Jobu 20 - Ika

Isi Nke Ọgụn Zofa A Shịarịzị Jobu

¹ Ya kẹ Zofa onyẹ Naama nọ sị,

² “Ọ rị a fụ m obi haịn m gi a shịarịzị, makẹni obi eruni m alị kaka.

³ A nụọlẹ m oku i gi kpari m ebe ị rị a sị nị ẹnyi ekuni ọhụnma; kẹ m dọn ghọta a, o furu nị m shịarị ị.

⁴ Y'a marịnghọ kẹ ihiẹn nọ gha alị lala, kete w'e bulẹ ịhịan che elu-ụwa —

⁵ nị anwịnrịn eje-ịhịan ara bie, ịghọghọ onyẹ ghalẹni a tụ egun Osolobuẹ ara tọ.

⁶ Ọsụọn'a nị nhọnrọn a ru igwere, ọsụọn'a nị isi e a sụntụ igwere,

⁷ o k'a la iwi jẹnrin-ejẹn kẹ nsịn a dọn a la iwi; ndị hụn a mbụ k'a jụma, ‘Ebe ọ rị?’

⁸ O fepụ kẹ nrọ, ahụnkọzị w'a, ọ la kẹ ọhụn ịhịan hụn imẹ uhinhin.

⁹ Ẹnya hụnn'a ahụnkọzị a; ebe o te nọdị amarịnkọzịd'a.

¹⁰ Ụmụ a k'e dọnzirịrị nị ndị igbẹnnyẹ ihiẹn wẹ o wiwi; ẹka a k'e wekinrịrị akụ-lẹ-ụba a.

¹¹ Ndụn hụ ile jun ẹ ọkpụkpụ k'e sọn ẹ fiẹnrin imẹ ẹjan wẹ liye ẹ.

¹² Ọsụọn'a nị eje-ihiẹn hụ a sụọ a ụsụọ okuku, ọsụọn'a nị eje-ihiẹn ọ kpụ ọnụ jun ejun —

¹³ ọsụọdẹn'a nị ụya anịk'a hatu eje-ihiẹn hụ n'ọ la, o bu ẹ a tọ ọnụ a,

¹⁴ ihiẹn-oriri ẹ k'a rụrụ a ẹfọ; o sikọ d'e họnrin ẹdide agwọ imẹ ẹhụ a.

¹⁵ O k'a jụpụha akụ-lẹ-ụba o lue; Chuku k'e mẹ ẹfọ a gbọpụha wẹ.

¹⁶ Onyẹ hụ k'a mịrịn ẹdide agwọ; eze eje-agwọ k'e gbu ẹ.

¹⁷ O rikọ ihiẹn hụ ile rị e huhẹ kẹ mirin ebe ọ rị — mirin-ẹnwụn lẹ ezigbo mirin-ẹran hụ ile rị e hu kẹ iyi.

¹⁸ O k'e wekin ihiẹn hụ ọ kpa — o rikọ a; o rikọ erere afịa ọ zụ.

¹⁹ Makẹni ọ bịangbuọlẹ ndị igbẹnnyẹ, gbachanrịn wẹ ẹka; o werigụọ ụlọ ndị ọ tụnlẹni.

²⁰ Eziẹ, o zukọ ikẹn okẹn ẹkpịrị a; ọ sakọ ẹka gi ihiẹn ọ kpatọ zụọpụha enwẹn ẹ.

²¹ Onwọnni ihiẹn o rihọdụ; akụ-lẹ-ụba a atọkọ.

²² Ebe ẹfọ nọ junchanrịn a kẹ nsọngbu k'a nọ kunrun ẹ; eje-ụya k'o k'a hụn.

²³ O rijungụ ẹfọ, Chuku e gi okẹn olulu mẹ ẹ ihiẹn — kị nsọngbu nụman'a.

²⁴ Ọ gbanahịndẹ ihiẹn-ọgụn wẹ gi igwe mẹmẹ, a gba w'a ụta igwe-bronzu, o zupu ẹ ẹhụ —

²⁵ ọ gha a ogb'azụụn pụ, ọnụnụ a rị e gbukeni e zupugụọ a ẹkpa-olulu. Egun k'a tụgbu ẹ;

²⁶ ishi wụ ishi warịhụ e che ihiẹn ọ kpatọ. Ọkụn wẹ marịnlẹni ebe ọ gha bịa k'a dụnpụ ya nwẹn, ripụ ihiẹn họdụ iwe ẹ.

²⁷ Igwere k'a ghọsị n'o mẹ eje-ihiẹn; alị k'a shịagbu ẹ ẹri.

²⁸ Mirin k'e buru ụlọ a, mirin hukọnị k'e mẹ ẹ — ụhụọhịn Chuku k'e bu olulu ẹ.

²⁹ Ọhụn kẹ Chuku e keye ndị ẹfọ jọ, ọhụn kẹ Chuku dọnmẹni wẹ.”