Jobu 11 - Ika

Isi Nke Mmanaị Oku Ibuzọ Zofa Gwa Jobu O K'e Nwọnrịrị Njọ I Mẹ Nzuzue

¹ Ya kẹ Zofa onyẹ alị Naama nọ shịarị a,

² “Ashịarịkọdẹ wẹ ọtụtụ-okuni ile ra? Nị wẹ nịdẹ nwan onyẹ ọtụtụ oku ro n'o kukẹ ọhụnma ra?

³ Nị i gi nwan oku i nwọnlẹni isi kpumẹ ịhịan ọnụ? Ajụgbọkọ wẹ i ebe ị nọ ku arụ?

⁴ Ị hụ a sị Chuku, ‘A marịngụọ m nị ihiẹn m rị e ku enwọn ntụpọ; m rịzịkwọ ọchan ẹnya ị.’

⁵ Euu, k'ọ rị m Chuku e ku, k'ọ rị m Chuku a shịapụ ọnụ gwa ị oku —

⁶ gwa ị ihiẹn amamihiẹn wụ, makẹni ezigbo amamihiẹn nwọn azụụn ẹbụọ; ya m'ẹ n'ị marịn nị Chuku e yerudẹn'i afụnfụn kẹ njọ ị han.

⁷ N'ị sa ẹka ghọtachanrịn Chuku? N'ị sa ẹka chọpụhachanrịn ihiẹn ile gbashịarị Onyẹ Hụ Nwọn Ikẹn Ile?

⁸ Ihiẹn ẹ jẹnnahịn igwere elu — k'i k'a sa ẹka mẹ? Wẹ minahịn alị-mmọn — k'i k'a sa ẹka marịn?

⁹ Wẹ suenahịn ụwa, shịanahịn ohimin.

¹⁰ Ọ kpọkin i ye ngan, kpọn'ị ọgwa, onyẹ k'a s'ẹka sị a mba?

¹¹ Ọ marịnghọ ndị wụlẹni ezigbo ịhịan; ọ hụn eje-ihiẹn, ọ marịnkọ a?

¹² Kanị mgbe jaki-ọfịa mụ ịhịan kẹ onyẹ-nzuzu k'a marịn ihiẹn!

We Nwan Enwẹn I Kwanị Chuku

¹³ “Kanị i wechanrịn obi i ye Chuku, rịọ a n'o yeni i ẹka;

¹⁴ i wepụchanrịn njọ ile rị ị ẹka, jụ nị eje-ihiẹn ọwụlẹ arịkọ iwe i,

¹⁵ ogẹn hụ kẹ y'e gi weshi isi elu, ifẹnrẹn emẹkọ ị, y'e wuzochanrịn, egun atụkọ ị.

¹⁶ Makẹni, i k'a zọ nsọngbu i, a nyanhan a hụ lekẹ mirin hughafeni.

¹⁷ Elu i k'e nwun kẹ ukpẹ, nwunahịndẹ anwụn efinaị, ọhịhị a nọ ị kẹ ẹnyanwụn-ụtụntụn.

¹⁸ Obi k'e ru i alị, makẹni o kpuyekọ ị. Osolobuẹ k'e che i nche, y'e zu ikẹn, ihiẹn emẹkọ ị.

¹⁹ I k'e dinẹ alị, onwọnni onyẹ k'e rọn i egun, ndị bu ọda k'a rị a rịọ ị ihiẹn.

²⁰ Kanị ndị eje-ịhịan eleghakọzị ụzọ, awanahịnkọ wẹ; ihiẹn wẹ k'a rị a tụ ẹnya a wụ ikwọnbepụnị.”