Jobu 18 - Ika

Isi Nke Mmẹsatọ Bidadị A Shịarịzị Jobu

¹ Ya Bidadị onyẹ Shu nọ sị,

² “Elee mgbe kẹ ụnụ k'e kubehi oku ndịnị? Nwọnrinkwọ ni uche, nị ẹnyi nwẹn ku.

Bidadị nọ sị Jobu,

³ “Kị haịn ẹnyi gi nọ ụnụ kẹ efin ẹnya? Kị haịn ẹnyi gi nọ ị kẹ ndị ẹwobi ẹnya?

⁴ Ịyụ hụn a dọyịya enwẹn i n'i rị e bu olulu! Ị sị wẹ la ụwa tọn'ị? Ị sị nwan wẹ wepụsọnmẹ ugu ọnọdị wẹ?

⁵ W'e tinyụn ukpẹ eje-ịhịan etinyụn; ọkụn a enwunbehi enwunbehi.

⁶ Ukpẹ rị iwe ẹ e tinyụnzị etinyụn; ukpẹ nọkunmẹn'ẹ e tinyụn etinyụn.

⁷ Ụkụ a atụkọzị alị; ihiẹn o romẹ e butu ẹ.

⁸ Ụkụ a e bu ẹ e che imẹ ọnyan, ọ waban ọnụ ọnyan hụ, ọ nwụndọn ẹ.

⁹ Ọnyan a nwụn a atụkụ-azụụn; ọnyan e kwọnkẹnmẹ ẹ.

¹⁰ W'e shitọn'a ọnyan nzọpu alị n'ọ zọye ụkụ; ọnyan rị ozue ẹ e che ẹ.

¹¹ Ihiẹn egun e fihunmẹ ẹ ụzọ ile, e sọnhunmẹ ẹ.

¹² Nsọngbu a chọd'a a chọ; ntikpọ nkẹ hụ e che ẹ n'ọ dan.

¹³ O risọnmẹ akpụkpọ ẹhụ a mkpabe-mkpabe; emu, nwa-ibuzọ ọnwụn, e ripụ a ụkụ lẹ ẹka.

¹⁴ W'a kpụnpụ a iwe ẹ o te gi dọn ẹnya, e duru ẹ e jẹnni ihiẹn-egun ka ihiẹn-egun hụn wụ ọnwụn.

¹⁵ Ihiẹn ọ marịnlẹni e mẹ iwe ẹ; w'e fedẹ nsịn-ẹnyanwụn e ye ihiẹn ẹ ile.

¹⁶ Mkpọgụn a rị alị a kpọpụ nkụn, agalaba a rị elu e shinwụn.

¹⁷ Anyanhankọzị w'a elu-ụwa; onwọnkọ ẹfan imẹ alị wẹ.

¹⁸ W'a gha imẹ ukpẹ a chụ a e ye imẹ ishi, a chụpụchanrịnd'a elu ụwa.

¹⁹ Ara nwọn onyẹ ọ latọ imẹ ndị nke ẹ, onwọnni onyẹ e bikin ugbẹ ẹ.

²⁰ Ihiẹn e kunrunn'ẹ a tụgbu ndị rị ẹbamịn ọdịdan-ẹnyanwụn ẹnya, a gba ndị rị ẹbamịn ọwụwa-ẹnyanwụn akpata-oyi.

²¹ Eziẹ, ya wụ ihiẹn e mẹ ebe eje-ịhịan bi, ya wụ ihiẹn e mẹ iwe onyẹ marịnlẹni Chuku.”