Jobu 14 - Ika

Isi Nke Mmẹnọ Jobu Sị Kẹ Ndị Nwụnnị A Rịzị Ndụn

¹ “Ịhịan okpoho mụ a tọhụ ẹkẹrẹ, a hụnjun ẹnya.

² Ọ pụha kẹ obobo, o shinwụn; ọ tọhụ ẹkẹrẹ kẹ onyinyọn, ọ ra tọ.

³ Chuku, n'i nyọnchanma nwan onyẹ nọ ẹrịra? N'i sọn ẹ kinmẹ ikpe?

⁴ Onyẹ k'a s'ẹka nọ ihiẹn rụnị wepụha ihiẹn rụlẹni? Onwọnni!

⁵ Y'a kayegụọ ebe ịhịan k'a tọru; y'e kugụọ ifọn ole o k'a tọ — ọ tọghafekọ a.

⁶ Wepụ a nwan ẹnya, ha a ye, d'e ru mgbe ọ rụnzu ogẹn ẹ — lekẹ onyẹ wẹ we ọrụn.

Osisi Wẹ Gbutu

⁷ “Osisi e te nwọnghọdẹ hụn o gi dọn ẹnya: Wẹ gbutu ẹ, o k'a fọrịzị; ọ fọrị, o k'e suerịrị;

⁸ ikẹnkwọ mkpọgụn a a kagụọ ẹgẹdi imẹ alị, ukun ẹ a nwụntọ imẹ alị —

⁹ kanị mirin mẹtụ a hụ, ọ fọrị.

¹⁰ Nke ịhịan, ọ nwụnhụn, o fiẹnrin mọmọmọ; o kwọnbepụhụ, nke ẹ a gụ.

¹¹ Kẹ mirin odiyiri dọn a tahị, a gụ lẹzi kẹ iyi udu-mirin dọn a tahị ogẹn ọkọkị,

¹² ẹrịra kẹ ịhịan e dinẹ imẹ ili, o lihikọ; d'e ru ni elu-igwere arịzị, ịhịan etẹnhinkọ, akpọtiẹnkọ w'a.

¹³ K'ọ rị m y'e bu m zuemẹ imẹ ili, zuemẹ m d'e ru mgbe olulu i rọgụ! K'ọ rị m y'a kayeni m ogẹn, o zugụ y'a nyanhan m!

¹⁴ Ịhịan nwụnhụngụ, n'ọ rịzị ndụn? Omẹni n'ọ rịghọ ndụn, e din m afụnfụnnị m rị imẹ ẹ, e che mgbe wẹ tọpụ m.

¹⁵ Ị k'a kpọ m, a za m'ị; ihiẹn ẹka ị mẹmẹ k'a da ị.

¹⁶ N'ị gụnghọ amụkụ ijẹn ogẹn hụ, kanị ẹlẹ hụn y'e gi a gụntọnị m njọ m.

¹⁷ Wẹ k'e bu mmẹfie m che imẹ ẹkpa kẹnkin; i k'e kpumẹ njọ m.

¹⁸ “Kanị kẹ ugu dọn e rinrinpụ, a dankpọ, lẹzi kẹ wẹ dọn a bụpụ ẹregede ọmụma ọnọdị a;

¹⁹ nọkẹ kẹ mirin dọn e richan ọmụma lẹzi kẹ okẹn-mirin dọn e huchanpụ ẹjan — ẹrịra kẹ y'e wiwi ihiẹn ịhịan gi dọn ẹnya.

²⁰ Y'a karị a ẹka, karịchanrịn — nke ẹ a gụ; y'e wiwi ihun ẹ, zi ẹ la mmọn.

²¹ Wẹ bushi ụmụ a elu, ọ marịnkọ; wẹ dan, ara hụn a.

²² Hụn rị a tụrụ ya lẹ enwẹn ẹ sụọ k'ọ nụ ukwere ẹ; enwẹn ẹ sụọ k'ọ kwannị.”