Jobu 16 - Ika

Isi Nke Mmisin Ihiẹn Jobu Shịarị Ẹlifazị

¹ Jobu nọ sị:

² “O tekẹ m nụma ihiẹn ndị nọ ẹnịna; ndị nrọkọ-obi ndụn gụ kẹ ụnụ ile wụ!

³ Oku ụnụ suegbu enwẹn ẹ nwọnlẹni isi ebikọ? Kị rị e mẹ ụnụ, ụnụ gi tọ a dọ ihiẹnni?

⁴ Mmẹ nwẹn nwọnzikwọ ikẹn ku kẹ ụnụ, omẹni ụnụ te rị ọnọdịnị m rị; nkẹ m'a sazịkwọ ẹka gi oku rịgbu enwẹn ẹ mma ma ọnụ ikpe, finfinni ụnụ isi.

⁵ Kanị, obi kẹ mmẹ nwẹn nkẹ a kasị ọnụ; nkẹ m'a gwa ụnụ oku k'a rọkọ ụnụ obi, mẹ ẹhụ fuyezi ụnụ.

⁶ M ku oku, ihiẹn rị a tụrụnị m ebelụakọ; m gba nkịtịn, ọ kụsịkọ.

⁷ Euu Chuku, y'e mẹgụọ ẹhụ ghanahịn m; y'e tikpọgụọ ezi-lẹ-ụlọ m ile.

⁸ Y'e kẹnmẹgụọ m — gi ẹ a shịagbu m ẹri; ẹhụ m fie hụzị nwan a shịagbu m ẹri.

⁹ Chuku hụ a maye m, e gi ọnụma a dọrinriẹn m, e rini m nkwẹnrẹn-eze; onyẹ iwe m hụ e bu eje-ẹnya a tụma m.

¹⁰ Wẹ hụ e wo m; a ma m ọra mkpari, e zuni m umẹ.

¹¹ Chuku e wegụọ m che ẹka ndị-ejẹ; ọ tụgụọ m ye ẹka ndị ẹfọ jọ.

¹² Ihiẹn ile te hụ m mma, ọ nọ kụkpọpụchanrịn m; ọ nwụndọn m olu, gwekpọ m. O bugụọ m tumẹ a gba m hụ ụta;

¹³ ndị a gban'a ụta e fihunmẹgụọ m. Ọ hụ e zupu m akụnrụn — omikẹn arịa, ọ gbagụọ olulu m a ye alị.

¹⁴ Ọ hụ a maye m, ọmaye-ọmaye; ọ zụnburu m nọkẹ onyẹ-agha.

¹⁵ Ẹkwa-achọ wẹ gi a kwan ụya a nyanrịngụọ m ẹhụ; ọghọ m rị nwan alị.

¹⁶ Ẹnya m a changụọ yeni ẹkwan; ẹnya m e funchanrịngụọ;

¹⁷ bụ onwọnni eje-ihiẹn rị m ẹka, m hụzịkwọ e gichanrịn obi m ile e mẹ ekpere.

¹⁸ Alị-ee! Ekpumẹkwọlẹ ẹdeke m; anịkwọlẹ wẹ zuemẹ ẹkwan m!

Ọshẹri M Rị Elu-igwee

¹⁹ “K'osilẹrị, ọshẹri m hụkwọ nwan elu-igwee; onyẹ e kinni m ọnụ m rị elu.

²⁰ Ndị ọwụ m hụ a mụgbu m hụnnị m rị a kwan ẹnya-mirin a kpọku Chuku.

²¹ Euu, onyẹ hụn k'a rịọdọnni ịhịan ebe Chuku rị kẹ ịhịan dọn a rịọdọnni ọwụ a!

²² Makẹni ọ họdụ nwan ahụa ole, e jẹnmẹ m ebe wẹ ghalẹni a lụaha.