Jobu 15 - Ika

Isi Nke Mmisẹn Ẹlifazị A Shịarịzị Jobu

¹ Ya kẹ Ẹlifazị onyẹ Tẹmanị nọ shịarị Jobu:

² “Onyẹ nwọn uche e kudẹ ihiẹn nwọnlẹni isi n'ọ rị a shịarị oku ra? N'o gidẹ ufere ọkụn ọwụwa-ẹnyanwụn dadọn ẹfọ ra?

³ N'o gi oku nwọnlẹni isi dọ oku? N'o gi oku banlẹni erere mẹ ẹ?

⁴ Oku-ọnụ ị rịdẹ nwan e mẹ ịhịan atụzịlẹ egun Osolobuẹ, e mẹ ịhịan e ro ihiẹn ọ chọ n'o ro ihun Chuku.

⁵ Njọ ị rị e mẹ ọnụ ị e ku ihiẹn ọ rị e ku; ị rị e ku kẹ ndị ẹro.

⁶ Ọnụ ị nkẹ rịdẹ nwan a ma i ikpe, ẹlẹ nke m; ụgb'ọnụ ị rị a shịagbu i ẹri.

⁷ Ịyụ wụ onyẹ ibuzọ wẹ mụ elu-ụwa, ra wẹ ke i nị wẹ d'e ke ugu?

⁸ Y'e jẹntughọ ọgwa Chuku, y'e gi marịn uche ẹ? I ro nị yụ sụọ nwọn amamihiẹn?

⁹ K'ị marịn ẹnyi marịnlẹni? K'ị ghọta ẹnyi ghọtalẹni?

¹⁰ Ndị isi-ẹwọ lẹ ndị ẹgẹdi rị ẹnyi azụụn, ikẹnnyẹ ndị dịandẹ nẹdi i.

¹¹ Ihiẹn ile Chuku gi rị a rọkọ ị obi ehini i? Oku ndị wẹ rị e gi nwayọ a gwa ị ezuni i?

¹² Kị haịn i gilẹni sazị ẹka kwọndọn enwẹn i — ẹnya hụ e nwun i ọkụn-ọkụn —

¹³ nke wụ nị ị hụdẹ a kpọnị Chuku ọnụma; oku nọ ẹrịra hụ a gha ị ọnụ e hupụha?

¹⁴ Kị ịhịan wụdẹ hụn o k'e gi s'ẹka rị ọchan; kị onyẹ okpoho mụ wụ hụn o k'e gi s'ẹka mẹ ezi-omumẹ?

¹⁵ Omẹni Chuku egini ndị mmọn-ozi nsọ a dọn ẹnya; omẹni igwere lẹ enwẹn ẹ enwundẹni ẹnya a,

¹⁶ kị wụzị ịhịan, ịhịan eje-ihiẹn eje-ihiẹn lẹ ụrụ jun ẹka, hụn e nura (lura) eje-ihiẹn kẹ mirin!

¹⁷ Gọn m ntịn, nị m kọwan'ị; nị m gwa ị ihiẹn m hụnpụ,

¹⁸ ihiẹn ndị marịn ihiẹn ku, ndị zuemẹlẹni amamihiẹn wẹ nwọnhẹn ẹka ndị nẹdi wẹ,

¹⁹ ndị hụn o mẹni uwẹ sụọ te nwọn alị, kẹ itumunyẹ kelẹni bịa d'e buchesọnmẹ nke wẹ:

²⁰ Afụnfụn-afụnfụn kẹ onyẹ ẹfọ-njọ a ta elu ẹ ile, ya kẹ onyẹ akụ ta mirin a hụn ahụa ile o k'e bi.

²¹ Ụzụn e rọn egun kẹ ntịn a a nụ; ihiẹn mẹmẹ nọkẹ sị ọ rịchanrịngụọ mma, onyẹ e tikpọnị a maye ẹ.

²² Ogẹn ile, ọ rị a kẹ sị ọ hụnkọ isi pụha imẹ ishi ọ rị; e yegụọ w'a ahịma onyẹ wẹ k'e gi ọpịa gbu.

²³ Ọ wahunmẹsọnmẹ, ihiẹn-oriri udele k'ọ wụ; ọ marịnghọ nị ụhụọhịn ishi a rịgụọ nsue.

²⁴ Egun nsọngbu hụ a tụgbu ẹ, uhue hụ e gbu ẹ e bu ẹ e ri, lekẹ eze chọ n'ọ lụsọn alị agha,

²⁵ makẹ mban ọ rị a bannị Chuku, a nyannị Onyẹ Nwọn Ikẹn Ile isi,

²⁶ e fen'ẹ isi, a maye ẹ ọgụn — bukọ akpaịn zeni hụn nwọn ulu.

²⁷ Ọsụọn'a nị nti mẹ ẹ kwọị-kwọị, ukun e mẹ ẹ uru-uru,

²⁸ o k'e biri obodo ndị tikpọgụnị lẹ ụlọ ịhịan bilẹni — ụlọ ndị mẹ mkpọkọ-mkpọkọ.

²⁹ O mẹkọzị ọdanfịn, akụ-lẹ-ụba a atọkọ, ihiẹn ẹ ejunkọzị imẹ alị wẹ.

³⁰ Ọ hụnkọ isi pụha imẹ ishi ọ k'a rị; ọkụn k'e shinwụn ẹhụhụọ a lẹ agala a, uzun gha Chuku ọnụ pụha k'e buhuhu ẹ.

³¹ Ya atụkwọlẹ enwẹn ẹ ntụ, ghahanị igi ihiẹn nwọnlẹni ihiẹn ọ wụ dọn ẹnya; makẹni onwọnni erere o k'a bann'a.

³² Wẹ k'a kụzu ẹ ụgwọ ihiẹn o mẹ o gini d'a nwụn; agalaba a edukọ!

³³ O k'a nọ kẹ ogbe vaịnị ndị kalẹni rị a dannị, olivu obobo ẹ rị a danpụ.

³⁴ Makẹni ndị ghalẹni a tụ egun Osolobuẹ k'e mẹ agan; ọkụn jẹnkọ d'a dụnpụ ụlọ ndị egho azụụn a sụọ.

³⁵ Wẹ tụrụ nsọngbu lekẹ imẹ, a mụ wẹ eje-ihiẹn nọkẹ nwa; ndufie rị wẹ ẹfọ a hama kẹ nwa.”