Jobu 19 - Ika

Isi Nke Mmitenẹi Jobu A Shịarịzị

¹ Ya Jobu nọ sị,

² “Nanị kẹ ụnụ e yebiehandẹ m nwan afụnfụn, e gi ọnụ e mẹ m?

³ Mgbe iri kẹ ụnụ kparipụ m; ụnụ hụ a maye m! Ifẹnrẹn arịdẹ nwan ụnụ ẹnya ra?!

⁴ Omẹni m te kpahudẹ akpahu, mkpa m rọ, ẹlẹ oku ụnụ.

⁵ Omẹni ọ rị ụnụ nke imẹkarị enwẹn ụnụ ebe m rị, nke igi ụya m rị e ri a kpari m,

⁶ marịn nị nwan nị Chuku wụ onyẹ hụn mẹ m eje-ihiẹn, dọ ọnyan-ọga a kpu m.

⁷ Ọsụọn'a nị m hụ e yi, ‘E mẹgụọ wẹ m eje-ihiẹn!’ Onwọnni onyẹ a zanị m; m hụ a hị nị wẹ yeni m ẹka onwọnni onyẹ a hannị m eṅẹn.

⁸ O gbukingụọ m ụzọ makẹ m'a s'ẹka gha; o mẹgụọ ụzọ m gba ishi.

⁹ Ọ napụgụọ m ọghọ m, wepụ m okpu-eze isi.

¹⁰ Ọ hụ a kụ m ihiẹn azụụn ile kẹn'ọ kụtuchanrịn m; ọ bụpụgụọ ihiẹn m te gi dọn ẹnya nọkẹ osisi.

¹¹ Ọ hụ e gi olulu e sọn m; a gụn m e yeni ndị-iṅẹnrẹn ẹ.

¹² Ndị-agha a a bịagụọ d'a maye m lekẹ obodo; a tụnhunmẹgụọ wẹ mkpọnyin w'a nọ maye m; e tumẹgụọ wẹ ọdụ-agha wẹ ghahunmẹ ebe m bi.

¹³ O kebegụọ mmẹ lẹ umunẹ m; ndị te marịnnị m amarịnzị m kaka.

¹⁴ Ndị ebọn ẹnyi a lagụọ m tọ; ndị ọwụ m a zọgụọ m.

¹⁵ Ndị a bịa iwe m lẹ idibo m ikpoho hụ e mẹ m kẹ onyẹ wẹ marịnlẹni, e mẹ m kẹ otumunyẹ.

¹⁶ M kpọ odibo m, ara zazị m, ọsụọn'a nị m gi ọnụ m rịọ a.

¹⁷ Ọnụ m rịdẹ nwan e shintụ nwunyẹ m; m rịdẹ nwan e ze ụmụ ẹfọ nnẹ m ize.

¹⁸ Ụmụ-ẹka rịzịdẹ nwan e legberi m — m pụha, a mụma wẹ m.

¹⁹ M rị nwan e ze ndị te wụ ezigbo ọwụ m ize; onyẹ m gi e mẹ ẹhụ e bugụọ nụmanị m.

²⁰ Akpụkpọ-ẹhụ lẹ ọkpụkpụ sụọ họdụ m ẹhụ; ndụn m sụọ họdụ.

²¹ Mẹ ni omikẹn m, ndị ọwụ m, mẹni ni m omikẹn, makẹni ẹka Chuku e mẹọlẹ m ihiẹn.

²² Kị ụnụ rị a chụnị m kẹ Chuku dọn rị a chụ m? Hụn ụnụ mẹpụ m eke hi ụnụ?

²³ K'ọ rị m e detu wẹ ihiẹn m rị e ku, de wẹ yedẹ imẹ ẹkụkwọ,

²⁴ gidẹ igwe lẹ igwe-lẹdi detu wẹ mọbụ ka wẹ ye elu ọmụma — nị wẹ rịsọnmẹ jẹnrin-ejẹn!

²⁵ A marịnghọ m nị Onyẹ Agbapụhanị m rị ndụn, n'o k'e wuzo elu-ụwa ogẹn ikpanzụụn;

²⁶ nị ọsụọn'a nị akpụkpọ-ẹhụ m la iwi, m k'e gikwọ ẹhụ m hụn Chuku;

²⁷ mmẹ lẹ enwẹn m k'a hụn a; ẹnya m kẹ m'e gi hụn a — mmẹ, ẹlẹ onyẹ ọzọ. O d'a gụngbu m!

²⁸ Ikẹnkwọ ụnụ sị, ‘Kị ẹnyi k'e mẹzi ẹ cheni hụn ẹnyi mẹ ẹ, ebe o mẹni ịya buhẹ nsọngbuni?’

²⁹ Ka tụkwọ nị nwan egun ọpịa Chuku, makẹni o gi ọnụma sọn ụnụ, ọpịa k'o k'e gi ye ụnụ afụnfụn — ya kẹ ụnụ e gi marịn nị okinkin-ikpe rị arị.”