihiẹn-oriri —

⁸ ọsụọn'a nị okẹn-ịhịan nwọn alị kẹ ị wụ, onyẹ w'a gbaye agbaye hụn bi alị nke ẹ.

⁹ Y'a chụpụghọ ndị di wẹ nwụn, a gbarị wẹ ẹka, y'a napụghọ ndị nwọnlẹni nẹdi ihiẹn wẹ gi dọn ẹnya.

¹⁰ Ịya haịn ọnyan gi fihunmẹ i, ya haịn egun eje-ihiẹn e mẹ idẹnmizi gi a tụgbu i,

¹¹ ya haịn ẹnya ị gi rị a gba ishi, ya haịn okẹn-mirin gi e rukpumẹ i.

¹² Ẹlẹ elu-igwee jẹngbu enwẹn ẹ elu kẹ Chuku rị e lee ịhịan? Ledẹ kokisẹ ndị rị imẹ-elu imẹ-elu: eruni wẹ ebe ọ rị!

¹³ Bụ ị sị, ‘Kị Chuku marịn? Nị ishi han ẹnịna nị a legha ụzọ kin ikpe?

¹⁴ Orukpu gitọnị kpumẹ ẹ, ara nị a legha ẹnyi ọ gha e jẹnhunmẹ elu okpukpu igwere.’

¹⁵ N'ị sọnmẹ nwan ụzọ akan ahụn hụn ndị-ejẹ gha mbụ-mbụ ra?

¹⁶ Wẹ gi ufiri ẹ wepụ wẹ ebe ogẹn wẹ kelẹni ru, ide-mirin nọ huru iyetọ wẹ.

¹⁷ Wẹ te sị Chuku, ‘Ha ẹnyi ye! Kị Onyẹ Hụ Nwọn Ikẹn Ile k'a s'ẹka mẹ ẹnyi?’

¹⁸ Bụ ịya kpọn ihiẹn rị mma junni wẹ ụlọ; ya kẹ m gi a gbanị ndụnmọdụn eje-ịhịan ọsọ.

¹⁹ Ndị-ọma hụn n'e tikpọ wẹ ndị-ejẹ, a ghọghọ wẹ; ndị ẹka wẹ rị ọchan a mụ wẹ ẹmụ, a sị,

²⁰ ‘Ẹghẹẹ, e tikpọpụ wẹ ndị iwe ẹnyi, ọkụn e ripụ ihiẹn wẹ kpatọ.’

²¹ Kweyeni nwan Chuku nị ịyụ lẹ ịya dọn; ịya kẹ aghamihun e gi bịan'ị.

²² E gi oku-ọnụ a e dọn; bu oku ẹ che imẹ obi i.

²³ I kinhẹn d'e kunrun Onyẹ Hụ Nwọn Ikẹn Ile, o k'e wekin i ọnọdị ị: omẹni y'e wepụghọ eje-ihiẹn iwe i,

²⁴ ma akpụrụ goru ndị i nwọn ye imẹ uzunzun, madẹ goru ọma ị hụn gha alị-Ofiri bịa ye imẹ ọmụma rị alị iyi udu-mirin.

²⁵ Ogẹn ahụn, Onyẹ Hụ Nwọn Ikẹn Ile a wụrụ goru i, wụrụn'ị siliva kachanrịn mma.

²⁶ Ogẹn hụ, ihiẹn Onyẹ Hụ Nwọn Ikẹn Ile a sụọma ị ụsụọ ẹfọ, y'a sa nwan ẹka bu ihun zinmẹmẹ Chuku.

²⁷ I mẹ ekpere kpọku ẹ, ọ nụ olu i; yụ nwẹn k'e mẹzu nkwa ndị i kwe ẹ.

²⁸ I ku oku, o mẹni i y'ẹ, ukpẹ k'a gha e nwunye ụzọ ị.

²⁹ Wẹ wetu ịhịan alị, nị y'a sị, ‘Weli wẹ!’ Chuku a zụọ onyẹ ahụn wẹ welụa alị.

³⁰ O k'a gbapụhadẹ onyẹ ẹka a rịlẹni ọchan, o k'a gbapụha a makẹni ẹka ị rị ọchan.”