Jobu 17 - Ika

Isi Nke Mmẹsa Jobu Sịzị: N'o Kpuyeghọ M?

¹ “Ndụn a gụgụọ m, m'e d'a nwụnchu, ili rị nwan e che m.

² Eziẹ ndị-nlelịa fihunmẹ m; m hụ e lee ụya wẹ ri e ye.

³ Chuku, dodo, gi nwan ẹka ị kuni m ọnụ m. Onyẹ k'a sịzị nwan n'ọ marịnghọ m omẹni ẹlẹ yụ?

⁴ Y'e kpukingụọ uche wẹ makẹ wẹ gha a ghọta; ya wụ y'a nịkọ wẹ mẹri.

⁵ Onyẹ re ọwụ a n'o nwọnhẹn ihiẹn, ẹnya k'e kpu ụmụ a ishi.

⁶ Chuku e gigụọ m họnrin ihiẹn w'a mụ ẹmụ, onyẹ w'a jụ ẹsọn e ye ihun.

⁷ Ẹnya e mẹmẹgụọ m bishi-bishi yeni ẹkwan; e fiechanrịngụọ m ẹhụ — m nọhụ kẹ onyinyọn.

⁸ Ọnwan a tụ ndị e bi ọhụnma egun; o mẹ ndị ẹka wẹ rị ọchan e bu olulu — e buni ndị ghalẹni a tụ egun Osolobuẹ olulu.

⁹ K'osilẹrị, ndị ezi-omumẹ k'e kwọnkẹnmẹ hụn wẹ gi, ndị ẹka wẹ rị ọchan k'e zewaye.

¹⁰ Ka bịa nị, ụnụ ile, nwanzịdẹ ni ikẹn ụnụ — ahụnkọ m akpụ onyẹ ohu marịn ihiẹn imẹ ụnụ.

¹¹ Ogẹn m a gharịgụọ, ihiẹn ile m te bu obi a kpayịyagụọ, ihiẹn ile m chọ.

¹² Ikẹnnyẹni sị uhinhin wụ efinnaị; ọhịhị gbama wẹ sị, ‘Eki e d'e fọn.’

¹³ Omẹni ili kẹ m te gi dọn ẹnya, omẹni imẹ ishi kẹ m gbamaye ihiẹn m gi e dinẹ,

¹⁴ omẹni ili kẹ m gi dọn ẹnya nọkẹ nẹdi, omẹni ọhọrị rị imẹ ili kẹ mmẹ lẹ ya k'a nọdịsọnmẹ lekẹ nnẹ m mọbụ nwẹnẹ m,

¹⁵ kịnị k'e m'e kwọndọnzi nwan ẹka? Onyẹ k'a gwa m ihiẹn ọ wụ?

¹⁶ Ihiẹn ahụn k'e sọn m la mmọn? N'o sọn m nwan la ẹjan?”