Jobu 2 - Ika

Isi Nke Ẹbụọ Kẹ Chuku Dọn Lelezi Jobu

¹ O ru ụhụọhịn ọzọ, ndị mmọn-ozi nọzị pụha ihun Osolobuẹ, Ekwensụ nkẹ nọ pụhazị imẹ igunrun wẹ.

² Osolobuẹ nọzị sị Ekwensụ, “Ebe ị gha bịa?” Ekwensụ nọ sị, “M rị a ghahunmẹ imẹ ụwa ile, e jẹnjẹn, e jẹnlụa — ebahụn kẹ m gha bịa.”

³ Ya Osolobuẹ nọ jụ Ekwensụ, “Y'e lekpọgụọ odibo m wụ Jobu? Onwọnni onyẹ nọ kẹ ya elu ụwa; onyẹ ezioku k'ọ wụ; onwọn nkọrịanị; ọ tụ egun Chuku, ara gi eje-ihiẹn mẹ ẹhụ. Echẹn k'o gikwọ hụn o gi, ọ sụọn'a nị i te nu m nị m tikpọ a bụ onwọnni ihiẹn o mẹ.”

⁴ Ekwensụ nọ sị, “Ẹhụ ịhịan wụ ẹhụ ịhịan! Onwọnni ihiẹn ịhịan ghalẹni e ye n'o gi zụọ isi ẹ.

⁵ Tịnpụlele nwan ẹka mẹ ẹhụ a ihiẹn hụn o k'a nụ ukwere ẹ, omẹni ọ kpọkọ ị iyi ihun i.”

⁶ Osolobuẹ nọ sị a, “Ọ maka; e we m nwan Jobu che i ẹka — ka emẹtụlẹ ndụn a ẹka.”

⁷ Ya Ekwensụ nọ gha ebe Osolobuẹ rị pụ, jẹn d'e bu ẹtẹ a tụrụ ọda-ọda ghagbama Jobu ẹhụ ile — gha isi d'e ru ọb'ụkụ.

⁸ Ya Jobu nọ gwọrị imẹ ikpọn-ntụn nke onyẹ ihiẹn mẹ, gi mpekele ite a kọ ẹhụ a.

Jobu Lẹ Nwunyẹ Ẹ

⁹ Nwunyẹ Jobu nọ sị Jobu, “Echẹn k'i kwọnkẹnmẹkwọ ebe i kwọndọn? Kpọ Chuku iyi n'ị nwụn!”

¹⁰ Jobu nọ sị a, “Y'e kumẹ kẹ ikpoho nzuzu! Ya wụ Chuku ye ẹnyi ihiẹn rị mma ẹnyi a narịn, o ye ẹnyi nsọngbu ẹnyi a jụ?” Ihiẹnni ile mẹni, Jobu egini oku-ọnụ a mẹ njọ.

Ndị Ọwụ Jobu Ẹtọ

¹¹ Ogẹn ndị ọwụ Jobu ẹtịtọ wụ Ẹlifazị onyẹ alị Tẹmanị lẹ Bidadị onyẹ alị Shu lẹ Zofa onyẹ alị Naama gi nụ nsọngbu ile kunrunn'ẹ, ya wẹ nọ ghasọnmẹ iwe wẹ buli. Wẹ nọ zu, kweri ni wẹ d'e kele ẹ, rọkọ a obi.

¹² Ogẹn wẹ gi lecheni Jobu, ete marịnzịnị w'a; wẹ nọ tikpọpụ ẹkwan, hụn ịhịan ile rị a nụ; a dọka wẹ ẹwuru ye enwẹn wẹ olu, bụọ uzunzun ye isi.

¹³ Wẹ nọ sọn ẹ nọdị akpakalị ọrọgbọ akpọhịn ẹsa lẹ uhinhin ẹsa. Onwọnni onyẹ gwa a ihiẹn ọwụlẹ, makẹni a hụngụọ wẹ okẹn afụnfụn ọ rị imẹ ẹ.