Jobu 21 - Ika

Isi Nke Ohu Kwasị Ọgụn Ihiẹn Jobu Shịarị Zofa Ọ Rịnị Kẹ Ụnụ Ku Ẹ

¹ Ya kẹ Jobu nọ sị,

² “Gọn ni ntịn oku m ọhụnma-ọhụnma — gọn ni m ntịn nị ndụn ban m.

³ Nwọn ni ndidin nị m ku, m kugụ, ụnụ a mụmazị m ẹmụ ụnụ rị a mụ m.

⁴ M rịdẹ e kinghọsị ịhịan ra? Kị m'e nwọnmẹzini ndidin?

⁵ Lee ni m ẹnya, nị ụnụ jụsọhị, gi ẹka kụmachanrịn ọnụ.

⁶ M ro ihiẹnni, egun a tụma m, ẹhụ a mama m nni.

⁷ Kị haịn ndị-ejẹ gi a tọ, a ka ẹgẹdi, e mẹwaye okẹn-ịhịan?

⁸ W'a hụnzịdẹ ụmụ wẹ kẹ wẹ rị a ban ihiẹn idẹnya wẹ; w'e gidẹ ẹnya a hụn ụmụ-ụmụ wẹ.

⁹ Onwọnni ihiẹn emẹ ikpụnọ wẹ, egun ara tụ wẹ; onwọnni ihiẹn Chuku e mẹ wẹ.

¹⁰ Okẹn-efin wẹ ara gbabehi: ọmụmụ-ọmụmụ kẹ efin wẹ a mụ, imẹ ara kwọn wẹ.

¹¹ Wẹ ara tụ egun idupụha ụmụ wẹ nọkẹ igunrun-ewu; ndị ntịtị rị imẹ wẹ e tẹnhunmẹ egu.

¹² W'a bụdẹ ẹbụ, a kụye ẹ ẹgede-chakachaka, a kpọdẹ ụbọ wẹ; w'e gbuzikwọ ẹkpịrị, a ghọghọ.

¹³ Ọ masịzịkwọnị wẹ amasịnị elu wẹ ile; ẹhụ e fu wẹ e rudẹ imẹ ili.

¹⁴ Bụ wẹ hụ a sị Chuku, ‘Ha ẹnyi ye!’ ‘Onwọnni ihiẹn ẹnyi gi ịmarịnn'ị e mẹ!’

¹⁵ ‘Onyẹ wụdẹ Onyẹ Hụ Nwọn Ikẹn Ile, hụn ẹnyi e gi femẹ ẹ?’ ‘Elee erere k'ọ bannị ẹnyi nị ẹnyi rị e mẹ ekpere e jẹnn'ẹ’?

¹⁶ Kanị ẹlẹ ẹka wẹ mẹni wẹ; ya wụ, a jụ m ihiẹn ndị eje-ịhịan rị e ro.

¹⁷ Mgbe ole kẹ ukpẹ ndị eje-ịhịan e tinyụndẹ nwan? Mgbe ole kẹ okẹn-ihiẹn e kunrundẹ wẹ? Mgbe ole kẹ Chuku e gidẹ olulu e mẹ wẹ eje-ihiẹn?

¹⁸ Elebe kẹ wẹ nọdẹ a rị kẹ ẹfịfịa ọkpọ-nkụn ufere bukọ mọbụ ifunfun ihiẹn okẹn ufere e bupụ?

¹⁹ W'a sịzị nị, ‘Ụmụ eje-ịhịan kẹ Chuku e butọnị afụnfụn njọ a.’ Ya gi ẹ sọn onyẹ ahụn lẹ enwẹn ẹ, n'ọ marịn!

²⁰ N'o gi ẹnya a hụn ntikpọ ya lẹ enwẹn ẹ; n'ọ rarị ọnụma Onyẹ Hụ Nwọn Ikẹn Ile.

²¹ Ọ nwụnhụngụ, k'o k'e romẹzini ikpụlọ a, hụn ogẹn gụnahịngụ a?

²² Onyẹ k'a kuzimẹ nwan Chuku ihiẹn o k'e mẹ, ebe o mẹni ịya e kindẹ ndị kachanrịnnị ikpe?

Ọnwụn E Gbu Kẹ Onyẹ-ọma Kẹ Eje-ịhịan

²³ “O nwọn onyẹ ẹhụ a rị ikẹn o we nwụn, ẹhụ fu ẹ, onwọnni ihiẹn egun e gi tụ a —

²⁴ ẹhụ rị a mma, ọkpụkpụ a ze eze.

²⁵ Hụn ẹbọ nwụntọ imẹ ụya — onwọnni ogẹn o gi hụn ihiẹn rị mma.

²⁶ Wẹ ẹbụbụọ e fiẹnrin imẹ ili, ọhọrị a kpụ uwẹ ẹbụbụọ.

D'a Jụ Nị Ajụjụ

²⁷ “M marịnchanrịn ihiẹn ụnụ rị e ro, ihiẹn ụnụ romẹni m.

²⁸ Ụnụ sị, ‘Elebe kẹ ụlọ okẹn-ịhịan ahụn rị nwan? Elebe kẹ ụlọ ndị hụ ndị-ejẹ bi rị nwan?’

²⁹ Ụnụ e ke jụtu ndị e jẹnpụnị ụtaa? Ụnụ e ke gọntu ntịn akịkọ w'a kọ —

³⁰ nị Chuku e dọnmẹzi eje-ịhịan ndụn ogẹn ihiẹn-ikẹn, nị ọ zụọpụha a azụọpụha ụhụọhịn ọnụma?

³¹ Onyẹ kẹ egun a nị a jụgbọ a idẹnya a? Onyẹ kẹ egun a nị mẹgwarị eje-ịhịan ihiẹn o mẹ?

³² W'e lidẹ ẹ ọhụnma, e che ili ẹ nche.

³³ Ẹjan ọdanmgbugbu wẹ liye ẹ a sụọdẹ ẹhụ a ụsụọ; ịhịan ile e sọn ozun ẹ, igunrun wẹ ghalẹni as'ẹka a gụn e burun'ẹ ụzọ.

³⁴ Nanị kẹ ụnụ e dọn nwan gi oku nwọnlẹni isi rọkọ m obi? Ihiẹn ile ụnụ rị e ku enwọn ihiẹn ọ wụ karị ntụ.”